فرق شعره بين الانطوائيه وعيش الحياة بشغف

Untitled-2

كنت متحمسه من العيد أكتب حاجات جديده بشكل اسبوعي لكن حصلت شغلات ما أعطتني فرصه أرجع.
.
بكتب شيء كان يقرقع في صدري بكل صراحه وشفافيه وانفلات، لأن هالشيء يمسني شخصيا ً وأعتقد انه يمس ناس كثير راح يفهموني ويمكن يفهمون أنفسهم لأن أنا ما كنت أدري عن هالشيء فيني إلا من فتره
.
وش سويتي هالاسبوع؟” هذا السؤال صدقي وعميييق، كم مره أسمع ناس يسألون بعض ويطلع جوابهم زفت متنيل بستين نيله. لأنهم حرفيا ً ما سووا شيء. رصيدهم من الحياه لهالأسبوع كان صفر.
ما أتكلم عن الانجازات والخطط.. أتكلم عن رصيدك من العيش على هالعالم، مجرد العيش.
.
لازم اعترف اني شخص يدخل أطوار غريبه متعدده خلال السنه، كنت أحسب اني غريبه ومتخلفه بس اكتشفت ان وضعي سليم لأن فيه تفسير منطقي طلع في الأخير.
كنت أستغرب ليش ممكن تمسك معي 3 شهور كامله قرفانه من الناس وأحسهم يشغلوني عن حياتي وما أبي أتكلم وأسولف سوالف عاديه؟ أنا مو انطوائيه، أنا بس أعيش الحياه ..
أحب أعيش حياتي مع نفسي أحيانا ً، أتواصل معها ومع الحياه.
.
احنا ناس تغلغلنا في حياة بعض، في حياة ناس ما نعرفهم ولا يفترض بنا نعرف عنهم كل هالقدر. متابعين حياتهم ونعرف عنهم أكثر من أقاربنا وجماعتنا. أحيانا ً يكونون ناس مهمين لنا فعلا ً مع أننا ما تقابلنا في الواقع، لكن برضو يكون غلط اننا ننخرط بحياة بعض طوووول الوقت.
ما يفترض اننا نعيش مع بعض بهالقرب، نحتاج نطلع من خشوم بعض. مو معقول احنا فاتحين برامج تواصل طول اليوم وأي أحد يرسل نرد من وقتها ! لأي حد ما عندنا حياه؟
.
إذا غاب عنك شخص كان موجود في وسائل التواصل لا تتوقع ان فيه مصيبه حصلت له، بالعكس هذا عايش حياته صح <– اقتباس من كلام اختي
وسائل التواصل مب حياه، وقتك الي تقضيه على تويتر/فيسبوك /انستجرام /تليجرام /واتس آب /سناب وغيرها مو حقيقي، أنت ما عشت شيء، رصيدك من الحياه لهالاسبوع صفر كبر راسك.. مجددا ً نرجع نسأل “وش سويت هالأسبوع؟” هذا بيكون توبيخ أكثر منه سؤال، لأنه بيخليك تكتشف انك ما سويت شيء، مهما كان الي قدامك متبطح أو يقرأ أو حتى ياكل ويشوف مسلسل فهو عاش أكثر منك.
.
لما أدخل برنامج وأجلس عليه أون لاين طول اليوم معناها أنا وصلت الحضيض، أتكلم عن نفسي هنا. اذا شفتوني فاتحه برنامج تواصل معين طول اليوم أو أرد على رساله في نفس اليوم معناها عندي مشكله ووصلت قعر الجحيم في حياتي الواقعيه علشان كذا هربانه ورايحه عالم ثاني.
لأني لما أكون في حاله سليمه ماراح أجلس بدون شغله أنتظر أحد يكلمني وأرد عليه. غالبا ً بكون مشغوله أعيش الحياه وأمارس هواياتي. وأضمن لكم وأحلف أن مشاهدة حياة الآخرين وانجازاتهم مب من بين هالهوايات. حتى لو كان حساب مفيد، إذا ما كان مجال واضح مهم أنا أحتاجه في حياتي اليوميه فما راح أضيع من وقتي في شيء ثانوي، بالاضافه اني أتابع شخصين أو 3 بالكثير كل فتره، ما أتابع مليون واحد بنفس الوقت. يعني ما أجلس طول وقتي أتابع حاجات مفيده، وش الفايده تكون متلقي وما تلاقي وقت تمارس الي تلقيته من فوائد؟ تصير شخص ماعنده إلا تنظير وكلام، مافي تطبيق.
.
