subscription boxes

3
.
من عام 2004 تقريبا ً، ظهرت “هبّه” تجاريه فكرتها عباره عن اشتراك مثل اشتراك المجلات والجرايد
بس يكون شهري وعباره عن صندوق بداخله بضائع تكون لها نمط “ثيم” معين 
المشترك ما يعرف محتويات الصندوق بالتحديد، تكون مفاجأه يعني.
لكن يعرف عدد القطع أو الأغراض، يعرف عن ايش تتمحور لأنه يختار الاشتراك حسب الثيم الي يبغاه
مثلا ً بضائع تجميليهبضائع أنيميشنبضائع لمحبي الكتبمحبين الزراعه إلخ.. 
.
الصناديق الحين أصبحت متنوعه بشكل كبير ومشهوره، أمثله على أفكار المواقع الي ممكن تشترك فيها :
أنواع صابون – عينات شاي فخمه – أنواع فريده وفخمه من القهوه – أدوات تفيد الكتّاب/المؤلفين –  منظمات الوقت – أعمال يدويه – فيري جاردن ..
.
1
.
أفضل موقع بالنسبه لي، اشتريت منه صندوق واحد، بدون اشتراك يعني، بعض المواقع تسمح انك تشتري صندوق الشهر هذا وخلاص، بدون اشتراك وتجديد..
الموقع ماخذ نمط الكتب، خاصة الخيالية وتصنيف الـYoung Adult ..
.
.
يرتبون الأغراض بطريقه حلوه، كل صندوق يحتوي من بين الأغراض على كتاب أو روايه غالبا ً تكون توها نازله.. وبعض المرات يكون كتاب بإصدار حصري.. والأهم بالنسبه لي انه Hardcover .. أحب الغلاف يكون صلب، شكله يكون أكشخ ..
.
5
.
هذي محتويات الصندوق
.
2.png
.
.
الكتاب يكون آخر شيء في الصندوق، ويكون داخل كيس قماش أسود فيه شعار الموقع، يحطون معه بوستر وفاصل كتب ثاني، وبطاقه ( السوداء الي في الصوره الي تحت ) فيها رمز، تقدر تدخله وتحصل رفيق القراءة الخاصه بك .. حلوه الحركه..
.
.
4.png
.
هنا (في الصوره الي تحت) الأغراض بشكل أوضح.. الشيء الي عاليمين أعلى الصوره قاعدة كوب فيها اقتباس من كتاب.. العلبه الي عليها قلعه من برا هذي باث بومب..
العلبه السوداء الدائريه فيها مقشر شفايف ريحته حلوه.. البوستر أو اللوحه الي فيها بنت هي ثيم الشهر، ومن ورا مكتوب محتويات الصندوق بالتفصيل.. المغلف الأسود الي مكتوب عليه wake up شاهي  
.
 6.png
.
.
..
قائمة ببعض الصناديق أو الاشتراكات
اضغط الصوره الخاصه بكل اشتراك علشان يفتح الموقع الخاص فيه، وترى فيه مئات الاشتراكات غيرها
.
.
loot crate 
lootcrate ischerzo.png
لوت كريت موقع كبير فيه أنواع متعدده من الصناديق، فيه اشتراك خاص لمسلسلات أو أفلام معروفه مثل Marvel أو اشتراك خاص بـ Harry potter
ممكن للألعاب، Fallout والنكد حق نهاية العالم..
ممكن بشكل عام تختار اشتراك ألعاب أو أنمي أو تخليه عام هم يجمعون كل شيء على بعضه ..
.
هذي قائمة الخيارات في موقع Lootcrate 
.
 loot crate.png
.
مب كل مواقع الاشتراكات تكون فيها خيارات.. بعض المواقع توفر ثيم واحد وخلاص..
مثل موقع Fairyloot الي اشتركت فيه وشفتوا الصور في أول التدوينه ..
.
.
.
Fairyloot
كل شهر ثيم، مثلا ً الشهر الي اشتركت فيه كان اسمه Save the kingdom .. 
fairyloot may 2018.png
.
.
.
Japan Crate
 ( صندوق حلويات يابانيه ) 
japan crate.png
.
.
.
Birchbox
اشتراك لمحبين الأدوات التجميلية
Birchbox.png
.
.
.
Bomibox
اشتراك أدوات تجميلية وعناية بالبشرة من كوريا 
bomibox.png
.
.
.
Noobie box
اشتراك للحوامل والأمهات الجدد
noobie box ischerzo.png
.
.
.
هذا اشتراك غريب وأحسه حلو.. اشتراك لجرائم..
يوصلك صندوق كأنه أغراض المجرم وأدله ضده، وانت تحاول تحل الغموض، فيه مجتمع كامل لهالاشتراك
تتواصل معهم
hunt a killer.png
بس مب أي أحد يقبلونه، وما يصلح لضعاف القلوب .. 
.
.
.
.
وأخيرا ً هذي 3 مواقع برضو للكتب، بعضها فانتزي وبعضها لا 
.

