مقارنه بسيطه wordpress.com vs wordpress.org

Untitled-4
.
مدونتي كانت تمر بمشاكل كثيره في الفترة الي راحت
والمتابعين انحذفوا عن طريق الخطأ ما حذفت ولا بلكت أحد والله 
.
كنت أجرب شيء والحمد لله ان هالتجربه صارت من بدري وأنا رايقه لها وكنت حاطه ببالي انها تجربه قد تفشل.
بس أبي أوضح أن الناس صارت تستهين في تظليل بعض، عن طريق اعطاء مشوره أو نصيحه عن شيء معين
يكون بناء على تجربه طبعا ً، بس يغفلون السلبيات في الأمر لأن لهم عائد مادي لو أحد جاء عن طريقهم.
.
لك نسبه هاائله ممكن تكسبها لو سجل أحد في الاستضافه الفلانيه من رابط أنت أعطيته اياه.
علشان كذا ما صار فيه مصداقيه في النت، أغلب المواقع صارت تتبع هالطريقه وتدفع لناس تمدحهم.. وتلقى شخص عنده متابعين يروح يمدح لهم موقع أو شيء هو جربه بنفسه لكن يغفل السلبيات الي ممكن هو ما واجهها شخصيا ً بس هي موجوده وتحصل لأي شخص..
أنا مو ضد الكسب بهالطريقه عليهم بالعافيه، وأبدا ً أبدا ً مافيها شيء ولا ذره غلط
 لكن لاحد يخبي على الناس علشان يعبي جيوبه، ذكر السلبيات والايجابيات بكل صراحه ما بيضرك.. فيه ناس ما عندها مانع مع السلبيات المذكوره بس تبغى تحسب حسابها فقط..
.
.
بذكر بشكل بسيط الفرق بين wordpress.com و wordpress.org
wordpress.com هو الموقع الي يعطيك مدونه مجانيه أو تختار خطه حسب رغبتك تدفع رسومها وكل خطه لها مميزات أعلى من الي قبلها حسب استخدامك وحاجاتك..
عيب الموقع انك ما تقدر تعدل بحرية على قوالب الموقع ولا تقدر تحط إضافات كثيره.. لكن الحمايه مشموله في الموقع.. بالنسبه لي مافيه عيب إلا هذا ومن زماان كنت منبطحه في بلوجر لهذا السبب ..
الدعم الفني موجود للخطط المدفوعه، ممكن تتواصل معهم بمحادثة مباشره .. أو عن طريق الايميل أو عن طريق منتدى الدعم..
لو اشتركت في الخطه الثالثه Business، بتقدر تركب ثيمات واضافات على كيفك وفيه حريه كبيره.. لكن سعرها 25 دولار بالشهر، والدفع يكون لسنه كامله.. أدري ان الموضوع يستحق وفيه ناس بتقول انه مبلغ بسيط، بس ذكرت هالشيء لأن فيه ناس ميزانيتهم ما تسمح أو ما يبغون يرتبطون بشيء كبير..
 .
wordpress.org هذا ووردبرس نفسه بس انت تشيله معاك وتدبر نفسك تختار موقع استضافه تحط فيه قراشعك، ماراح أذكر أمثله للاستضافه لأني جربت واحد وتجربتي معاه ما كانت ساره..
ايش ميزة org؟ حريييه تااامه، كذا أبغى وسط مدونتي واحد يكنس <– كف
يعني الثيمات تغيرها على كيف أهلك، html و css والثيمات مفتوحه لك كلها مجانيه وأكثر من الي في .com.. الاضافات كثير بشكل يخوف، تنوع رهيب..
لكن، زي ما قلت، انت تدبر لك الاستضافه، والأهم من كل هذا انت تدبر لك حمايه وتدبر الدعم الفني والنسخ الاحتياطي وكل شيء ..
.
قالوا لي أنه أرخص الواحد يدفع مبلغ الاستضافه الرخيص ( 3 دولار في الشهر في بعض المواقع ) وياخذ حريته الكامله..
بس دققوا فيها، ممكن الواحد يقدر يخارج نفسه ويسد ثغرات ويشتغل بنفسه، بس مو للأبد.. مصيره يحتاج إضافة حمايه على الأقل.. وأسعارها غاليه فعلا ً.. بالمقابل wordpress.com لو دفعت الخطه الأخيره 25 دولار في الشهر مشموله الحمايه مع حرية في التنسيق والاضافات بيكون منطقي وآمن أكثر..
.
لو أحد ناوي على استضافه يتواصل معي وأقول له اسم الاستضافه الي تعاملت معها وطلعت سيئه جدا ً.. لأن الكل يوصي عليها ويمدحها وممكن الواحد يتوهق لو سمع كلامهم، الناس يمدحونها ويسوون لها شرح لأنه لو أحد سجل فيها عن طريقك يوصله مبلغ جامد، أكيد عاد بيمدحونها ويتغزلون بعد.. والمشكله يذكرون لك سلبيات قال لك مصداقيه، وتشوف السلبيات تلقاها عاديه ماحد عنده مشكله معها مثلا ً مافيه دعم فني يتحدثون العربيه ! .. يقنعون القارئ ان مافيه سلبيات.
.
.
.

