Horror nest *[]* عش الرعب

الي يقرأوون مدونتي على قارئ ووردبرس ما أضمن سلامة التنسيق ولا الخط .. أنا أنسق الي يظهر على مدونتي نفسها فالمعذره لأن قارئ ووردبرس ما يتعدل فيه لا الخط ولا المحاذاه
.
هذي المره أغلب التدوينه صور، بس فيه سالفة عش الرعب الي في العنوان بعد
..
في حوشنا حديقه كبيره والأشجار فيها طويله بما يكفي ان العصافير تنام فيها وتبني أعشاش
التنوع في الطيور ممتع، أصواتها وألوانها وتفضيلاتها في الأكل والأماكن
الجو الحين خريف والأوراق بدأت تصفر وتطيح بس بعض الصور أخذتها قبل ما يبدأ الموسم
..
ischerzo.jpg
..
DSC_0094
..
هذا الطائر اسمه الزرزور أحمر الجناحين، صوته رايق جدا ً في البدايه، بس إذا أحد قرب منه يطلع صوته زي الغراب، وقوي وجه طول الوقت جالس على الأغصان القريبه من الأرض وما يبغى يروح، يتوقع منك أنت انك تروح
لونه بالكامل أسود ما عدا أطراف الأجنحه إذا طار يبان لونها أحمر على برتقالي.. للأسف ما قدرت أصورها
..
1
..
DSC_0114
..
هذا النوع المفضل عندي من بين الطيور في المنطقه، نوع من أنواع البلبل اسمه أصفر العجز ، اختي تقول كأنه شخص مثقف وراقي.. معها حق، تحسون انه يترفع عن الهبل الي يسوونه العصافير، ما عمري شفته يتضارب مع الطيور الثانيه أو حتى يسوي إزعاج إذا مشينا تحت الشجر.. صوته حلو وكأنه يقول سالفه مو بس يغرد، وقت الفجر أحيانا ً يصحى قبل ما يأذن وبمجرد ما أسمع صوته أعرف أن الأذان بيكون في أي لحظه، وفي المغرب برضو وقت الأذان صوته يكون واضح ويستمر حتى بعد ما ينامون باقي العصافير.. صوته في المقطع التالي وحطيت وقت التشغيل مضبوط على بداية التغريد ، مب لازم تكملون المقطع للأخير
1
..
..
DSC_0120
زرزور أبيض البطن 
مخلين اللون البنفسجي ومسمينه على لون بطنه الي موجود في كل الطيور
المهم، هذا شايف نفسه، يجي قبل نهاية الصيف تقريبا ً، وما يطول، كل سنه يجلس بالكثير شهر، هذا الي أشوفه عندنا في الحوش يعني، ما أدري لو كان يستمر فترات أطول
مثله مثل الي فوق كلهم، يحبون التين، عندنا 3 شجرات تين وهم يتجمعون ياكلون الثمار الي فوق واحنا نقطف الي تحت 
لونه في الشمس رهييب ، ما سمعت صوته لحد الآن، بس شايف نفسه، ودايم يطرد الطيور من الشجره علشان يجلس عليها هو والي معاه، غالبا ً يجون 2 والسنه هذي 3.. ما شفت أكثر من كذا 
DSC_0124
..
1
..
..
..
الحين قصة المهندس الصامد وعش الرعب 
..
DSC_0131
..
الأخير هذا مسوي دراما وزحمه طوووول الصيف أشغلنا وينافخ وصوته واصل آخر الحاره هو والعش الزفت المدور حقه.. هو الطائر الوحيد الي ما أشوفه ياكل !
بس يشتغل ويشتغل ويشتغل طول الصيف، يجمع العشب وهو ليّن ويسوي عش مدور ومع الوقت يجف العش ويصير محكم ومرتب بشكل مو طبيعي 
اسم الطائر الحبّاك أو المهندس، له مقاطع في اليوتيوب عن طريقة بناء العش، فيها تقنيات مب سهله أبدا ً
الحباك الأصفر هو الذكر ويبني العش في محاوله انه يغري أنثى (لونها بني أفتح من البنيين العاديين وفيه صوره لها تحت) وإذا أعجبها العش تسكن فيه ويفرخون ويطيرون الصغار قبل بداية الشتاء..