الأصوات المحيطية كبيئة مناسبة للقراءة والاسترخاء

.
 الحاجات الي أبغى أكتب عنها ومقاطع الفيديو الي راح أعرضها ممكن تشوفون في عناوينها يكتبون كلمة ASMR
بس مو هذا الشيء الي أبغى أوصله من تدوينتي أبدا ً!
أنا أتكلم عن نوع آخر من المقاطع لكن بالفتره الأخيره صار هالمصطلح يرتز في أي شيء يكون الغرض منه الاسترخاء، مع العلم أنه غلط وماله علاقه. بكتب السبب باختصار
.
ASMR تطلق على المقاطع الي تعطي المشاهد نوع من الارتياح أو الرضى، مثلا ً بنت تمشط شعر بنت ثانيه، يحطون الأصوات بحيث يسمعها المشاهد كأن الفرشاه تمشط شعره هو.. مثلا ً واحد يعمل مساج لفروة رأس شخص آخر، أو مساج للجسم ومن هالكلام ..
وفيه ناس مدري وش جوهم يحسون بالراحه على مقاطع فيها أصوات أحد يمضغ أكل !! أو يحرك شفايفه ويطلع أصوات ببراطمه
.
بس إجمالا ً فيه انحرافات في هالمصطلح لأنه يرمز أصلا ً لحاجات ممكن تندرج تحت تصنيفات سيئه.
تقدرون تطلعون على معاني وشرح المصطلح بأنفسكم في الانترنت. ما بجيب هالخياس لمدونتي احتراما ً للقراء.
.
Ambience2
 
