Red Queen series

انتهيت من قراءة سلسلة روايات Red Queen، كانت تجربه ممتعه مع أني طفشت وأنا أنتظر الكتاب الأخير ينزل.. السلسلة كانت اقتراح من صديقتي يونا وكالعاده أستمتع بتوصياتها.

redqueen
.
اسم السلسله Red Queen
عدد الكتب 4 + كتاب فيه قصتين قصيره عن شخصيتين من شخصيات الروايه
الكاتبه Victoria Aveyard
.
أحداث السلسله في عالم وزمن مختلف، البشر فيه منهم نوعين، ناس لون دمهم أحمر وهم عاديين مثلنا، وناس دمهم فضي وهذولا النشبه عندهم قدرات خارقه، هذا الشيء أعطاهم سلطه وأفضليه على الحُمر، وصاروا أسياد العالم، هم الجنس السائد، هم الملوك وهم العوائل النبيله وعيال العز.. الحمر كلهم خدم وكادحين ويستعبدونهم يصنعون ويشتغلون وينتجون علشان اقتصاد البلد يمشي وعلشان الفضيين الزفت ماعمرهم بيسوون لأنفسهم ملابس أو بيوت أو أكل.. القانون في بلد نورتا ( الي تبدأ فيه الأحداث ) أن كل شاب أو شابه يوصل عمره 18 سنه ينضم للجيش اجباري، ويشارك في الحرب القائمه بين نورتا وبلد مجاور.. الفضيين يشاركون في الحرب لكن في مراكز بعيده عن الخطر، على أساس ما ننزل لهالمستوى ..
.
الناس الحرفيين اذا وصلوا عمر 18 سنه ما ينضمون للجيش، يظلون يخدمون البلد بالحرف والتجاره وهالخرابيط.. 
بطلة القصه مير بنت من أصحاب الدم الأحمر، أحوالهم ماشيه عالحافه، اختها الصغيره خياطه وماشيه بشغلها يعني ماراح يجندونها، أما أخوانها الثلاث كلهم تجندوا، كل سنه كان يطلع من البيت واحد منهم، يترك لأخواته هديه عباره عن حلق للاذن، مير تاخذ فرده وأختها تاخذ الفرده الثانيه.
الأب رجعوه من الحرب قبل سنوات وهو شبه ميت، نجى من الموت لكنه مقعد وخسر ساقه على ما أظن، ورئته كانت مصابه ويستخدم جهاز يساعده على التنفس.. كان شخص مكسور ومحطم تماما ً..
مير على خلاف اختها ماعندها أي مهارات ولا سالفه، تطلع الشارع تسرق من الناس بدون ما يلاحظون، تدبر لأهلها الي تقدر عليه من أكل أو فلوس، تحاول تكون ذات قيمه بس.. هي عارفه انها بعد كم شهر بيصير عمرها 18 وتتجند وتلحق أخوانها للحرب.
الحياه في نظرها بس كذا .. لكن في يوم من الأيام تغير كل شيء في حياتها
أعز صديق لها من طفولتها والي كانت تدافع عنه دايم وتمون معاه وتقضي أغلب وقتها معه اسمه كيلورن، أبوه وأمه ماتوا في الحرب من طفولته، وصار تلميذ لصياد سمك عجوز، يصيد معاه وبهذا الشكل ماراح يضطر يتجند لأنه أصلا ً ضعيف وأهبل وعلى نياته، ومير كانت مرتاحه أن كيلورن ماراح يتجند.  ( الي بالأحمر تقريبا ً حرق بالنسبه للبعض )
 في يوم من الأيام صار حادث للصياد العجوز ومات، ونتيجه لهذا الشيء كيلورن بيتجند
ومن هذي النقطه تقرر مير تمنع هذا الشيء وتحمي كيلورن مهما حصل، حتى لو اضطرت تهرب معاه من البلد وتصير مطلوبه
قالت له ( اترك الموضوع عليّ )  وراحت تحاول تجيب حل
كنت أحسب أن القصه بتكون كذا، بس حصل تغيير جذري في القصه، ماصارت السالفه انها تحاول تساعد كيلورن وبس..
فجأه كل الموازين في البلد تغيرت، حتى الفضيين شملتهم الأحداث، وهي وصلت لنقطه ما تقدر تتراجع عنها لأن مصيرها ومصير عائلتها تغير وصار فيه ارتباط بين مصيرها ومصير الأمير وأخوه.
.
ما كنت ملاحظه تطور الشخصيات في القصه لحد ما نبهتني يونا عليه.. البطله مير كنت أشوفها في الكتاب الأول شخصيه قويه وعندها مبدأ التضحيه ومستعده تساعد أصحاب الدم الأحمر بالي تقدر عليه.. بس يونا قالت لي انتظري تشوفين الكتاب الثاني وبتكرهينها 
في الكتابين الثالث والثاني كانت شخصيتها مو مستقره أبدا ً، صح صارت لها أحداث بس كانت فعلا زي ما قالت يونا، تبالغ في الدراما، تبالغ في التمسكن والاستضعاف وأنا مسكينه أنا حياتي بايخه ومن هالكلام..