الناس يبغالون في العيش مع بعض، ماصار فيه حواجز بيننا، الجوال صار آداة استحضار للناس قدامي، مافيه خصوصيه، ما تقدر تجلس على جوالك تسمع كتاب مقروء أو تستخدم برنامج مفيد بدون ما ينط لك تنبيه أن فيه أحد طفشان يبغى يرمي طفشه عليك.
وما يقدر الواحد انه ما يرد. عن نفسي فيه حالات أحب أجلس 3 أيام ما أرد على رساله، مع أني ممكن أكون قرأتها من أول يوم. بعد 3 أيام أرد رد رايق ولطيف ما أفجعك فيه. ممكن أشوف تنبيهات وأطنشها لأن عندي شيء أفضل أسويه لو ان شاء الله أنسدح عالسرير أرتب أفكار مخي المتزايده كل ثانيه بشكل يصدع.
.
hobbit NO
مو من حقك تلح على الشخص أنه يكون موجود لأجلك ويرد عليك ويكون متفرغ يسولف معاك أو ينتشلك من كل حفره تقع فيها خاصه لما يكون شخص تعثر في كل الحفر سنوات وماحصلك ولا مره بجنبه. ما يحق لك تتوقع من الآخرين يعيشون معك أجواءك ويكونون مبسوطين بالحاجات الي انت مبسوط فيها وتبغى تشركهم معاك بالغصب.
.
hobbit.gif
طيب، هل ياترى أصبح موقفي واضح الحين؟ واضح الحين ليش تمسك معي كم شهر أختفي من الناس وما أرد ولا أبغى أكلمهم ولا أبغى أمارس معهم أي نشاطات ولا سوالف؟ توصل لحد التهرّب.
طفحنا من أجهزة بعض، ليش نبغى نكون سوا طول الوقت وكل واحد يحسب مافي إلا هو بحياة الطرف الآخر؟ عندي سياسة خصوصية شديده تخليني ما أبيّن اني جالسه أتعامل مع مشاكل أشخاص آخرين وهالشيء يبين كأن ما عندي شغله وكأني حاطه اصبعي بخشمي. هذا الشيء يسبب ضغط وفي الأخير ردة فعل متطرفه زي ردة فعلي الي ما فهمت سببها إلا قريب. أشوفه ارتباط قوي والتزام كبير انك تعيش مع الآخرين أو تقرأ كلامهم أو تسمعهم كل يوم.
لدرجه ما أقدر أكتب في المدونه علشان ما يجي أحد يقول اهاا تطنشني في الواتس/تويتر وهي فاضيه جالسه تكتب في مدونتها.. بالأساس مشاكل البيوت من داخل تكفي وتوّفي والواحد يكون عنده من القرف الي يكفيه انه يبغى يجلس مع نفسه بعض الوقت.
.
.
من كم شهر كنت أبغى أوصل لمرحله اني أحذف تطبيقات التواصل من جوالي، والحمد لله راضيه عن النتيجه لحد الآن. سناب / تويتر / انستجرام ما صارت من ضمن تطبيقات جوالي .. تيليجرام ما أتواصل فيه بس أتابع قناه وعامله لها ميوت بس أفتحها كل اسبوع أشوف الجديد فيها وأطلع، والواتس ما أقدر أحذفه علشان عائلتي تستخدمه للضرورات. بس كل واحد يقدر يحدد كم يقضي على هالتطبيق، عاد من أول ما أطيقه يعني ما منه خوف.
بالنسبه لتويتر والانستا أصلا ً تابعه لمدونتي وعلشان كذا أقدر أستخدمها من لابتوبي في الوقت الي أكون فيه أشتغل على المدونه وأعمل مشاركه من هنا.
فيه ناس كانوا مفيدين على السناب بس ما يجي يسحبني لين عنده علشان يربح له كم قرش وأنا الضحيه الي أخسر وقتي أكثر من استفادتي بالمحتوى الي يطرحه أيا ً كان. عندك فائده اعرضها في مكان زي الناس مو تسحبني أحمل تطبيق علشان أسمع وش عندك.
.
أتمنى فعلا ً لو الناس تخفف على بعض وتقلل هالنوع من العيش الي يحسسني ان العالم كلهم عايشين بنفس البيت ويطلعون سوا ويدخلون سوا وياكلون سوا. الحياه مو كذا. إذا كنت تحسب انك عايش صح بهالاسلوب فأنت مب عايش أصلا ً.. خفف برامج التواصل وتواصل مع نفسك أفضل لك.
.