.
أرجع لسالفتي الأساسية الآن بعد ما أبريت ذمتي 😗 
.
وقت القراءة أو الانشغال بشيء في مكان واحد تحتاج تشغل لك شيء تسمعه. بس أحيانا ً تكون محتاج تركيز فما تبغى تسمع شيء فيه كلام أو زحمه.
فيه مصطلح اسمه ( الاصوات المحيطية ) طالعين فيه ناس كثير في قنوات اليوتيوب 😍
يحطون لك فكره معينه يدخلونك جوّها.
.
مثلا ً يحطون لك زاوية تصوير من مقهى ، تشوف الناس ماشيه وتسمع صوت ناس تتكلم بهدوء على شوية أصوات أواني، وأصوات أقدام الناس الرايحه والجايه بعض الأحيان يدخلون موسيقى جاز على خفيف أو بيانو.
بشكل يخليك تحس انك موجود هناك. وما تكون صاخبه ومزعجه.
فيه أفكار وأماكن كثير مصورينها ومسجلينها
.
مره من المرات كنت أبحث وطلعت لي قناه يوتيوب مسوين مقاطع أصوات محيطيه بثيمات تشبه ألعاب الفيديو والأفلام، مثلا ً هاري بوتر وهوبيت وملك الخواتم وغيرها. يجيب لك صوره مكان من أماكن هالأفلام وأصوات، تدخل جو وتسترخي وانت تشوف البيئه تتغير، مرات يكون فيه مطر وبعد شوي الشمس تشرق. مقاطعهم تكون طويله مثلا ً 3 ساعات، بس الغرض منها مو انك تتابعها طول هالوقت!
بس شغلها واسترخي أو اشتغل أو اقرأ. فيه ناس يستخدمونها يتخلصون من الأرق والقلق والاكتئاب.
.
بحط رابط قناة أعجبتني وصرت أعتمد مقاطعها كثير إذا كنت أبغى أقرأ في جو هادي بدون ما أحس بالنعاس. 
بس قبلها بحط مقطعين أعجبتني من قنوات أخرى 
.
هنا حاطين كوخ من فيلم هاري بوتر. يبدأ المقطع من الفجر بدري على نفس الزاويه في المطبخ ..
والشمس تشرق ولو واصلت لآخر المقطع بتلاقي ان الشمس طلعت وصار قبل الظهر تقريبا ً. منظر حلو ومريح 😭❤
.
.
.
المقطع الي بعده من فيلم هاري بوتر برضو <– big fan 😬
لغرفة غريفندور، قدام المدفئة والجو برا ممطر وفترة مساء. صوت المطر معروف انه يهدئ ويساعد الي عندهم أرق بعد.
.
.
الحين جاء وقت القناه العظيمه الي سحرتني !
يحطون ثيمات وأجواء غريبه ومميزه، مثلا ً متجر جرعات (potion) زي الي في العصور القديمه.
أو سفينة قراصنه وقت عاصفه ، أو نزل قديم أو مكتبه بطراز قديم وفخم.
.
اسم القناه The Guild of Ambience – ( رابط القناة )
.
.
أقدّر جهودهم كثير، عمل راقي وفكره عبقريه وشغلهم متقن 
شفت قنوات كثير تسوي هالشيء بس هالقناه شغلهم متقن ومزبوط 
جربوا المره الجايه تشغلونها وقت الرسم أو الكتابه أو القراءة أو الأعمال اليدويه
أو حتى لو متبطحين تتفرجون عالسقف وتفكرون في شيء تسوونه.
.
.