هذا الشيء خلاني ألاحظ كيف رجعت تتغير شخصيتها في الكتاب الأخير وصارت فعلا ً انسانه مرت بتجارب وعرفت أن الناس عندهم مشاكل ودراما أكبر من مشاكلها أو مثلها، ناس يشاركونها الألم والمعاناه بس يحاولون يغيرون الوضع مب متسدحين.. 
.
ممتنه للمؤلفه انها ما خلتنا نتألم كثير على الشخصيات، مع أن واحده من الشخصيات الي كنت أحس وجودها مهم ماتت وهذا الشيء كان صدمه بس كان واقعي للأمانه، يعني الأحداث كلها جامده وهم في مواقف صعبه، بتكون القصه طفوليه لو كل هالأكشن صار وماحد مات 
بس ما أحسها من المؤلفين الي يبغونا نبكي ونتأزم طول القصه، ما كان فيه نكد وحركات بعض المؤلفين الي يكتبون القصص وأحسهم يقولون ( ابكوووا، انغبنوا وتنكدوا )
فيكتوريا منفتحه في حاجات كثير وواضح انها انسانه متسامحه مع الاختلافات كثير ، الأديان، المعتقدات، الألوان، الجنس، وطبعا ً لازم تقوم تدخل سوالف المثليين في القصه (في الكتاب الثالث فجعتنا ودخلت السالفه) ، هي ما عندها مشكله مع أي فئه في الحياه، علشان كذا شفت انها محبوبه إلى حد ما، وكسبت جماهير كثير، خاصه أن الشخصيه الي هي خلتها مثليه لها أصلا ً فانز كثير يعني مب شخصيه مهمله أو ثانويه
.
.
السرد في الكتابين الأول والثاني يكون على لسان مير
في الكتابين الثالث والرابع يكون كل فصل فيه اسم لواحده من الشخصيات تحت رقم الفصل، تكون القصه مسروده من منظور هذي الشخصيه ، وهذا الشيء ممتع جدا ً، كنت أستمتع في فصول بعض الشخصيات أكثر من غيرها، كلامهم مع أنفسهم ونظرتهم للي حواليهم تضحك أحيانا ً، وتعطيك برضو فكره أكبر عن الي يصير من وجهات نظر مختلفه
.
انتقادي الوحيد على القصه ويمكن بالنسبه للبعض يعتبر عادي، بس الشخصيات صغار في السن، 17-18 سنه، بالكثير 20..
أحداث القصه فيها حاجات أكبر من عمرهم وعادي صملوا فيها.
.
الي ما قرأ الكتاب خلاص مب لازم يقرأ الباقي ( الباقي حرق شديد للعمود الفقري تبع القصه بالكامل لحد النهايه )
، هذا تقييمي للشخصيات بعد ما خلصت ويمكن يخرب عليكم. حلو الواحد يكون وجهات نظره عن الشخصيات بدون أحكام مسبقه
..
لحد الآن ما أعتقد ان فيه شخصيه أقدر أقول أنها مفضله لي، يمكن أكثر شيء حسيتهم مثيرين للاعجاب وصاملين ومبادئهم حلوه هم شيد وفارلي، فيه شخصيات زي كاميرون أحس روحهم عاليه جدا ً.. الأمير وأخوه ودي أمسك روسهم وأصكها ببعض أشغلونا وكل ما قلت هذا طلع عاقل يطلع أخس من أخوه. ورعان
.
بالنسبه لشخصية كال، كنت أشوف شخصيته مراعيه ومتعاطفه وبنفس الوقت قويه، حسبته بيكون شخصيه عظيمه وتستاهل الاعجاب، لكن مع الوقت تبان شخصيته أكثر، مب ناحيه سلبيه جدا ً لكن حسيته نوعا ً ما ضعيف ويائس، ما يعرف يتعامل مع المواقف، ما يقدر يقرر قرار نهائي وهالشيء قالوه في القصه أصلا ً
.
ميفن شيب شعري ورموشي، أصلا ً يوم لقيت فصل في الكتاب الأخير مكتوب تحته ميفن انفجعت، ما أبغى أدخل عقله ولا أعرف في ايش يفكر، وضعه صعب مسكين، يحزن وبنفس الوقت يستفز
.
ومن الأشياء الي حبيتها هو كيف قدرت مير توفر لعائلتها شيء كانوا مستبعدين انهم يحصلون عليه من زمان الي هو الأمل.. مع أنها كانت بدون فايده وناشبه لأهلها بس أقدر فيها حبها للعائله، مشاعرها لهم قويه لدرجه أن الي حواليها برضو صاروا يهتمون
.
.
نبذه عن القصه من البدايه للأخير، حرق جامد كتبته للي ما يبغى يقرأ القصه بس عنده فضول يعرفها ويعرف نهايتها، مع العلم أن فيه أحداث ثانيه تبدأ وتنتهي مع القصه الرئيسيه وتنتهي بس ما كتبت عنها 
.
مير المذكوره أعلاه كانت تدج في الشوارع تسرق، وسرقت فلوس من واحد وقفطها، وحس أن حالتها مره عدم وحاول يساعدها، أعطاها فلوس وعرف اسمها وأعطاها اسمه ومشى، هي كانت منهاره بسبب سالفة كيلورن وسالفه أسوأ منها حصلت بعدها فكان واضح عليها أنها منهاره.. اليوم الي بعده الجنود عند الباب يطلبون مير ويقولون تعالي القصر، أخذوها للقصر ولبسوها ملابس خدم وقالوا فيه أحد توسط لك بوظيفه هنا في القصر، هي فرحت لأنها الحين راح تقدر تصرف على أهلها وماعاد تحتاج تتجند، وعرفت أن الآدمي الي سرقت منه أمس يشتغل في القصر ومكانته عاليه.