 

فين الغيبه؟

 

هذي تدوينه من التدوينات الي مصيرها ترجع مسوده بالعاده بعد ما أروق زي تدوينة ( صورة العرض قرد )، بس هالمره بخليها علشان وعدت صديقتي ما أرمي حلطمتي في المسوده
 .
.
( فين الغيبه )
عباره تخليني حرفيا ً أشد شعري لين أسمع صوت شعرات تنقطع
.
Photo By: Oscar
لما كنت بالثنوي كان عندي شلتين <<– نفاق
السبب أن صديقة طفولتي/أعز صديقاتي تعرفت على بنت أتوقع أننا في حياه سابقه كنا أعداء وتحاربنا لين قتلنا بعض، سبحان الله ما اتفقنا وكنت أحاول أصير مؤدبه علشان خاطر صديقتي الي تبغى هالبنت في المجموعه، بس هالبنت كل ما تشوفني ساكته ومتحملتها ترمي كلمه تخلينا نتضارب
على فكره هالبنت هي نفسها مارلين مونرو الي في تدوينة ( كوكب زمرده يحترق !!!!!) ا
بالأخير أنا طفشت وصرت أروح مجموعه ثانيه كوميديين
كانوا كويسين وعددهم كبير ويموّتون ضحك وبايعينها دراسيا ًوجالسين ورا
وطبيعي بما أننا طالبات مدرسه وحده وساكنين في منطقه وحده صغيره نوعا ً ما كنا نشوف خلق بعض طول الاسبوع، حتى بالويكند شايفين بعض 
.
كبرنا وتخرجنا من المدرسه وكل وحده انتقلت لمدينه والي تزوجت والي توظفت والي اختفت
في ظروف غامضه
نداء إلى (نهال) الي اختفت من أكثر من 16 سنه في ظروف غامضه، يمديني أكتب نداء في الجرايد؟
صديقاتك الثنتين الي اسماءهم زي بعض يدورون عليك ويسألون عنك في الجامعات وفي أسماء المقبولات في الوظايف وكل مكان هههههههههههههههههه
ما كنتي على ما يرام قبل لا تختفين ! مفروض بلغنا الشرطه بس كنا بزران ما نعرف شيء  
 .
المهم، بعد ما راحت كل وحده من دفعتنا لطريقها، بقينا على تواصل بالجوالات وطبعا ً الزفت حبيب الشعب الواتس ظهر ليفسد حياتي، والشلتين كبروا بدون اهتمامات وحاطين ببالهم أن الواتس ملصق بوجهي
طول اليوم مثلهم، يرسلون لي محادثات من هذا النوع مره كل شهر وما جا ببالهم أن الشغله صارت تجلط
ا( كلام البنت بالبرتقالي ) ا
 .
–  سلااام
– وعليكم السلام
– كيفك
– تمام، كيفك انتي؟
– تمام… ما تزوجتي؟
  لا.. كم مره أقول لك مالي نيّة -_-
– ههههههههه لا إن شاء الله تتزوجين ونرقص في زواجك
– هق هق هق.. المطلوب اتزوج علشان ترقصين يعني؟
 .
 
 .
هالسيناريو ينعاد لحد ما أبدأ أفصل بعد أسابيع من الصبر 😡
 يمين بالله لو قلتي لي اني بتزوج مره ثانيه لا أجيك من أطراف الأرض أجلدك انتي وعيالك وزوجك الي مدري وينه وانتي طول عمرك عالواتس، متأكده أنك تزوجتي؟ وريني أشوف صور عيالك وزوجك وانتي معهم، صوري يدك اذا تستحين، أذكر يدك زين ياما كفختيني فيها يا تبن 

