الأصوات المحيطية كبيئة مناسبة للقراءة والاسترخاء

.
 الحاجات الي أبغى أكتب عنها ومقاطع الفيديو الي راح أعرضها ممكن تشوفون في عناوينها يكتبون كلمة ASMR
بس مو هذا الشيء الي أبغى أوصله من تدوينتي أبدا ً!
أنا أتكلم عن نوع آخر من المقاطع لكن بالفتره الأخيره صار هالمصطلح يرتز في أي شيء يكون الغرض منه الاسترخاء، مع العلم أنه غلط وماله علاقه. بكتب السبب باختصار
.
ASMR تطلق على المقاطع الي تعطي المشاهد نوع من الارتياح أو الرضى، مثلا ً بنت تمشط شعر بنت ثانيه، يحطون الأصوات بحيث يسمعها المشاهد كأن الفرشاه تمشط شعره هو.. مثلا ً واحد يعمل مساج لفروة رأس شخص آخر، أو مساج للجسم ومن هالكلام ..
وفيه ناس مدري وش جوهم يحسون بالراحه على مقاطع فيها أصوات أحد يمضغ أكل !! أو يحرك شفايفه ويطلع أصوات ببراطمه
.
بس إجمالا ً فيه انحرافات في هالمصطلح لأنه يرمز أصلا ً لحاجات ممكن تندرج تحت تصنيفات سيئه.
تقدرون تطلعون على معاني وشرح المصطلح بأنفسكم في الانترنت. ما بجيب هالخياس لمدونتي احتراما ً للقراء.
.
Ambience2
 
.
أرجع لسالفتي الأساسية الآن بعد ما أبريت ذمتي 😗 
.
وقت القراءة أو الانشغال بشيء في مكان واحد تحتاج تشغل لك شيء تسمعه. بس أحيانا ً تكون محتاج تركيز فما تبغى تسمع شيء فيه كلام أو زحمه.
فيه مصطلح اسمه ( الاصوات المحيطية ) طالعين فيه ناس كثير في قنوات اليوتيوب 😍
يحطون لك فكره معينه يدخلونك جوّها.
.
مثلا ً يحطون لك زاوية تصوير من مقهى ، تشوف الناس ماشيه وتسمع صوت ناس تتكلم بهدوء على شوية أصوات أواني، وأصوات أقدام الناس الرايحه والجايه بعض الأحيان يدخلون موسيقى جاز على خفيف أو بيانو.
بشكل يخليك تحس انك موجود هناك. وما تكون صاخبه ومزعجه.
فيه أفكار وأماكن كثير مصورينها ومسجلينها
.
مره من المرات كنت أبحث وطلعت لي قناه يوتيوب مسوين مقاطع أصوات محيطيه بثيمات تشبه ألعاب الفيديو والأفلام، مثلا ً هاري بوتر وهوبيت وملك الخواتم وغيرها. يجيب لك صوره مكان من أماكن هالأفلام وأصوات، تدخل جو وتسترخي وانت تشوف البيئه تتغير، مرات يكون فيه مطر وبعد شوي الشمس تشرق. مقاطعهم تكون طويله مثلا ً 3 ساعات، بس الغرض منها مو انك تتابعها طول هالوقت!
بس شغلها واسترخي أو اشتغل أو اقرأ. فيه ناس يستخدمونها يتخلصون من الأرق والقلق والاكتئاب.
.
بحط رابط قناة أعجبتني وصرت أعتمد مقاطعها كثير إذا كنت أبغى أقرأ في جو هادي بدون ما أحس بالنعاس. 
بس قبلها بحط مقطعين أعجبتني من قنوات أخرى 
.
هنا حاطين كوخ من فيلم هاري بوتر. يبدأ المقطع من الفجر بدري على نفس الزاويه في المطبخ ..
والشمس تشرق ولو واصلت لآخر المقطع بتلاقي ان الشمس طلعت وصار قبل الظهر تقريبا ً. منظر حلو ومريح 😭❤
.
.
.
المقطع الي بعده من فيلم هاري بوتر برضو <– big fan 😬
لغرفة غريفندور، قدام المدفئة والجو برا ممطر وفترة مساء. صوت المطر معروف انه يهدئ ويساعد الي عندهم أرق بعد.
.
.
الحين جاء وقت القناه العظيمه الي سحرتني !
يحطون ثيمات وأجواء غريبه ومميزه، مثلا ً متجر جرعات (potion) زي الي في العصور القديمه.
أو سفينة قراصنه وقت عاصفه ، أو نزل قديم أو مكتبه بطراز قديم وفخم.
.
اسم القناه The Guild of Ambience – ( رابط القناة )
.
.
أقدّر جهودهم كثير، عمل راقي وفكره عبقريه وشغلهم متقن 
شفت قنوات كثير تسوي هالشيء بس هالقناه شغلهم متقن ومزبوط 
جربوا المره الجايه تشغلونها وقت الرسم أو الكتابه أو القراءة أو الأعمال اليدويه
أو حتى لو متبطحين تتفرجون عالسقف وتفكرون في شيء تسوونه.
.
.