في هذاك اليوم كان فيه احتفال كبير يستعرضون فيه بنات النبلاء قوتهم ويتنافسون على لقب معين، الي تفوز فيه تتزوج الأمير. في وسط الحفل سمعت الملك يحيي الحضور باسمه واسم ولده الأمير، وقال اسمه وكان اسم يضحك بالنسبه لمير، جلست تضحك بس يوم شافت الأمير طلع هو الي سرقت منه فلوس الليله السابقه وهو الي وظفها في القصر !
المنافسات الي تقام في الحفل كانت محاطه بمجال كهربائي علشان الحوسه الي تصير تحت في الميدان ما تصيب الجمهور الي هم عائلات نبيله وعيال عز.. صار خطأ ومير زلت وطاحت تحت وكانت عارفه ان المجال الكهربائي راح يحولها لرماد وتنتهي حياتها خلاص، لكن تفاجأت انها ما تأذت أبدا ً، بالعكس طلعت الكهرباء كأنها جزء منها، كأن عندها قدره خارقه زي الباقين مع أن دمها أحمر ..
الملكه والملك تداركوا الموضوع واخذوها وحاولوا يكذبون على الناس، طلبوا من مير تسوي نفسها بنت دمها فضي ومن عائله ماتت في الحرب وعلى أساس كان واحد من الحمر متبنيها وتوهم يكتشفونها الحين، و علشان تكون تحت عيونهم طول الوقت خطبوها لأخو الأمير الي أصغر منه، هو أخوه من الملكه الثانيه. هددوا مير انها لو فضحتهم راح يقتلون أهلها.. مير بالمقابل قالت أبغى ترجعون أخواني للبيت ماعاد يحاربون، وتسقطون التجنيد عن كيلورن. وافق الملك وبدأت مير تعيش في القصر كأنها فضيه وتتعلم كل شيء، كانت عارفه انه في الوقت المناسب راح يقتلونها ويسوون كأنه حادث لأنهم ماراح يضمنونها، فصارت تحاول تلاقي فرصه تهرب، واكتشفت أن فيه جيش ثوري سري في البلد من الحمر نفسهم، وعندهم جواسيس في القصر عباره عن خدم، وقدروا يتواصلون معها ويحاولون يسقطون الحكم..
توصل الأحداث بعيد ويصير الأمير منفي لأن الملكه زوجة أبوه لفقت له تهمه أنه قتل أبوه الملك، كان المفروض يعدمونه هو ومير لكن الثوار ظهروا في الوقت المناسب وانقذوها من الاعدام واضطروا ينقذون الأمير معها ..
عاش الأمير مع الثوار الحمر فتره وبدأ يفهم حقوقهم ومعاناتهم.
صارت أحداث كثير وبعدها اكتشفوا الثوار ان مير مب حاله نادره، هي من الحمر لكن عندها قدرات الفضيين، وهذا الشيء يسمونه الدم الجديد، وفيه كثير مثلها، حاولت تبحث عنهم بمساعدة الثوار وتجندهم ضد الفضيين، الأمير ساعدهم علشان يرجع ياخذ الحكم لأنه هو الوريث. ولأنه واقع في حب مير مو قادر يخليها.
ينظم للثوار ناس من دوله بعيده، يكتشفون فيما بعد أن هذي الدوله أسقطت حكم الفضيين من سنوات وأنهم حاليا ً عايشين بمساواه بين الحمر والفضيين بدرجه ما يحلمون فيها الحمر في نورتا.. البلد الثاني يتعاونون مع الأمير والثوار بحيث يكون هدفهم اسقاط الحكم وتهجيد الفضيين.
في جانب أصحاب الدم الفضي فيه أشخاص ماعندهم مشكله، زي خال الأمير، الي درس التاريخ واكتشف أن الشعوب أصلا ً زمان كانت حمراء وكانوا الفضيين مستعبدين وملعونين.. الأمير كان يبغى يستمر في الحكم ويوفر للحمر حياه شريفه ورواتب، بس الحمر زعلوا وسحبوا الاتفاق بعد ما وصل الأمير لمرحله بعيده في استعادة البلد والحكم.. في وسط الحرب وهو على وشك انه يخسر كان فعلا ً يفكر كيف ان التاج شيء ما يستاهل كل هذي التضحيات، وقرأ رساله من أمه الي ماتت في طفولته ومايذكر عنها شيء، الرساله غيرت فكرته وقرر يحقق فكرة مير والثوار عن دوله يعيشون فيها الحمر والفضيين بمساواه..
.
وبس، لكن لا تتوقعون النبذه هذي معطيه القصه حقها، الكتاب الأخير لحاله فوق 600 صفحه، والسلسله 4 كتب فالقصه مو بهالسطحيه يعني..