 

موقع عُلّمنا + فكرة “شُجيرة الورد”

هذي اول تدوينه لي على ووردبرس بعد ما شلت عفشي من بلوجر
بحاول أصير كفو وأتقبل التغيير زي ما تقبلت ويندوز 10 مع أن 7 كان شغال تمام معي..
  
.
قبل كل شيء هذا موقع ظريف للي يحبون النوع التحفيزي والتوجيهي من الكتب والمقالات ( علمنا )
أنا وقفت قراءة هالنوع من الكتب من 10 سنوات تقريبا ً.. بس لفت انتباهي بهالموقع مقالتين 
واحده منها جات في الصميم وأنا أفكر في موضوع معين شاغل عقلي..
.
.

مؤخرا ً أنا فقدت اهتمامي بكمية ضخمه من الهوايات دفعة وحده وبدون سبب واضح.. ماصرت أسوي شيء..

بس علشان ينفهم قصدي بـ(كمية ضخمه) وينفهم مصطلح ( شجيرة الورد) راح أكتب بعض هالهوايات والنشاطات  

– الكتب الي كنت أقرأها وقفتها في أي سطر وأي صفحه بنص سالفه
– الأفلام الي حاشره لابتوبي سحبت عليها كلها، بعضها شفت ربعها أو نصها كمحاوله اني أندمج وأكمل..
– الرياضه برضو، سيفون جامد
– الأنمي من فتره طويله ما تابعته (مع أن فيه بعضها مب مكتمل ونفسي أعرف وش صار)
– التلفزيون الي كان يعتبر بالنسبه لي نشاط ممتع لما أجلس مع أمي
– الاهتمام بصحتي وأكلي وقفته <– كان عندي تجربه أسويها لنظام غذائي يصنع المعجزات حسب الي قريته
– كنت في نص تعلم لغة جديده غير الانجليزيه، وقفتها بوسط الكورس
– تدوينات كثير كنت ناويه أكتبها وسحبت
– ألعاب فيديو فلتّها بالنص ما كملتها 
– نباتاتي الي عالشباك راحوا فيها أيام البرد والحين الجو مناسب أحط لها مواد وخرابيط تساعدها بس ماتحركت..
 
 
^ هذا كله ما يجي ربع الحوسه الي كانت بعقلي
وهالأسبوع كنت زعلانه وأقول ليش أنا كذا كسلانه ما أسوي شيء (حرفيا ً ولا شيء)؟ ورحت أشوف هالمقاله الي بهالموقع
وكانت تتكلم عن هذا الشيء بشكل خاص 
 
باختصار، الآدمي “ترافيس دوميرت” يقول أن حياتنا زي شجرة الورد، والأفكار زي براعم الورد الي تطلع بهالشجرة..
ومعروف أن شجرة الورد ما تنترك كذا بدون تقليم وقص، لأنها راح تموت لو تفرعت بكل الاتجاهات
نفس الشيء أفكارنا الفلّه لازم نهدئ من روعها وما نجبر أنفسنا نسويها كلها، استغنى عن بعض أفكارك علشان تنجح 
باقي الأفكار، بدل ما تخسر كل أفكارك..

Hologram Project DIY

مساء الخير
 أكيد مر عليكم في النت هذا الشيء الجميل

هذا بروجكتر مصغّر يعرض صور هولوغرام..
الهولوغرام صوره مجسمه أو ثلاثية أبعاد لشيء معين لكن تكون بالضوء يعني مب محسوسه أو مادّية..
 