– ههههههههه خلاص أعصابك
 هيا اهجدي 6666 
.
.
.
يبدأ السيناريو يتغير الحين، البنت خايفه على عيالها
– سلام
– أهليين، وعليكم السلام
– كيفك؟
– تمام، انتي كيفك؟
– تمام.. وين الغيبه؟
– أبد، موجوده بس يعني تعرفين كل وحده ساكنه بمدينه ماراح تلقيني بوجهك في كارفور
– خخخخخخخخخخخ
 .
 .
ليييين تطور الوضع من سنتين ونص صار كذا
– فين الغيبه؟
.
كذا بدون سلام ولا كلام ولنا سنتين ونص على هالحال
مع العلم أننا ما نتشارك الاهتمامات الحين وصعب أتكلم معها عن اهتماماتي
وأنا عارفه هالبنت لو قلت لها ( والله شفت مسلسل عجبني رهيييب قصته كذا وكذا تابعيه معي ) بيكون ردها: اها ، وأخبارك؟
مرات أحس الناس يبغون أكشن في الأخبار، شيء زي (أمي وأبوي تطلقوا ، جارتنا دعستها سياره، جاني رعاش، اختي تزوجت، أمس حضرت ملكه وجاني صمم لأن الأغاني صوتها عالي) مع العلم آن آخر خبر راح يقودنا إلى أول محادثه ويخليها تسألني متى تفرح فيني.. ا
 .
كذا يبغون.. وأنا ما عندي هالشيء الي يبحثون عنه ! آسفه لأن ما عندي أكشن يرقى لمستواكم، أنا أعتبر يومي حافل إذا وصلت شحنتي من أمازون لأني أطلب مره في القرن أو إذا أنهيت كتاب بما أني  بطيييئه ما أقرأ دفعه وحده.. الحمد لله يارب، مرتاحه كذا خلاص ليش تبغون فعاليات؟
 .
أحس أن الصداقه مو شيء صعب أو منقرض زي ما نحسب، بس نحتاج نفتح عيوننا كويس على الناس الي نصادفهم في حياتنا، مرات نقابل شخص في مكان عام وما ندري أنه بيكون شخص مهم في حياتنا
ومرات يكون فيه شخص هادي في جماعه وما نتشارك معه أي اهتمام أو نحس أنه مو مهتم فينا، نعرف بعض كعلاقه سطحيه جدا ً لسنواااات، مجرد نشوف بعض بدون ما نتكلم حتى.. وبعد سنوات نجرب نتكلم مع بعض ونتفاجأ فييين كان هذا؟
ا(هذا الآدمي انخلق وانكتب لي أنه يكون من أفضل الأشخاص في حياتي) <– هلو بِنك هودي
.

“كفحله”

  
أنا بخير الحمد لله، الحمد لله، الحمد لله بخير، الله يسلمك أنا بخير، بخير الله يسلمك .. *جرعة موية*
 
اهلكتي أمي
عمركم دققتوا في المجالس والحريم المستقعدات في قمة هالمجالس؟ الحريم الكبار في السن والمتربعات على قمة التسلسل الهرمي بحكم السن ولأنهم غالبا ً هم المتحكمات في كل شؤون الأسره وعلاقاتها الاجتماعيه، من مواجيب وزيارات وزواجات وطلاقات..
كل حرمه من حريم قمة المجلس لها تاريخ طويل ومرعب وخاضت معركه أو معركتين مع كم حرمه أخرى من حريم القمه وبالتالي أصبح بينهم نوع من الهدنه والمجاملات، كل حرمه تجبر بناتها وحفيداتها على تملق الحرمه الثانيه لإثبات أمور نجهلها..
في المناسبات الكبيره جدا ً نتوقع أن الفكرة مجرد تجمّع وقهوة وحلى وعشاء كبير وبعدها نروح البيت، ولا ننسى طبعا ً عرض الأزياء الي يقام بين بعض البنات الي يهمهم الأمر..
لكن بالنسبة لحريم القمه فيه منافسه شديده حاصلة احنا مو منتبهين لها مع أننا نلعب دور هام فيها، كأننا قطع شطرنج عندهم ..
مثلا ً، واحده من هالحريم حضروا كل بناتها “المتزوجات” وبعضهم عندهم أطفال وبعضهم أطفالهم في الطريق، نلاقي هالحرمه مشققه من الوناسه والفخر، في الجهه المقابله حرمه ثانيه بناتها متخرجات من تخصصات قويه وموظفات برواتب كالأنهار لكن “غير متزوجات
يعني: ( *هه! In your face !!* بناتك أبو كلب أما بناتي المتزوجات رافعين راسي ) ..
النتيجه 1 – 0 !
 
بعض النقاط تحتسب لصالح الحرمه الي بناتها وحفيداتها يحضرون مناسبات كثير، مختمه المناسبات لهالشهر 
🤣🤣🤣🤣 ثلاث عزايم ورا بعض، يعني ضربة ثلاثية، تروفي..
  