subscription boxes

3
.
من عام 2004 تقريبا ً، ظهرت “هبّه” تجاريه فكرتها عباره عن اشتراك مثل اشتراك المجلات والجرايد
بس يكون شهري وعباره عن صندوق بداخله بضائع تكون لها نمط “ثيم” معين 
المشترك ما يعرف محتويات الصندوق بالتحديد، تكون مفاجأه يعني.
لكن يعرف عدد القطع أو الأغراض، يعرف عن ايش تتمحور لأنه يختار الاشتراك حسب الثيم الي يبغاه
مثلا ً بضائع تجميليهبضائع أنيميشنبضائع لمحبي الكتبمحبين الزراعه إلخ.. 
.
الصناديق الحين أصبحت متنوعه بشكل كبير ومشهوره، أمثله على أفكار المواقع الي ممكن تشترك فيها :
أنواع صابون – عينات شاي فخمه – أنواع فريده وفخمه من القهوه – أدوات تفيد الكتّاب/المؤلفين –  منظمات الوقت – أعمال يدويه – فيري جاردن ..
.
1
.
أفضل موقع بالنسبه لي، اشتريت منه صندوق واحد، بدون اشتراك يعني، بعض المواقع تسمح انك تشتري صندوق الشهر هذا وخلاص، بدون اشتراك وتجديد..
الموقع ماخذ نمط الكتب، خاصة الخيالية وتصنيف الـYoung Adult ..
.
.
يرتبون الأغراض بطريقه حلوه، كل صندوق يحتوي من بين الأغراض على كتاب أو روايه غالبا ً تكون توها نازله.. وبعض المرات يكون كتاب بإصدار حصري.. والأهم بالنسبه لي انه Hardcover .. أحب الغلاف يكون صلب، شكله يكون أكشخ ..
.
5
.
هذي محتويات الصندوق
.
2.png
.
.
الكتاب يكون آخر شيء في الصندوق، ويكون داخل كيس قماش أسود فيه شعار الموقع، يحطون معه بوستر وفاصل كتب ثاني، وبطاقه ( السوداء الي في الصوره الي تحت ) فيها رمز، تقدر تدخله وتحصل رفيق القراءة الخاصه بك .. حلوه الحركه..
.
.
4.png
.
هنا (في الصوره الي تحت) الأغراض بشكل أوضح.. الشيء الي عاليمين أعلى الصوره قاعدة كوب فيها اقتباس من كتاب.. العلبه الي عليها قلعه من برا هذي باث بومب..
العلبه السوداء الدائريه فيها مقشر شفايف ريحته حلوه.. البوستر أو اللوحه الي فيها بنت هي ثيم الشهر، ومن ورا مكتوب محتويات الصندوق بالتفصيل.. المغلف الأسود الي مكتوب عليه wake up شاهي  
.
 6.png
.
.
..
قائمة ببعض الصناديق أو الاشتراكات
اضغط الصوره الخاصه بكل اشتراك علشان يفتح الموقع الخاص فيه، وترى فيه مئات الاشتراكات غيرها
.
.
loot crate 
lootcrate ischerzo.png
لوت كريت موقع كبير فيه أنواع متعدده من الصناديق، فيه اشتراك خاص لمسلسلات أو أفلام معروفه مثل Marvel أو اشتراك خاص بـ Harry potter
ممكن للألعاب، Fallout والنكد حق نهاية العالم..
ممكن بشكل عام تختار اشتراك ألعاب أو أنمي أو تخليه عام هم يجمعون كل شيء على بعضه ..
.
هذي قائمة الخيارات في موقع Lootcrate 
.
 loot crate.png
.
مب كل مواقع الاشتراكات تكون فيها خيارات.. بعض المواقع توفر ثيم واحد وخلاص..
مثل موقع Fairyloot الي اشتركت فيه وشفتوا الصور في أول التدوينه ..
.
.
.
Fairyloot
كل شهر ثيم، مثلا ً الشهر الي اشتركت فيه كان اسمه Save the kingdom .. 
fairyloot may 2018.png
.
.
.
Japan Crate
 ( صندوق حلويات يابانيه ) 
japan crate.png
.
.
.
Birchbox
اشتراك لمحبين الأدوات التجميلية
Birchbox.png
.
.
.
Bomibox
اشتراك أدوات تجميلية وعناية بالبشرة من كوريا 
bomibox.png
.
.
.
Noobie box
اشتراك للحوامل والأمهات الجدد
noobie box ischerzo.png
.
.
.
هذا اشتراك غريب وأحسه حلو.. اشتراك لجرائم..
يوصلك صندوق كأنه أغراض المجرم وأدله ضده، وانت تحاول تحل الغموض، فيه مجتمع كامل لهالاشتراك
تتواصل معهم
hunt a killer.png
بس مب أي أحد يقبلونه، وما يصلح لضعاف القلوب .. 
.
.
.
.
وأخيرا ً هذي 3 مواقع برضو للكتب، بعضها فانتزي وبعضها لا 
.

الأصوات المحيطية كبيئة مناسبة للقراءة والاسترخاء

.
 الحاجات الي أبغى أكتب عنها ومقاطع الفيديو الي راح أعرضها ممكن تشوفون في عناوينها يكتبون كلمة ASMR
بس مو هذا الشيء الي أبغى أوصله من تدوينتي أبدا ً!
أنا أتكلم عن نوع آخر من المقاطع لكن بالفتره الأخيره صار هالمصطلح يرتز في أي شيء يكون الغرض منه الاسترخاء، مع العلم أنه غلط وماله علاقه. بكتب السبب باختصار
.
ASMR تطلق على المقاطع الي تعطي المشاهد نوع من الارتياح أو الرضى، مثلا ً بنت تمشط شعر بنت ثانيه، يحطون الأصوات بحيث يسمعها المشاهد كأن الفرشاه تمشط شعره هو.. مثلا ً واحد يعمل مساج لفروة رأس شخص آخر، أو مساج للجسم ومن هالكلام ..
وفيه ناس مدري وش جوهم يحسون بالراحه على مقاطع فيها أصوات أحد يمضغ أكل !! أو يحرك شفايفه ويطلع أصوات ببراطمه
.
بس إجمالا ً فيه انحرافات في هالمصطلح لأنه يرمز أصلا ً لحاجات ممكن تندرج تحت تصنيفات سيئه.
تقدرون تطلعون على معاني وشرح المصطلح بأنفسكم في الانترنت. ما بجيب هالخياس لمدونتي احتراما ً للقراء.
.
Ambience2
 