Fairy garden ~ حديقة الجنيّات

أخيرا ً !! ❤😭😭😭😭
.
fairy garden ischerzo 1
.
من 4 سنوات أو أكثر أبغى أسوي حديقة الجنيات وأحطها عالشباك…
حديقة الجنيّات Fairy Garden شيء يسوونه الناس من الأزل في الحدايق وأحيانا ً يكون داخل البيت .. 
.
بعض الناس يؤمنون بالجنيات وبعضهم يكتفون بمجرد أنه من اللطيف انهم يصنعون حديقه أو حتى قريه للجنيّات ..
أغلب المهتمين في هالفكره هم الناس الي أصلا ً يحبون الحاجات الصغيرة ( المصغّراتMiniature
.
أهل الـMiniature هم ناس يصنعون حاجات صغيره، مثلاً بيوت فيها أثاث صغير وبالأدوات الي فيه كامله وحتى المفارش تكون من القماش، الأرضيات تكون خشب واللمبات تشتغل فعلا ً والستاير ممكن في بعض الحالات تنفتح وتتسكر والشبابيك نفس الشيء ..
.
بالنسبه لي أنا مهتمه بالمصغرات وسبق سويت نماذج صغيره غير ناجحه لحديقه أو حوش أو غرفه داخل علب معدنيه أصغر من راحة اليد.. مثل هذا وأصغر منه كمان ( يجيب فرط حركه شنيع علشان كذا وقفته )
.
fairygarden miniature
.
حديقة الجنيات حجمها يعتمد على الحوض أو المساحه الي عندك.. أنا أبغى أحطها عالشباك برا غرفتي لأن فيه مساحه كافيه.. حافة الشباك فيها مساحه بارزه مثل الرف..
منظر الحديقه هناك بيكون حلو أولا ًَ، وبيعجب العصافير ثانيا ً 😍
.
وبهالمساحه حاطه لهم حوضين مويه برا حديقة الجنيات، واحد لهم وواحد للنحل 
**النحل يجون عند الشباك برضو لأني حطيت ورد ابيض ريحته تشبه العسل
ويحبون يتحممون ويشربون إذا حصلوا حوض صغير ما يغرقون فيه، ينفع تحطون صدفه مقلوبه وفيها مويه بس ارفعوها عن الأرض بسدادة فلين أو شيء يرفعها شوي..
.
بعض الأشخاص يحبون يحطون مجسمات مصغره لكائنات حيه، أرانب ومن هالكلام.. بس أنا أشوف انها تخالف الفكره
الجنيات ما عندهم أصلا ً سناجب وأرانب بحجمهم، فيه فرق بين المصغرات وحديقة الجنيات..
.
حديقتي تنقصها جنيّه صغيره تكون جالسه عالحافه، بس للأسف أغلب الي حصلتها في أمازون حجمها كبير بالنسبه للحوض ومقاس البيت والمدخل.. لسى أبحث .. كمان كنت أبغى أثاث خارجي زي كراسي ومظله مصنوعه من اوراق الشجر بس ما توفرت الأغراض عندنا في المكتبات..
.
.
.
يمكن أحد يقول ( العصافير ما دروا عنك )
أنا أقول انهم دروا عني .. يعرفون ان فيه أحد بالغرفه يحط لهم مويه وأكل وألعاب وورد.. ومره من المرات لقيت واحد من العصافير يصيح عند الشباك ويخبط علشان ما حطيت مويه..
أنا مهتمه بالبيئه الخارجيه لشباك غرفتي، لأني جربت أكسب ثقة العصافير في فتره من الفترات
صاروا فعلا ً يلعبون عند الشباك أغلب الوقت، ويحتمون فيها وقت المطر، ويتسبحون في المويه الي حطيتها لهم..
وإذا شغلت أليكسا على اذاعه وبصوت عالي يجون يتلقفون يسمعون ويشوفون وش السالفه..
أنواع العصافير في المنطقه منوعه وجميله ومن ضمنها الطنّان ( طائر صغيير ومنقاره مثل الابره يحب يشرب من الورد زي النحل ) 
هذا الطائر مبسوط عند الشباك لأني صنعت له مرجيحه صغيره وزينتها بأوراق شجر وورد أحمر لأن الطنان يحب اللون الأحمر.. شفته يتمرجح عليها 4 مرات وذاب قلبي حرفيا ً 😭😭💔 شيء صغيييير يلعب.
ما صورته طبعا ً، لأن اوز الزفت يستقوي عليه ويخوفه لما يشوفه أصغر منه .. في الأخير اشتريت لأوز لعبه تخوفه علشان ينشغل فيها ويترك العصافير في حالهم، إن شاء الله أقدر أصور الطنان يتمرجح قريب 🙏
.
budgie
.
^ قامط أم العافيه ومتخبي ورا المرايه، أحسن.. ناس ماتمشي إلا بقلة الحيا ..
.
نجي لصور الحديقه الي سويتها وكم ملاحظه عليها 
.
fairygarden 1
fairygarden lights
.
⭐ الكريستالات عالمدخل وعالعمود الي بأقصى اليمين علشان تعكس نور الشمس وينتبهون لها ويجون..
كمان تسوي قوس قزح <– بذيتينا بقوسك
⭐ قبل فتره كان فيه إطلاق تجريبي لحديقة الجنيات 😂😂😂 سويت واحد مبسط مره وأي كلام، بس علشان أشوف بيعجبهم ولا لا، لأن مافيه شيء يفيدهم أو يقدرون يسوونه فيه..
تفاجأت أن الفضول ذابحهم ، يوقفون عنده ويميلون راسهم ويحاولون يقربون منه بحذر، بعد دقايق صاروا وسطه يستكشفون..
⭐ اللمبات الي حطيتها ماراح يستفيدون منها في النهار وماراح أشغلها في الليل وأبتلش بالحشرات.. بس كذا عجبتني قلت أسويها مالي صلاح..
.
⭐ هذا الشكل لحديقة الجنيات يعتبر بسيط جدا ً، في النت لو تبحثون تشوفون أشكال عظيمه وناس موهوبين فعلا ً..
⭐ المكونات كلها حجر وتراب والباقي لمخيلتك تبدع فيها.. أمي ساعدتني كثير وأعطتني أدوات وخامات..
اختي تقول لون المدخل حق البيت مفروض من فوق يكون أحمر وفيه نقشات بيضاء علشان يصير فطر عادي..
بس ما أبغى أستخدم ألوان الاكريليك الحين علشان ريحتها قويه وبعد شوي بنام..
.
.
.