Wonder 2017

 

هذا الفيلم من انتاج عام 2017
وتمثيل
جوليا روبرتس وأوين ويلسون الي أول مره أشوفه في فيلم عاقل ما يجيب للمتابعين جلطه ..

( imdb )
غير أنه مبني على روايه، برضو قصته حقيقية. فيه طفل فعلا ً ولد بهذي المتلازمه واشتهرت قصته

الفيلم يحكي قصة الولد هذا وكيف لما قرروا أهله يرسلونه المدرسه الحقيقيه بعد ما كانوا يدرّسونه في البيت
الأب كان معارض لأنه عارف أن ولده بيتعرض للتنمر علشان شكله، والأم كانت تبغاه يشوف العالم ويتعرف عالناس

أتساءل لو الأطفال فعلا ً وصلوا لهالمستويات من المراعاه والفهم؟ شيء طيب يعني
الفيلم عجبني وفيه تركيز على قيمة العائله وهالشيء صحيح.. لما تكون العائله متماسكه يكون الواحد أقوى قدام المجتمع والتجارب

Lion

 
 
هذا الفيلم من انتاج 2016..
 

 
الي يبغى قلبه يتعصر من موجات المشاعر القويه يتفرج هالفيلم
مبني على  قصه حقيقيه  وبآخر الفيلم يجيبون مقطع للشخصيات الحقيقيه 
وهي قضيه جديّه وحسب كلامهم بآخر الفيلم أنهم يبذلون جهود لحل مشكلة الأطفال الي يضيعون في شوارع الهند
وعددهم يتجاوز 80 ألف طفل كل سنه..
 
 مع أني أكره الأفلام الحزينه لكن تابعت هالفيلم لسببين ، لأن وحده وصتني أشوفه ولأن أغلب المشاعر الي فيه مب حزينه
لكن المشاعر الحلوه الي بين بعض الشخصيات وكيف أن شخص في آخر الأرض ما يعرفك ولا تعرفه يكوّن معاك رابطه بهالشكل بدون شروط ولأهداف نبيله 
برضو تأثرت يوم تخيلت شعور هالطفل وهو ضايع، صح اني أكره الأطفال بهالجيل بس هالطفل فيه ظرافه وأدب مب طبيعيين 
ما يستاهل كذا وما أستوعب كيف الناس أوغاد كذا في بعض الدول، ياخي طفل عمره 5 سنوات ضايع وماحد يفكر يساعده 
 

 
استمتعوا بالمشاهده، شوفوه لحالكم علشان ما تكبتون المشاعر ويجيكم قولون عصبي 
أنا مسويه شديده وأتفرج بعز الظهر وباب الغرفه مفتوح وكل شوي أحد داخل، اختنقت
جاني شلل مشاعر شنيع

Psycho

 

والده متوفى، أما والدته فكانت امرأة متطلبه جدا ً، ولسنوات عديدة عاش الاثنان وكأنهما الوحيدين في هذا العالم.. 
بالتالي، إذا شعر بأي انجذاب قوي لأي امرأة أخرى فإن جانب أمه قد يصبح جامحا ً 
——————————————————-العبارة الأخيره في فيلم الرعب “Psycho” عام 1960..

الفيلم له 3 أجزاء، عن “نورمان بيتس” الولد الكويس المتعلق في أمه بشكل غريب، أمه شخصيتها متطلبه ومتعلقه كثير
والأب توفى من فترة طويله وعلشان كذا علاقة الأم والولد أصبحت بهذا الشكل..
الولد وأمه يديرون فندق على طريق سريع، وورا الفندق البيت الي يسكنون فيه.. 

(الفندق عاليمين تحت، والبيت فوق عاليسار)

بالنسبه لي ما أعتقد أن الفيلم مرعب بالطريقه الي تعودنا عليها، الرعب هنا هو الصدمه الي نحس فيها
ووجود شيء أو شخص مجهول يسوي حاجات وما ندري مين هو ومتى يطلع، هنا يصير رعب وترقب..