جربت وسويتها في البيت قبل سنتين تقريبا ً وكانت ممتعه بشكل لا يوصف، وسهله ما تاخذ وقت أبدا ً..
 
 ♥ الأغراض المطلوبة ♥ 
 قطعة من الورق  ( أي نوع لو ان شاء الله مكبوب عليها شاهي، نحتاجها في البداية فقط لأخذ القياسات )…..
 قلم رصاص ……………………………………………………………………………………………………..
 قلم حبر أو خطاط أو أي شيء يؤدي نفس الغرض……………………………………………………………..
 مسطرة …………………………………………………………………………………………………………..
 لاصق شفاف أو صمغ ( لو فيه صمغ المسدس أحلى وأحلى ) ………………………………………………..
 ملف شفاف الي يحفظ الورق، اشتريته من المكتبه، فيه ناس يستبدلونه بغلاف الـCD بس التعامل معاه صعب
هنا صورة للملف علشان لو ما فهمتوا قصدي ( رابط )
وأخيرا ً تحتاجون جوال D:



نرسم على الورقه هذا الشكل 

 القياسات على الانترنت بعضها غلط ويطلع بعد كل التعب فيه مشكله..

فحطيت لكم مقاساتي لأني سويته كبير شوي..
الضلع الي في أعلى المثلث طوله 1 سم 
الخط العمودي المتقطع الي في النص طوله 3.8 سم تقريبا ً
قاعدة المثلث الي تحت طولها 6 سم
الضلعين الي على اليمين واليسار مفترض يطلع معاكم 4.5 سم..
 
بعد ما نرسمها نقص الشكل 
ونحطه فوق الغلاف الشفاف المقوّى الي عندنا، ونرسم عليه بالقلم الخطاط هالشكل 4 مرات ونقصها..
ليش قلت خطاط؟ علشان الغلاف الشفاف يزلق وما نقدر نكتب عليه بالرصاص، يعني اختاروا أي شيء تكتبون فيه عادي
بالأخير بتمسحونه بمنديل ويروح.. والورقه البيضاء الي رسمنا عليها بالرصاص ممكن نرميها خلاص بعد ما نقص القطع الأربعة..

نبدأ نلصق القطع الأربعة في بعض مثل هالشكل:

يصير بعدها فراغ بين آخر قطعتين علشان نلصقهم بنلاحظ أننا نحتاج نقوّسه بحيث يصير شكل هرمي كذا :

 
تمام؟ من تحت فتحه مربعه وياحبذا تكون متساويه يعني مب زاويه طالعه وزاويه داخله، لأننا نبغاه يوقف بنفسه..
 
خلصنا ، نفتح على الجوال هالرابط مثلا ً ( هنا )
أو نكتب في اليوتيوب hologram pyramid 3d video
نحط الجوال على سطح ثابت ونحط البروجكتر الي سويناه في منتصف الشاشه ونشغل المقطع..
 
 
هذا الفيديو صورته اليوم ومعليش على الرعاش وأنا أصور، جالسه أصور في وضع غبي وزاويه مدري وش الي حادني عليها..
استمتعوا ♥

Galaxy in a Jar

الفضاوه خلتني أتحمس وأجرب هذا الشيء

ماعليكم من الأيدي الملوثه 😂 ماتروح بسهوله وما خطر ببالي ألبس قفازات قبل ما أبدأ الشغل..
 الأدوات المطلوبة  قطن – ألوان طعام (أزرق وأحمر أو زهري ) – مويه – جليتر سواء كان صمغ أو بودره..
وطبعا ً العلب الصغيره مره وتكون لها سداده أو غطاء فلين بنّي ، أنا اخترت هذي لأني كنت أبغاها كبيره..
 الطريقه موجوده في الفيديو 
كنت أبغى أصور لكم الطريقه بنفسي، لكن البرد يجيب كسل ، المهم استمتعوا ~ ♥
ابحثوا في النت وبتحصلون أشكال وألوان أخرى ممكن تعجبكم أكثر..
فيه مدونه من المدونات الي أتابعها عملت هالطريقه قبل فتره طويله وكنت أبغى أحط لكم شرحها لأنه مرتب وواضح
لكن ماحصلتها للأسف..