Fill your room with rainbows

Fill your room with rainbow
 .
دققتوا من قبل في الشعور الي تحسون فيه إذا شفتوا قوس قزح؟
تحسون أنه شيء من عالم ثاني.. مع أنه شيء ماله فايده ولا أعتقد أنه يساعد في التوازن البيئي ولا يسوي شيء
بس مع ذلك أشوفه نعمه كبيره من ربي.. 
  .
  .
قبل رمضان عام 2017 لقيت كريستالات من ثريّا المدخل كانت مكسوره ومنثوره على الأرض
وأمي تدعي عالعمال الي كانوا يشيلون أثاث وكسروها، تقول (الله يكسر ضلوعهم) <- دعوات مقتبسه من قاموس دعوات جدتي، وهو قاموس لا يمزح بأي شكل من الأشكال *قشعريره* لا تنخدعون بلطف الدعوه السابقه، هذي ولا شيء 
  .
أخذت الكريستالات الي لسى سليمه وعلقتها على شباك غرفتي علشان لما تشرق الشمس من جهة غرفتي أشوف قوس قزح في الغرفه كلها 😎
 .
للأسف كان عباره عن نقط صغيره ومع أنه حلو وعجبني لكن كنت أبغى كريستالات أكبر ..
طلبت أمي أشيل كريستالات كبيره من الثريا المكسوره، أعطتني تحذير ما يمزح، فقررت أبحث بمكان ثاني
 .
في الأخير بعد سنه كامله من البحث حصلت على 4 كريستالات كبيره وعلقتها في سلسله بخرزات وحطيت وحده منها على الشباك علشان أجربها .. هذا شكل الكريستالات:
.
.fill your room with rainbow 3fill your room with rainbow 5
,
الصباح التالي كان مبهج بشكل لا يوصف، أعجز عن وصفه، وسعادتي توصل للقمه كل ما أتذكره..
صحيت من النوم لقيت في كل جدران الغرفه وعلى السقف وفي كل مكان ألوان قوس قزح
يا الله كيف شيء بسيييط زي كذا ينعش الروح ويعطي دفى وراحه !!
.
.
.
بعدين تذكرت اني مره قرأت أن الكريستالات يستخدمونها الي يؤمنون بمبدأ طاقة المكان
لأنها ترفعها بشكل كبير..
.
قوس القزح من أنقى وأجمل الأمور في الحياه، لاحظوا أنه ظاهره تدخل السعاده في قلب أي شخص..
أكره كيف انه صار شعار للمثليين، وش العلاقه بين المثليين وقوس القزح؟ احتكار شيء من الطبيعه علشان يمثل فئه معينه شيء تافه..
 .

 

DIY room decor



 ~ صباح الخير ~ 

 
أخيرا ً حصلت فرصه اشتغل على هالتدوينه علشان أشرح طريقة صناعة زينة للغرفه..
الفكره معروفه في الانترنت ومب من اختراعي لكن التزيين الي داخلها يختلف من شخص لشخص..
 
( بعد ما خلصت تدوين وجيت أراجع يمين بالله حسيت باتمان الي كاتب وشارح التدوينه، وش هالكآبه !! *موسيقى باتمان* )
 
في يوم من أيام الخريف وأنا أطل من الشباك شفت شجرة في حوشنا متحمسه وناثره أوراقها ولونها كان برتقالي مشع مع الشمس..

جذبني ونزلت أجمعها

 بس ما كنت أدري وش أسوي فيها فقررت أسوي الشكل الهندسي هذا علشان ألمّها فيه .