بس لو العش ما أعجب بنات العز وش يصير؟ يقوم ينتفه ويطيحه 
السنه هذي ما حتى أعطوه فرصه، كل ما جات انثى وحاولت تستقر يجون الباقين يخربون العش ويحاولون يطيحونه.. طيحوا عليه العش الأول وزعل وصار كل مغرب يقوم يصيح بأعلى صوته ( يلعنهم الظاهر ) وفي النهايه سوا واحد ثاني محكم لدرجة أن رياح الخريف المجنونه الي تصحيني من النوم ما قدرت تطيح هالعش، بس للأسف كل مغرب يجي يتضارب مع العصافير الي يحاولون يطيحونه، ما صار مهتم انه يكون عائله لأن الموسم انتهى، المسألة صارت شخصيه ، وقدر يثبت نفسه وللحين بيبدأ الشتاء والعش صامد .. أبوي كان يفكر بجديه يشتري مسدس لعبه الي يرمي، ويصير يرمي على الي يخربون، لأن المكان الي يجلس فيه أبوي قدام الشباك ومطل على الشجره وطول الصيف يراقبه يشوف وش آخرتها.. برضو شباك غرفتي مطل على ساحة المعركه وطول الصيف أزعجوا أهلنا. الي يبغى يسمع صوته  ( هنا )
..
DSC_0119
..
العش الصامل المهجور.. شكله السنه الجايه يجون عصافير بزران ومراهقين يسوون مغامرات في العش المسكون ويعنني قصته أنه فيه لورد بنى العش
لزوجته وماتت وهو انتحر وباقي أرواحهم داخل العش 
.
هذي تحت صورة الانثى، معليش على الجوده، من بعيد مصورينها علشان ما تخاف وتطير وهي مصابه. كنت شايلتها علشان النمل ما ياكلونها وهي حيه ، بس ارتاحت دقايق وأخذت غفوة وطارت زي الفل 
.
weaver bird ischerzo
.
DSC_0130.png
.
 في الصوره أعلاه يقول “كم منزل في الأرض يألفه الفتى          وحنينه أبدا ً لأول منزل” يقصد الي طيحوه الدرباويه قبل 
.
.
..
1
..
..
DSC_0238
ما صورت الورد في الحوش لأن فيه حوسه بس صورت المجموعه الي قطفتها علشان أجففها وأستخدمها في تزيين المفكره لأن الدفعه الي قبل خلصت
..
بس هذا كل شيء.. فيه طيور ما صورتها زي الهدهد والعصفور البني العادي، والبوم والصقر والخفاش، كل هذي الطيور متواجده باستمرار بس ما ألحق أصورها للأسف، لو لحقت عليها بنزلها في الانستا عموما ً .. طائر الطنان نزلت له مقطع فيديو قصير في الانستا وهو يلعب في المويه أو يتروش
.
1

Fairy garden ~ حديقة الجنيّات

أخيرا ً !! ❤😭😭😭😭
.
fairy garden ischerzo 1
.
من 4 سنوات أو أكثر أبغى أسوي حديقة الجنيات وأحطها عالشباك…
حديقة الجنيّات Fairy Garden شيء يسوونه الناس من الأزل في الحدايق وأحيانا ً يكون داخل البيت .. 
.
بعض الناس يؤمنون بالجنيات وبعضهم يكتفون بمجرد أنه من اللطيف انهم يصنعون حديقه أو حتى قريه للجنيّات ..
أغلب المهتمين في هالفكره هم الناس الي أصلا ً يحبون الحاجات الصغيرة ( المصغّراتMiniature
.
أهل الـMiniature هم ناس يصنعون حاجات صغيره، مثلاً بيوت فيها أثاث صغير وبالأدوات الي فيه كامله وحتى المفارش تكون من القماش، الأرضيات تكون خشب واللمبات تشتغل فعلا ً والستاير ممكن في بعض الحالات تنفتح وتتسكر والشبابيك نفس الشيء ..
.
بالنسبه لي أنا مهتمه بالمصغرات وسبق سويت نماذج صغيره غير ناجحه لحديقه أو حوش أو غرفه داخل علب معدنيه أصغر من راحة اليد.. مثل هذا وأصغر منه كمان ( يجيب فرط حركه شنيع علشان كذا وقفته )
.
fairygarden miniature
.
حديقة الجنيات حجمها يعتمد على الحوض أو المساحه الي عندك.. أنا أبغى أحطها عالشباك برا غرفتي لأن فيه مساحه كافيه.. حافة الشباك فيها مساحه بارزه مثل الرف..
منظر الحديقه هناك بيكون حلو أولا ًَ، وبيعجب العصافير ثانيا ً 😍
.