.
أرجع لسالفتي الأساسية الآن بعد ما أبريت ذمتي 😗 
.
وقت القراءة أو الانشغال بشيء في مكان واحد تحتاج تشغل لك شيء تسمعه. بس أحيانا ً تكون محتاج تركيز فما تبغى تسمع شيء فيه كلام أو زحمه.
فيه مصطلح اسمه ( الاصوات المحيطية ) طالعين فيه ناس كثير في قنوات اليوتيوب 😍
يحطون لك فكره معينه يدخلونك جوّها.
.
مثلا ً يحطون لك زاوية تصوير من مقهى ، تشوف الناس ماشيه وتسمع صوت ناس تتكلم بهدوء على شوية أصوات أواني، وأصوات أقدام الناس الرايحه والجايه بعض الأحيان يدخلون موسيقى جاز على خفيف أو بيانو.
بشكل يخليك تحس انك موجود هناك. وما تكون صاخبه ومزعجه.
فيه أفكار وأماكن كثير مصورينها ومسجلينها
.
مره من المرات كنت أبحث وطلعت لي قناه يوتيوب مسوين مقاطع أصوات محيطيه بثيمات تشبه ألعاب الفيديو والأفلام، مثلا ً هاري بوتر وهوبيت وملك الخواتم وغيرها. يجيب لك صوره مكان من أماكن هالأفلام وأصوات، تدخل جو وتسترخي وانت تشوف البيئه تتغير، مرات يكون فيه مطر وبعد شوي الشمس تشرق. مقاطعهم تكون طويله مثلا ً 3 ساعات، بس الغرض منها مو انك تتابعها طول هالوقت!
بس شغلها واسترخي أو اشتغل أو اقرأ. فيه ناس يستخدمونها يتخلصون من الأرق والقلق والاكتئاب.
.
بحط رابط قناة أعجبتني وصرت أعتمد مقاطعها كثير إذا كنت أبغى أقرأ في جو هادي بدون ما أحس بالنعاس. 
بس قبلها بحط مقطعين أعجبتني من قنوات أخرى 
.
هنا حاطين كوخ من فيلم هاري بوتر. يبدأ المقطع من الفجر بدري على نفس الزاويه في المطبخ ..
والشمس تشرق ولو واصلت لآخر المقطع بتلاقي ان الشمس طلعت وصار قبل الظهر تقريبا ً. منظر حلو ومريح 😭❤
.
.
.
المقطع الي بعده من فيلم هاري بوتر برضو <– big fan 😬
لغرفة غريفندور، قدام المدفئة والجو برا ممطر وفترة مساء. صوت المطر معروف انه يهدئ ويساعد الي عندهم أرق بعد.
.
.
الحين جاء وقت القناه العظيمه الي سحرتني !
يحطون ثيمات وأجواء غريبه ومميزه، مثلا ً متجر جرعات (potion) زي الي في العصور القديمه.
أو سفينة قراصنه وقت عاصفه ، أو نزل قديم أو مكتبه بطراز قديم وفخم.
.
اسم القناه The Guild of Ambience – ( رابط القناة )
.
.
أقدّر جهودهم كثير، عمل راقي وفكره عبقريه وشغلهم متقن 
شفت قنوات كثير تسوي هالشيء بس هالقناه شغلهم متقن ومزبوط 
جربوا المره الجايه تشغلونها وقت الرسم أو الكتابه أو القراءة أو الأعمال اليدويه
أو حتى لو متبطحين تتفرجون عالسقف وتفكرون في شيء تسوونه.
.
.