 
** التصوير فيه إعاقه في الأبعاد، تصوير اكسبيريا إكس زد فيه هالحركه ويقصدون أن لها فايده في تصوير الأماكن البعيده، ولها حل بسيط بس ما كنت أعرف الحل وقت التصوير ..
هذا الشكل الهندسي تقدرون تشترونه من برا لو تبغون..
بس أنا أعترض عالأسعار الي عندنا، مره دخلت محل ولقيت قطعه سحرتني وجيت أشوف السعر لقيته 200 ريال ! 
لو أتسوق من هالأماكن مرتين بس باضطر أبيع كليتي علشان أزبط غرفتي، رجعتها مكانها وقلت أحسن أصلا ً عادي أعرف أسوي زيها..
 
  : الأدوات – you’ll need :  
 

 
مسطره – عيدان الشوي (الشواء) – قلم علشان نحدد المقاسات على العيدان الخشبيه – صمغ مسدس 
– ألوان أكريليك أو بخاخ باللون الي تبونه مثلا ً ذهبي أو أسود أو أبيض – مقص أو شيء حاد نقطع فيه الأعواد..
 
Ruler – BBQ sticks – Marker or pen – glue gun – acrylic colors or spray paint – something to cut 
the wooden sticks 
 
ويستحسن يكون فيه سفره أو كيس نشتغل فوقه، اليوم مكتبي راح فيها وتخدش وتبقع بالألوان <– فين عقلك؟
 
 
 
 
               ………………              
 

 
نقص الأعواد الخشبيه إلى 6 قطع بمقاس 6 سنتيمتر <– تقدرون تغيرون عادي
نقص أعواد مره ثانيه إلى 6 قطع اخرى بمقاس 8 سنتيمتر 
نقص برضو مره ثالثه 6 قطع بمقاس 5 سنتيمتر 
وباقي 6 قطع أخيره تقريبا ً مقاس 15 بس ممكن تخلونها للأخير وتشوفون الحجم النهائي لو تبغونه أطول أو أقصر من فوق..
 
 

 
لصقوا الأعواد الي مقاسهم 6 سم مع بعض بهالشكل السداسي، والي مقاسهم 8 لصقوهم في شكل سداسي آخر منفصل..
الي مقاسهم 5 سم نتركهم على جنب للخطوه الجايه..
 
 

نجيب السداسي الصغير أبو 6 سم ونبدأ نلصق عليه الأعواد الي مقاسها 5 سم بهالشكل الي بالصوره..
حاولوا ما تكون واقفه بشكل قائم ، خلوها مايله لبرا شوي علشان يركب عليها السداسي الكبير من فوق..
لا تشيلون هم أنها تكون دقيقه 100% شوفوا حوستي شلون، بس إذا صمغتوا الجزء الي فوق راح تتجمع شوي ..
 
 

يفترض بعد ما نلصق السداسي العلوي فوق الأعمده نحصل على هالشكل ..
 
نقص 6 قطع أخيره من الأعواد، كل واحد منها طوله 15 سم أو ممكن تختارون الي يناسبكم..
بس يستحسن يكون مدبب من فوق زي الي في الصوره، بس لو مو متوفر مب مشكله..

 
علشان نركب الأعمده الأخيره الي مقاسها 15سم وتكون متوازنه نبدأ نركب كل عمودين متقابلين سوا
زي الصوره الي عاليسار اخترت زاويتين متقابله وبدأت أوازنها، وكملت الباقي بنفس الطريقه 
لحد ما كملت الشكل ( الصوره الي عاليمين )
** you can use spray paint to color them or acrylic colors which is easier for me
and use your imagination to create your own touch..
 
نرشها بالبخاخ برا البيت بهالبرد ونتركها تجف أو نلونها بألوان الاكريليك أو أي ألوان مناسبه..
القديم الي سويته من فتره كان لونه ذهبي وحطيت فيه أوراق شجر جافه برتقاليه واضاءه صغيره بالبطاريه ووزعتهم ..
 