وبهالمساحه حاطه لهم حوضين مويه برا حديقة الجنيات، واحد لهم وواحد للنحل 
**النحل يجون عند الشباك برضو لأني حطيت ورد ابيض ريحته تشبه العسل
ويحبون يتحممون ويشربون إذا حصلوا حوض صغير ما يغرقون فيه، ينفع تحطون صدفه مقلوبه وفيها مويه بس ارفعوها عن الأرض بسدادة فلين أو شيء يرفعها شوي..
.
بعض الأشخاص يحبون يحطون مجسمات مصغره لكائنات حيه، أرانب ومن هالكلام.. بس أنا أشوف انها تخالف الفكره
الجنيات ما عندهم أصلا ً سناجب وأرانب بحجمهم، فيه فرق بين المصغرات وحديقة الجنيات..
.
حديقتي تنقصها جنيّه صغيره تكون جالسه عالحافه، بس للأسف أغلب الي حصلتها في أمازون حجمها كبير بالنسبه للحوض ومقاس البيت والمدخل.. لسى أبحث .. كمان كنت أبغى أثاث خارجي زي كراسي ومظله مصنوعه من اوراق الشجر بس ما توفرت الأغراض عندنا في المكتبات..
.
.
.
يمكن أحد يقول ( العصافير ما دروا عنك )
أنا أقول انهم دروا عني .. يعرفون ان فيه أحد بالغرفه يحط لهم مويه وأكل وألعاب وورد.. ومره من المرات لقيت واحد من العصافير يصيح عند الشباك ويخبط علشان ما حطيت مويه..
أنا مهتمه بالبيئه الخارجيه لشباك غرفتي، لأني جربت أكسب ثقة العصافير في فتره من الفترات
صاروا فعلا ً يلعبون عند الشباك أغلب الوقت، ويحتمون فيها وقت المطر، ويتسبحون في المويه الي حطيتها لهم..
وإذا شغلت أليكسا على اذاعه وبصوت عالي يجون يتلقفون يسمعون ويشوفون وش السالفه..
أنواع العصافير في المنطقه منوعه وجميله ومن ضمنها الطنّان ( طائر صغيير ومنقاره مثل الابره يحب يشرب من الورد زي النحل ) 
هذا الطائر مبسوط عند الشباك لأني صنعت له مرجيحه صغيره وزينتها بأوراق شجر وورد أحمر لأن الطنان يحب اللون الأحمر.. شفته يتمرجح عليها 4 مرات وذاب قلبي حرفيا ً 😭😭💔 شيء صغيييير يلعب.
ما صورته طبعا ً، لأن اوز الزفت يستقوي عليه ويخوفه لما يشوفه أصغر منه .. في الأخير اشتريت لأوز لعبه تخوفه علشان ينشغل فيها ويترك العصافير في حالهم، إن شاء الله أقدر أصور الطنان يتمرجح قريب 🙏
.
budgie
.
^ قامط أم العافيه ومتخبي ورا المرايه، أحسن.. ناس ماتمشي إلا بقلة الحيا ..
.
نجي لصور الحديقه الي سويتها وكم ملاحظه عليها 
.
fairygarden 1
fairygarden lights
.
⭐ الكريستالات عالمدخل وعالعمود الي بأقصى اليمين علشان تعكس نور الشمس وينتبهون لها ويجون..
كمان تسوي قوس قزح <– بذيتينا بقوسك
⭐ قبل فتره كان فيه إطلاق تجريبي لحديقة الجنيات 😂😂😂 سويت واحد مبسط مره وأي كلام، بس علشان أشوف بيعجبهم ولا لا، لأن مافيه شيء يفيدهم أو يقدرون يسوونه فيه..
تفاجأت أن الفضول ذابحهم ، يوقفون عنده ويميلون راسهم ويحاولون يقربون منه بحذر، بعد دقايق صاروا وسطه يستكشفون..
⭐ اللمبات الي حطيتها ماراح يستفيدون منها في النهار وماراح أشغلها في الليل وأبتلش بالحشرات.. بس كذا عجبتني قلت أسويها مالي صلاح..
.
⭐ هذا الشكل لحديقة الجنيات يعتبر بسيط جدا ً، في النت لو تبحثون تشوفون أشكال عظيمه وناس موهوبين فعلا ً..
⭐ المكونات كلها حجر وتراب والباقي لمخيلتك تبدع فيها.. أمي ساعدتني كثير وأعطتني أدوات وخامات..
اختي تقول لون المدخل حق البيت مفروض من فوق يكون أحمر وفيه نقشات بيضاء علشان يصير فطر عادي..
بس ما أبغى أستخدم ألوان الاكريليك الحين علشان ريحتها قويه وبعد شوي بنام..
.
.
.