نمط حياة دافئ ~ Hygge

رمضان مبارك، تقبل الله منا ومنكم صالح الأعمال
.
The little book of Hygge ischerzo
.
Hygge كلمة دانماركية استخدمت من بدايات عام 1800 لكن أصلها كلمة نرويجية قديمة
مؤخرا ً انتشرت في أمريكا ودول اخرى كثيرة.. الكلمة مالها ترجمه حرفية لأنها مشاعر أو توجه ونمط حياة .. حبيت أنقل لكم هالمصطلح بشكل بسيط..
.
تنطق ( هو-جاه ) فيه ياء قبل الواو يادوب تلاحظها وحرف G ينطق مثل الي في كلمة Good وليس كما في كلمة Legend ..
بعضهم يترجمونها ( العيش بشكل دافئ ومريح ) أو ( العيش بالشكل الذي تحبه مع الأشخاص الذين تحبهم ) ..
.
اذا اخترت تدخل مود أو نمط Hygge غالبا ً فيه أمور تحتاج تسويها، غير انك تكون مع الأشخاص الي تحبهم وتشارك معهم وقتك ونشاطاتك ..
فيه كتاب صغير يشرح معنى الكلمه وكيف يقدر الشخص يعيش بهذا النمط، من ضمن الصفحات كان فيه بعض المتطلبات الي تشكل لك نمط متكامل، جمعتها في صوره وحده واختصرت بعض الشرح ..
.
the little book of Hygge
.
لفت انتباهي تعريف من تعريفات هالكلمه وهو ( الاستمتاع بكل شيء وكل لحظه، مع الأشخاص الي تحبهم )
هذا التعريف الي أعجبني لأن في السنه الأخيره صرت أحب أستمتع بحاجات بسيطه، نظرا ً لأن المنطقه الي أنا فيها خامله ومافيها أي نوع من أنواع الترفيه الي كنت أحبه، فصرت أستمتع حتى لو خروج للحوش دقيقتين مع أمي توريني شجره أثمرت أو تقول لي فكره ما عمرنا راح ننفذها بس نستمتع واحنا نناقشها..
.
أغلب الي يحبون هالمصطلح يكونون “ديدان كتب” يحبون يسوون لهم جو زي كذا لأنهم أغلب وقتهم شبه جاهزين ومستوفين المواصفات المطلوبة لهالنمط.. قراءة الكتب تعتبر من الأمور المناسبه للـHygge..
.
نمط Hygge حلو ومبدأ راقي يمشي عليه الواحد بحياته.. بس ما أعتقد أحد يقدر يخليه نمط حياه مستمر..
عن نفسي شخصيتي متقلبه وديناميكيه ما أحب أتبع نظام هادي ومسالم لفترات طويله علشان ما أعاني من فرط حركه وأروح أتسلق جبل..
بس حلو لما الواحد يكون مكتئب أو طفشان يقدر يخلق لنفسه أجواء ويقدس اللحظه .. 
من أبسط الأمور المطلوبه والمتبعه: الامتنان الشموع والإضاءاتتناول بعض الأطعمه الخاصه
أعتبره نوع من الحمد ان الشخص يحس بالسعاده والامتنان لمجرد كونه على قيد الحياه بعافيه وكثير من النعم الي ما نقدر نحصيها..
.
.

Miss Peregrine’s home for peculiar children books

8b852-200_s

 

الفتره الماضيه قضيتها بعيد عن النت وقللت التواصل مع الناس.. بس كنت اقرأ روايه وهالشيء ما خلاني أحس بالملل تماما ً..
لازلت أحتاج فتره أكون لحالي بدون سوالف ومجاملات..
 .
 .
هذي الروايه (المكونه من 3 كتب) كانت اقتراح من صديقتي يونا الي ما عندها مشكله تقرأ روايات طويله جدا ً جدا ً
**يونا هي رسميا ً المرشد لي في الكتب وألعاب الفيديو لأن ذوقها رهيب وأنا ماعندي سالفه بهالمجالين**
مره اقترحت عليّ أقرأ سلسله من 7 كتب !! وكل كتاب أكبر من الثاني، ولازلت أقلب الفكره في راسي لأن هالمجموعه تشهي وأتمنى أقرأها.. بس يبقى مشروع مؤجل..
 .
الروايه الي قرأتها طوال الفتره الماضيه (Miss Peregrine’s home for peculiar children) للكاتب (Ransom Riggs)
تنتهي في 3 كتب ..
بس الكاتب أضاف كتاب آخر فيه قصص خرافيه كانوا أبطال القصه يحبون يقرأونها..
برضو طلعت اصدارات اخرى لكن مب تكمله.. يعني مثلا ً واحد منها كان القصه المصوره.. نفس الأحداث بس كوميكس..
 .
قبل فتره صرّح الكاتب -الي امتلأ جيبه بالفلوس بعد هالسلسله على ما يبدو- أن فيه كتاب رابع تكمله وفيه أسرار وحاجات فخمه..
لسى ما نزل بس راح أشتريه بدون تفكير أول ما ينزل عندنا بإذن الله.. مع العلم أن القصه تعتبر منتهيه لو أحد يبغى يعتبر الثالث هو الأخير..
 .
 .
أجزاء السلسله المتوفره الآن (متوفره في مكتباتنا برضو)
miss peregrine's home for peculiar children
Miss Peregrine’s Home for Peculiar Children-
Hollow City-
Library of Souls-
 
والكتاب الاضافي : Tales of the Peculiar
الي شجعني أقرأ الروايه ( بعد توصية يونا طبعا ً ) هو أنها تشبه عرض المسوخ، قصه قديمه وحقيقيه لو أحد سمع فيها من قبل ..
عرض المسوخ ( Freak show ) هو سيرك كان فيه ناس “مختلفين” فقط.. مثلا ً توأم سيامي، أشخاص ولدوا بعيوب خلقيه، والناس وقتها مو متعودين على هالشيء ويعتبرونه شؤم أو لعنه..
كانوا منبوذين وطريقتهم الوحيده للعيش انهم يشاركون بهالسيرك ويكونون فرجه للناس.. ابحثوا في النت وراح تحصلون عنهم معلومات كثير..
عرض المسوخ أصبح قاعده لأفلام ومسلسلات وقصص كثيره..
كتاب Miss Peregrine’s home for peculiar children فيه شخصيات غريبه سواء في المظهر (زي عرض المسوخ) أو بقدرات غير ظاهره.. سماهم الكاتب Peculiars ( الكلمه معناها الحرفي غريب أو غير طبيعي )..
Miss Peregrine's home for peculiar children
 