عموما ً، بعيدا ً عن بطولة “تينكايشي بودوكاي” الي تصير، خلونا في موضوع الـ”كفحله”
الكفحله هي الفعل للسؤال عن الحال.. يعني إذا كنت جالس في المجلس وبدأوا الناس يسألونك كيف الحال وش الأخبار إلخ.. هذي كفحله..
  
في المجلس أكون ضيفه وصلت من دقيقه وجالسه مكاني، غالبا ً أبدأ أمثل دور الشخص المبسوط لرؤية هذا الحشد من الأحباب..
تسألني واحده من الحريم عن أحوالي، لكن بالسيناريو الطويل التالي:
  
– كيف حالك؟
– الحمد لله
– وش أخبارك؟
– الحمد لله 😐 ( دوبني جاوبت هالسؤال ) 
– عساك طيبه؟
– الحمد لله 
– كيف أهلك؟
– الحمد لله
– عساهم طيبين؟
– ايه طيبين الحمد لله 😤
– كيف أخوانك؟
– الحمد لله ( أخواني هم نفس أهلي، شككتيني في عائلتي ! 😨😨 )
– كيف أبوك؟
– …………….. بخير الحمد لله 
 .
بعد شوي نفس الحرمه تسأل اختي نفس الأسئله !!! يعني بكذب عليك؟ 😧
والمشكله يسـألون أختي كيف حالي أنا ! وأنا جالسه جنبها وقدامهم 🙄
. 
هذا النوع من الأسئله له إجابه واحده، لكن أنت مضطر كشخص عاقل بالغ متملق منافق أنك تغير الاجابات..
يكون عندك تشكيله من الاجابات : الحمد للهبخير الله يسلمك طيبين واللهالله يسلمك ..
تحتاج برضو مخده صغيره علشان تاخذ غفوه بعد هالأسئلة لأنها مرهقه..
 .
 ملاحظه ، مالك صلاحيه ولا حق أنك تقطع الأسئله وتبادر بالسؤال عن حال هذا الشخص علشان تتملص من اسئلته..
لو قلت مثلا ً ( الحمد لله بخير، كيف حالك انتي؟ ) راح تطنشك وتكمل نموذج الأسئله الي عندها
. 
في الواقع أن السؤالين ( كيف حالك ) و( وش أخبارك ) لها إجابتين مختلفه إذا كنت مع صديقاتي أو أقارب مقربين جدا ً..
“كيف حالك” هو سؤال عن حالتك بشكل عام، هل أنت بخير أو لا..
“وش أخبارك” هو سؤال عن جديدك، يكون جوابها مثلا ً ( أبشرك ختمت اللعبه الي ذاك اليوم ) ( شفت الفلم الي أعطيتيني ) وهكذا.. أخبار يعني ..
.
بس ما أعتقد أن هالحريم يهتمون بأخبارك فعلا ً، They don’t give a shit..
لو قلت لها أبشرك صبغت غرفتي أو غيرت أثات الغرفه بتكون قاطعتني وسألت السؤال الي بعده، لأنها مبرمجه أن مدة الجواب تكفي فقط لجملة ( الحمد لله بخير ) ، هي مب وقحه، لكنها سرحانه ههههههههههه
.
المجتمع تخطى الهدف الأساسي من الجمعات، علشان كذا صارت ممله ومتكلفه وفيها بروتوكولات كثير..
إن شاء الله الأجيال الجديده يتخلصون من هالهراء، مع أني ما أعتقد ألحق عليهم، لأني من الحين اعتزلت الجمعات إلا الضروري منها..
. 
** الكفحله قد تحمل معاني اخرى في مناطق اخرى، أنا ما أعرف إلا هذا المعنى فلو أحد شطح بتفكيره أنا مالي دخل..
. 
 
 
 

الكائنات الطفيلية قليلة الأسنان، وأمهاتهم الفيروسات القاتله..



استقريت أخيرا ً، وقررت أروق وأبدأ نشاطاتي ورواقتي..
بس فيه وحده حكت لي سالفه عن بزر، وتأججت ذكريات الأشهر الـ5 الماضيه في عقلي..
أمور أتساءل ليش تحصل..