انتهت الاختبارات

 
^
من الصوره واضح إني أبحث عن شمس وأحتاج أطلع أتمشى في الطبيعه
فيه أحد ملاحظ أن بلوجر حاطين ايموجي أخيرا ً؟ 😆
طبعا ً مب ذاك الزود لأنها نفس الي بالجوال، بس تعتبر شيء  ✨
الحمد لله انتهت اختباراتي على خير (الثلاثاء الي راح) ..
 منتظره النتيجه، يقولون بعد 10 أيام تطلع..
إذا طلعت النتيجه بدون قلة حيا مفروض أكون خريجه خلاص إن شاء الله
المهم، رجعت إنسانه فاضيه مثل الأيام الي كنت أسوي فيها رمزيات أنمي 😂
وكنت أكتب تقارير <– أم الجو الي عايشته
أبدأ الحين أشوف القائمة الي كتبتها لـ”بعد التخرج”
إن شاء الله أقدر أشطب عليها كلها
الي عندهم اختبارات الحين، الله يوفقكم وييسر لكم ❤

الجيل القديم / يا نائم في القبر طبت نعيما أنزلك ربي في عظيم جناته

 4 – 4 – 2004 
تاريخ وفاة جدتي الله يرحمها..
اليوم فكرت فيها وكيف أن علاقتنا أنا وأخواني معها كانت رسميه لأننا ما كنا نشوفها إلا مره أو مرتين بالسنه
وكنا صغار نبغى نلعب وبس، ما كنا ندري لأي حد كانت تحبنا..
وفكرّت في المثل الي يقول ( ما أعز من الولد إلا ولد الولد ) ودايم أشوف الجدات يعشقون أحفادهم..
لأي حد كانت تحبنا وما كنا دارين ولا نهتم لأننا صغار..
أتمنى لو أعيد الزمن وأجلس معها، كنت بكتب مذكرات حياتها وأقدّرها أكثر وأنا أسمعها منها مباشرة.. 
كانت أرمله في عمر مبكر وعيالها وبناتها كانوا صغار..
في وقت كانت الأحوال الماديه صعبه جدا ً، ماتت عليها بنت بسبب المرض وفي نصف الليل مافي دكتور ولا مستشفيات 
إلا في قرية ثانيه..
أفكر في شعور جدتي وهي تفقد بنتها وما تقدر تصلح شيء لها..
بالنسبه لنا هذي سالفه عابره حزينه، بالنسبه لهم  في هذاك الوقت أكيد اسودت الدنيا في عيونهم..
لما توفت جدتي الله يرحمها وقبل ما أعرف عن الخبر كنت غايبه عن المدرسه ومبسوطه لحالي..
دخل أبوي البيت مع أنه بالعاده ما يرجع إلا بعد الظهر، ودخل غرفته غير ملابسه وطلع من الغرفه ومعاه شنطة سفر صغيره..
وبعدين انتبه اني موجوده وغايبه، قال لي “بسافر لأن جده توفت”..  ومشى  <– أبوي يسميها "جده" لما يكلمنا عنها..
للآن أتذكر الشعور الي حسيت فيه.. الصراحه، وقتها حسيت انها راحت وماحسينا بوجودها كـ”جده”..
كنا مقصرين جدا ً
الي عندهم جدات وأجداد على قيد الحياه، لا تزعلون من حركاتهم لو كانوا استقعاديين، وعيشوا شعور أنكم تكونون أحفاد..
والي عندهم أجداد وجدات أموات الله يرحمهم ، سواء لحقتوا عليهم أو لا، لا تستحقرون أي صدقه تسوونها وتنوونها باسمهم..
لو ان شاء الله الأكل والمويه الي تحطونه للعصافير والطيور في الحوش..
العوائل المحتاجه والعمال المحتاجين مع دخول فصل الشتاء، وأغلبهم من بلدان ما يعرفون البرد أبد..
ترى أهالينا مشغولين ومكروفين وينسون كثير، مفروض احنا نتصدق عنهم وعن والديهم..
علشان نحصل أحد يتصدق علينا لما نفطس..
^
هذا مب بلوق حزين ترى، عادي بس أحرك أناملي الميبسه بعد المذاكره