-في الصوره كتاب ناقص، وحده استعارته مني ولسى ما رجعته-
نبذه للقصه ( ما أنصح بقراءة النبذه للي ما يحب يعرف حاجات عن القصه قبل لا يقرأها )
بداية القصه من يوم كان البطل ( جيكوب ) طفل عادي مثلنا وفي عالمنا ووقتنا هذا، كان متعلق كثير بجدّه، الي يحكي له قصص عن أصدقاء طفولته، وكانت قصصه غريبه، بنت تطير وبنت تطلع من يدها نار ووحده تتحول لطائر وواحد مختفي ما ينشاف منه إلا ملابسه وقبعته..
الغريب أن الجد كان يعرض على جيكوب صور لهالأطفال الي يتكلم عنهم.. كان يصدقها لحد ما كبر صار عمره 16 وبدأ يحس أن الجد كان يلعب عليه.. لكن الجد (الي بدأ يكبر في السن كثير وأولاده يعتبرونه مخرف) صار يتكلم عن هالأمور بشكل جاد ويقول لجيكوب حاجات غريبه وأنه في خطر..
جيكوب كان يحس أن جده مخرف فعلا ً، لحد ما حصله يوم من الأيام في الغابات الي ورا بيته وهو مصاب ويهمس له انه لازم يرجع للمكان الفلاني والتاريخ الفلاني، ومات، وفي وسط الظلام كان جيكوب يشوف مخلوق مرعب له ألسنه أو مجسات كبيره من فمه، هو الي قتل الجد، واختفى بعد دقايق ..
من بعدها صار جيكوب يعاني من كوابيس عن هالمخلوق ويتذكر كلام الجد، ام وأب جيكوب قرروا يرسلونه لطبيب نفسي لأنهم يحسبون أن الصدمه هي الي خلته يشوف وحش في الغابه ويسمع أصوات ويتوهم حاجات..
قرر جيكوب أنه يبحث عن المكان والتاريخ الي قاله الجد قبل موته، وحصل على رسائل كان يحتفظ فيها الجد على ما يبدوا أنها من المكان الي تكلم عنه الجد وقال أنه نشأ فيه مع هالأطفال..
بعد عناء توصل الى أن مكان هالأطفال في جزيره معينه وقرر يطلب أبوه انهم يسافرون هناك كنوع من الاستجمام، الأب تحمس وفكر فيها كفرصه ان جيكوب يغير جو وينسى وفاة الجد.. ومن هناك بدأ جيكوب ينبش ويحاول يحصل مكان أصدقاء أبوه، كيف يكونون موجودين لحد الآن؟ مفروض انهم عجزوا وماتوا بس الرسائل تثبت أنهم موجودين..
رأيي وتقييمي للكتب الثلاثه
الكتاب الأول شيق ولطيف جدا ً..
الكتاب الثاني فيه ثيم خاص وفيه مشاعر قويه تخليك تتعلق بالشخصيات..
الكتاب الثالث أكشن وأحداث سريعه وتقلبات كثير..
 
الشيء الوحيد الي كان يخليني ما أمسك الكتاب من الصبح إلى الليل هو أن فيه وصف دقيق في بعض الأحيان..
بالذات الكتاب الثالث حسيته يحاول يزيد عدد الصفحات وكان فيه وصف دقييييق للأماكن حتى لو ما كانت مهمه..
صح ان الكتاب الأول فيه وصف لكن يحمسك ويهمك لأنك تحتاج تتخيل هالأمور بالتفصيل كونها امور خياليه جديده علينا..
الكاتب شكله يحب النهايات السعيده وما يحب أنه يموت شخصيات كثير أو يسوي نكد غير ضروري.. يحب يسوي لقطات سعيده كثير..
بس مو معناها مافيه واقعيه أو مافيه نكد.. فيه مواقف كانت مؤثره وفيه شخصيات تموت..
بس شخصيا ً تنرفزت من الـ Ymbrynes .. معطينهم أكبر من حجمهم وما عندهم سالفه في نظري.
القصه الأصليه للـYmbrynes الي في كتاب Tales of the peculiar حلوه وحسيت دورهم عظيم.. بس في الروايه نفسها ودي أصفقهم، زلايب..
.
فيه برضو شيء لاحظته، الكاتب يعرف يطلع لنفسه مخرج، مرات أحس السالفه تعقدت ومافي أمل يطلعون من المأزق، أتفاجأ أنه يخرجهم من الموقف بطريقه ما تخطر عالبال، تفاجئ وتفرح بنفس الوقت..
** الفيلم المقتبس من الروايه مب مره عظيم.. مغيرين شوي في الشخصيات، ومختصرينه وطبعا ً النهايه مختلفه..
حلو بس مب بالمقارنه مع الروايه..
 
 
الكتاب الجاي الي أنوي أقرأه قصير لأن آخر روايتين قرأتها كانت كلها مكونه من 3 كتب ..

Audible + Alexa

 