الثاني لونته أسود وحطيت فيه أحجار وشمعه ونبته صغيره، ينفع هالشيء للي يبغى يسوي له مكان مريح نفسيا ً 

سواء للاسترخاء أو حتى لو منظر للعرابجه الي ما يسترخون ..

وممكن تقسمونها من النص يعني تصير نصفين متطابقين وتعلقونها عالجدار ( زي كذا

تقدرون تشوفون أن شغلي زي وجهي وفيه أخطاء بالذات في الأسود لأني سويته وأنا مستعجله ومعصبه %^#&^%بس ما يبان مع التزيين ، وبرضو بالامكان تجنب الكوارث والعمل في بيئه مسالمه ومريحه *تلكم الجدار* 

عاد أكيد بتطلع معكم أفكار حسب غرف نومكم وألوانها وثيماتها وكل شيء..
أتمنى ما يكون شرحي الي يجيب المرض والتصوير المريع مانع لكم أنكم تجربون 😁

Easy Caramel Macchiato recipe – طريقة مختصره لمشروب الكراميل مَكياتو

 

من زمااان قلت ( أبي أنزل وصفاتي السهله ) <– أقلد صوتي يوم قلتها 

👇💖 English version is available, scroll down a bit
..I know this isn’t a healthy recipe, but it’s easy and gives you the sweet taste of caramel 

 
هذي الطريقه ابتكرتها بنفسي في عصرية كنت أشتهي هالمشروب ومالي نفس أروح مقهى..
فشلت 700 مرة وبعدين ضبطت <– يعنني قصة نجاح زي كنتاكي
 
الطريقه طويله بس أنا جبت لكم الفيرجن المختصر السهل، وهالمشروب يدفي بشكل يخوف..
بعد ما أشربه أقوم أرمي الجاكيتات والبطانيات وأطفي المكيف ..
لكن أحتاج أنبه أنه مب صحي أبدا ً.. ممكن المرات الجايه أبدأ أنزل أشياء أفضل من هالناحيه
 
 الأغراض الّي تحتاجونها – You’ll Need 
 
حليب سائل لأن البودره يخرب الطعم
قرفه لو حابين للزينه 
بالاضافه إلى المكونات الي بهالصوره 

Milk, I prefer avoiding the powder milk..
Nescafe Gold, if you have another brand it’s fine, but honestly I tried a few brands and they weren’t the same.
Vanilla flavor , you can use liquid or powder..
Toffee or caramel syrup..
whipped cream ..
cinnamon if you like ..
 
** نسكافيه جولد طعمه أفضل من العادي بس العادي يمشي الحال مب مشكله
** بودرة الفانيليا تؤدي الغرض بدل السائله الي بالصوره
 
 
 
 الطريقه  
 
في كوب نحط ملعقة مليانه نسكافيه ونضيف عليها موية مغليه، أقل من ربع الكوب ( فيه صوره تحت توضح المقدار )

نضيف عليها ملعقة صغيره من الفانيليا + ملعقتين صغيره شراب التوفي أو الكاراميل ونحرك..

لا تضيفون الفانيليا والتوفي قبل لا تضيفون المويه المغليه ويذوب النسكافيه تماما ً..

 
Put 1 teaspoon of coffee (Nescafe) in your mug, add boiled water to fill only 1/4 the mug (see picture below).
Now add 1 ts vanilla flavor and 2 ts caramel syrup. and stir, you don’t want  to add the vanilla or caramel before the boiled water, they’ll be very hard to mix ..


في كوب ثاني يكون مناسب للمايكرويف نسخن الحليب، كمية الحليب تعادل 3 أرباع الكوب الي بتسوون فيه المشروب..

لازم يكون حار فعلا ً، أنا أحطه 50 ثانيه بس يختلف الوقت حسب الكمية وحجم الكوب..

In another mug (microwave-safe), add 3/4 milk and heat for around 50 seconds if your mug is aroundthe size of mine ( picture below) 

نصب الحليب على النسكافيه والفانيليا والكراميل..
بعدين نزينها بالكريمه ( الكريمه الي بالصوره فوق آخر وحده عاليسار ) ونرش عليها قرفه.. وبس هذي هي..