(نورمان بيتس) الشخصية الرئيسية السايكو والمسكين في نفس الوقت
بالنسبه له أفضل صديق لأي شخص هو أمه.. بس بنفس الوقت يخاف منها وما يقدر يعيش حياته بسببها..

 



عام 2013 بدأ مسلسل جديد باسم ( Bates Motel ) في نفس البيت والفندق 💀



يحكي عن الأحداث الي قبل الفيلم، الظروف والمواقف الي أدت لتكون شخصية نورمان السايكو الي بالفلم
وعن علاقته بأمه كيف كانت لأن بالفيلم مو موضحين هالشيء، وفي هالمسلسل أضافوا نوع 
من العاطفه في القصه، بنهاية المسلسل تلاقي نفسك تعاطفت مع السايكو كثير ومع أمه ..
برضو في المسلسل تعمدوا يغيرون شوي علشان الناس الي شايفين الفيلم ما يصيرون عارفين كل شيء بيصير..


عدد المواسم 5 وكل موسم 10 حلقات..
بعض الحلقات بتكون ممله إذا كنت مو فاهم قصة الفيلم وما تدري وش يبغون يوصلون له..
أنا شفت الأفلام قبل علشان كذا استمتعت بالمسلسل..

     
 

الشخصيات كثير في هذا المسلسل على عكس الفيلم كان التركيز فيه على نورمان ..
لكن ماراح أذكر إلا هالثلاث..

نورمان بيتس
الممثل يستاهل جوائز غير منتهيه على تمثيله..  ما عمري انبهرت بتمثيل شخص زي هالآدمي في هالمسلسل..
جد أهنّيه على هالتمثيل، كأنها شخصيته فعلا ً، بس يوم شفت له مقابلات انصدمت أن شخصيته الحقيقية مختلفه كليا ً..
في المسلسل نورمان عمره 17 سنه ( في الفيلم عمره 21 تقريبا ً )
هو ولد لطيف ومراعي للناس الي حوله، يبغى يكون اجتماعي ويتعرف على الناس بس أمه نوعا ً ما تقمعه، وفي المسلسل يظهر لنا السبب..

 نورما بيتس ، غريبه فكرة أنها تسمي ولدها اسم قريب لاسمها 👀 
في المسلسل حسيتها هي المجنونه، بس عانت في حياتها كثير ومب ناقصه ولدها يقعد ينق ويتدلع..
ما تظهر جوانب شخصيتها بوضوح في المواسم الأولى، كنت أكرهها وأشمئز منها بس بعدين صارت تقطع قلبي..

ديلان ، ابن نورما من زوجها الأول، عمره تقريبا ً 21.. يسمي أمه باسمها نورما، ما يعيش معهم لكن مستفزته علاقة نورمان وأمه
دايم يقول علاقتكم مريبه ولازم تعطون بعض مساحه وتتعرفون على ناس ثانيين..
 لحد ما صار موقف معين وعرف سبب إلحاح الأم على البقاء مع نورمان بهالشكل..




 ملاحظتين 
– المسلسل مأخوذ من رواية بنفس الاسم والروايه أساسا ً مأخوذه عن قصة حقيقية حصلت عام 1957 ..
– الفيلم والمسلسل كلهم فيهم لقطات جدا ً خايسه للأسف، كنت متردده أكتب عن الفيلم والمسلسل بس لأن القصه كانت حلوه
المهم يعني انتبهوا..


كنت مجهزه أكتب رأيي ولقطات عن المسلسل بس خفت أحد باقي يتابع وأحرق 😦 

 

Moana 2016

 .
 .
شفت هالفيلم قبل كم يوم، جميل ويعطي إحساس بجمال الحريه والمغامرة..
جبت روابط التحميل وملف الترجمة وإعلان الفيلم
مع أني ما شفت الاعلان قبل ما أشوف الفيلم، وما أحب أصلا ً أعرف أي شيء عن الفيلم قبل ما أشوفه
لأنه يخرب عليك حاجات كثير..
 .
 ~ إعلان الفيلم – Trailer ~ 
.
.
.

 

 ~ الروابط – Links ~ 
روابط الفيلم تورنت، بجودتين – Torrent only 
 .
.
She is as cool as the ocean 
 .
.
 
~ مشاهده ممتعة ~ Enjoy watching ~