.
قبل شهور كان لي تدوينه عن الكتب المسموعه، ذكرت فيها تطبيقين جوال للكتب المسموعه وهي الي كنت أستخدمها من قبل لأنها مجانيه، بس بعدها غيرت التطبيقين واستبدلتها بتطبيق + جهاز
التطبيق/الموقع الي حولت عليه هو Audible .. وهو تابع لأمازون
Audible1-702x336
الكتب في أمازون أحيانا ً يكون لها صيغ مختلفه من ضمنها 
 Hardcover – Paperpack – Audible وفيه صيغ أخرى زي كندل بس بتكلم عن أهمها
.  
ا Paperpack هي النسخه الورقيه المعتاده في المكتبات عندنا 
.  
 Hardcover موجود عندنا برضو بس مب كل الكتب فيه منها هالصيغه.. يكون ورقي نفس الي فوق لكن 
بغلاف قوي.. وأحيانا ً يكون غلاف جلد ومزخرف ومغطى بغلاف ورقي ينشال لو حابين نشيله بس فايدته أتوقع حمايه
 الهاردكفر شكلها مثل هذا ( Link )
بالنسبه لي أعشق الكتب الهاردكفر، أشكالها دايم تفتح النفس ومغريه
 . 
 Audible هي نسخة مسموعه وتقدر تسمع صوت القارئ قبل لا تشتري علشان لو ما حبيت اسلوبه ما تتوهق
الفكره أنك تشتري الكتاب ويصير موجود في مكتبتك أو حسابك .. تقدر تحمل تطبيق على جوالك وتسمع الكتب الي في مكتبتك عن طريق الجوال
ولو عندك أجهزه مثل آيبود ممكن تعمل اقتران بين حساباتك في آيتيونز و أودبل.. وتنزل كتبك على الجهاز الي تبغاه، وفي ويندوز 10 تطبيق اودبل صار مفيد وتقدر تحمل منه كتبك بسهوله وبدون برامج ثانيه..
 . 
الميزه في Audible، لو اشتركت في عضويتهم المدفوعه يصير عندك كتاب مجاني تحمله كل شهر .. ا
بس لما تسجل في الموقع أول مره لمجرد تسجيل عضويه (تسجيل مجاني) يعطونك كتابين مجانا ً ا
ا( أي كتابين تخطر في بالك حتى لو كانت غاليه ) بس ينتهي العرض خلال شهر ولو ما حملت شيء تروح عليك خلاص
.  
تطبيقهم متوفر على الأبل ستور – الاندرويد – ويندوز 
.
.
.
audible-amazon-alexa
.
هذي Alexa
جهاز صغير ذكي يشتغل بالأوامر الصوتيه، (أليكسا صحيني بكرا الساعه 8) ( كم الساعه ) ا
ا (شوفي الطقس) ( اطلبي لي اوبر ) ( اتصلي لي على أمي ) وهكذا
لكن الأوامر تكون بالانجليزي + لازم تكون متصله بالانترنت طبعا ً، وتحتاج أول ما تشتريها انك تربطها بعضوياتك في أمازون وبعض مواقع الموسيقى والكتب الي تتوافق معها
فيه ناس يستخدمونها يشترون من أمازون، تعطيهم اقتراحات بعد هي وراسها المفلطح..
أليكسا صارت الطريقه الثانيه الي أسمع فيها كتب مسموعه لأن الصوت فيها واضح وأليكسا تحفظ فين وصلت في الكتاب علشان اكمل بعدين.. ا
لها أحجام أخرى، فايدة هالحجم انك ممكن تشتري منه أكثر من وحده وتحطها في باقي الغرف ويصير بيتك كله مشبوك عن طريق أليكسا، يفتح لك اللمبات ويطفيها أو يخفض الاضاءه حسب أمرك، يشغل الأجهزه الي تدعمها سواء الآن أو تضبط لها توقيت متى تشتغل ومتى تطفى، وكمان فيه توصيلات وملحقات تابعه لأليكسا الغرض منها ان العيش يكون أسهل..
أو يمكن ( أكسل ) ما اقتنعت بكل الملحقات، بس تبقى وجهة نظر ..
على فكره أليكسا شخصيتها فله، لو طلبتها تغنى بتغني لك، وتقول لك نكت (سخيفه طبعا ً) ..
مره ولد خالتي سألها “أليكسا، كيف حالك” راحت تقول له سالفه طويله، قال لك تفضفض يا حليلها
الورع ما يعرف انجليزي وما يدري وش تقول بس سألني وش معنى ( كيف حالك ) وقالها لها، وكمل طريقه وهي تتكلم..
فيه برضو (مهارات – Skills ) تحملها على أليكسا من أمازون (مجانيه)، مثلا ً صوت عصافير
هو للاسترخاء بس حطيته علشان أوز عصفوري الفله 
فيه خيارات ومميزات مالها حدود 
لكن طلب البيتزا أو طلب سياره أوبر هذي مب متوفره عندنا لأنها غير مدعومه هنا أصلا ً.. ا
هذي صفحتها على أمازون، بين فتره وفتره يصير عروض مجنونه وينزل سعرها للنصف ( هنا ) ا
كنت ضد هالجهاز وأفكر أننا مب ناقصين أشعه في البيوت ومن هالكلام، بس جاتني هديه من أخوي وانبسطت عليها..
ليش لا؟ جهاز عظيم، طالما أفصلها من الكهرباء وقت النوم أتمنى ما تكون مسببه أضرار كبيره ..
ا 

 

The Tell-Tale heart

 

 Edgar Allan Poe – إدغار ألن بو 
 .

(owner of this image? please contact to add credit) 
ما كنت أعرف عن هذا الشخص إلا اسمه وما كنت أذكر فين سمعته أو أي معلومات عنه
لحد ما درست آخر سنه في الجامعه، كان فيه نبذه في أحد المناهج عنه بالاضافه إلى واحده من روايته
صارت هالروايه من الحاجات الي أنبسط إذا جات ببالي
لأنها قصه عجيبه وغريبه وكل شخص يقرأها راح يشوفها من زاويه مختلفه عن الثاني.
 اسم روايته الي أقصدها  The Tell-Tale heart / “القلب الواشي” وهي قصه قصيره جدا ً

تستغرب لما تخلصها من كثرة الأفكار والمشاعر الي تجي ببالك بعد قراءة نص قصير زي هذا.

روايته مكتوبه ومترجمه في هذا الرابط ( هنا )