Add the milk to the previous mug with the Nescafe in it. Then add the whipped cream on top.
you can decorate it with cinnamon or caramel syrup.. That’s it..
 
صوره توضيحيه لمقدار المويه والحليب في الكوب الي استخدمته وهو يعتبر صغير نوعا ً ما..

السبب الي خلاني أنزل هالطريقه بقوله في أحد التدوينات الي بنزلها قريب في الأيام القادمه أو الأسابيع القادمه..
بالعافيه على قلوبكم

Hologram Project DIY

مساء الخير
 أكيد مر عليكم في النت هذا الشيء الجميل

هذا بروجكتر مصغّر يعرض صور هولوغرام..
الهولوغرام صوره مجسمه أو ثلاثية أبعاد لشيء معين لكن تكون بالضوء يعني مب محسوسه أو مادّية..
 
جربت وسويتها في البيت قبل سنتين تقريبا ً وكانت ممتعه بشكل لا يوصف، وسهله ما تاخذ وقت أبدا ً..
 
 ♥ الأغراض المطلوبة ♥ 
 قطعة من الورق  ( أي نوع لو ان شاء الله مكبوب عليها شاهي، نحتاجها في البداية فقط لأخذ القياسات )…..
 قلم رصاص ……………………………………………………………………………………………………..
 قلم حبر أو خطاط أو أي شيء يؤدي نفس الغرض……………………………………………………………..
 مسطرة …………………………………………………………………………………………………………..
 لاصق شفاف أو صمغ ( لو فيه صمغ المسدس أحلى وأحلى ) ………………………………………………..
 ملف شفاف الي يحفظ الورق، اشتريته من المكتبه، فيه ناس يستبدلونه بغلاف الـCD بس التعامل معاه صعب
هنا صورة للملف علشان لو ما فهمتوا قصدي ( رابط )
وأخيرا ً تحتاجون جوال D:



نرسم على الورقه هذا الشكل 

 القياسات على الانترنت بعضها غلط ويطلع بعد كل التعب فيه مشكله..

فحطيت لكم مقاساتي لأني سويته كبير شوي..
الضلع الي في أعلى المثلث طوله 1 سم 
الخط العمودي المتقطع الي في النص طوله 3.8 سم تقريبا ً
قاعدة المثلث الي تحت طولها 6 سم
الضلعين الي على اليمين واليسار مفترض يطلع معاكم 4.5 سم..
 
بعد ما نرسمها نقص الشكل 
ونحطه فوق الغلاف الشفاف المقوّى الي عندنا، ونرسم عليه بالقلم الخطاط هالشكل 4 مرات ونقصها..
ليش قلت خطاط؟ علشان الغلاف الشفاف يزلق وما نقدر نكتب عليه بالرصاص، يعني اختاروا أي شيء تكتبون فيه عادي
بالأخير بتمسحونه بمنديل ويروح.. والورقه البيضاء الي رسمنا عليها بالرصاص ممكن نرميها خلاص بعد ما نقص القطع الأربعة..

نبدأ نلصق القطع الأربعة في بعض مثل هالشكل:

يصير بعدها فراغ بين آخر قطعتين علشان نلصقهم بنلاحظ أننا نحتاج نقوّسه بحيث يصير شكل هرمي كذا :

 
تمام؟ من تحت فتحه مربعه وياحبذا تكون متساويه يعني مب زاويه طالعه وزاويه داخله، لأننا نبغاه يوقف بنفسه..
 
خلصنا ، نفتح على الجوال هالرابط مثلا ً ( هنا )
أو نكتب في اليوتيوب hologram pyramid 3d video
نحط الجوال على سطح ثابت ونحط البروجكتر الي سويناه في منتصف الشاشه ونشغل المقطع..
 
 
هذا الفيديو صورته اليوم ومعليش على الرعاش وأنا أصور، جالسه أصور في وضع غبي وزاويه مدري وش الي حادني عليها..
استمتعوا ♥