مشاعري تجاه الأطفال متقلبه جدا ً، أحب أياديهم الصغيره خاصة إذا طفل حط يده في يدي -بدون ما أقول  له- لأنه خايف يضيع في مكان عام *عارفين قدرهم أنهم مب كفو يمشون لحالهم*
أحب أشكالهم وهم نايمين مالهم حس، وأستظرف أشكالهم إذا واجهوا صعوبة في تحليل الأمور وبدأوا يفكرون بعمق..
باختصار أحب أتأمل كيف كانت وظائفنا الذهنية والإدراكية في بداياتها، بطيئه وبسيطه..
تعاملي مع الأطفال حلو وأنجح بسهوله في كسب صداقتهم اللعينه المليئة بالدباقه..
حسنتهم الكبرى أنك تعاملهم بحقيقتك على عكس الكبار الي غالبا ً نراعي بعض الأمور ونتكلف ونحترم 
ونسوي أنفسنا “شخص عاقل جدا ً ورزين”.. الأطفال يتقبلونك على الرغم من عيوبك، يفهمون قوانينك..


الصراحة” عند الأطفال هي شيء آخر يحببني فيهم، الطفل الي ما خربوه أهله وعلموه الكذب، يكون عادة صريح بالفطره
صراحتهم قد تكون في الصميم لكن ماحد يزعل منها إذا ماكان الطفل قليل تربيه ويتعمد فقط السخريه أو الانتقاص..عموما ً، كل ما سبق ذكره عن الأطفال ومحاسنهم أصبحت في طيّ النسيان إلا من رحم ربي..
حاليا ً موقفي تجاه الأطفال بشكل عام أكرههم وأنفر منهم وأعتبرهم مثل الطفيليات تماما ً
الطفل كان مخلوق جميل بالفطره، لكن في زمننا صار مخلوق مزعج وطفيلي..
التربيه الآن تقتصر على توفير سبل الراحه فقط، بدون تربيه أو احتواء أو اهتمام..
 أصبح الطفل مصدر قلق وازعاج لكل المحيطين به بسبب التوجه الخاطئ في اهتمام الأمهات بهم وماراح أبالغ لو قلت أن الأسطر القادمه مليئه بكمية من الغضب الشديد الي يخليني مرات أتمنى أكون “جنّي” علشان أروح أضرب كم طفل بدون ماحد يشوفني..
.
الأمهات صاووا يعطون أطفالهم ماليس لهم، حتى حاصرونا وأخذوا كل شيء منا وليتهم يسكتون ويخلونا نعيش بهدوء..
الأماكن المخصصه للرجال مرتاحين ومروقين، بينما أماكن الحريم كلها لازم تكون “صديقه للطفل” أي آمنه ومريحه لهم، بغض النظر عن راحة الأمهات ناهيك عن راحة البنات الي ما تزوجوا بسبب حبهم للراحه والهدوء..
احنا البنات مالنا مكان نقدر ننبسط فيه بدون مضايقة البزران !! الأماكن النسائيه حتى لو كانت للكبار يجون البزران البثران لها..
.
المقاهي مثلا ً مب مكان للأطفال، كل ما أروح أجلس مع صديقه من صديقاتي في مقهى ونحاول نسولف ما نقدر.. لأن فيه كم أم جايه تتقهوى ومعها 3 درزن بزران، واحد منهم رضيع ويبكي ملء حنجرته والأم تشرب قهوه وتسولف ومخليته يزعج الناس ومب هامها تسكته.. وبقية أفراد الدرزن شغالين مبارزه بالملاعق والأشواك والسكاكين، ويلعبون مطارده أو يصارخون بلا سبب، غالبا ً فرط حركه من كثر السكر الي ماكلينه والقهوة الي شاربينها مع أنها مب مناسبه للأطفال..
.
الأمهات ممكن تعودوا على ازعاج أطفالهم، بس أنا أشوفه عيب أنها تترك غيرها ينزعج وينفر من المكان علشان حضرتها تتقهوى..
إذا مب فارقه معك الازعاج اقعدي بالبيت، خلي بزرانك في بيتك يناقزون زي القرود، وإذا جيتي تطلعينهم من البيت لاعاد تلقمينهم كميات السكر المهوله، يجلسون يصارخون بأعلى صوت، فم الواحد منهم تقول ثقب أسود !
 .
والمشكله إذا الواحد كان في مكان عام وقرر فجأه أنه يصير أب مُربي ويستخدم أساليب جديده، يسمع ولده يبكي بأعلى صوته، يقوم الأب الحكيم يقول لزوجته ( اسفهيه خليه يبكي، لو أعطيناه الي يبي بيتدلع ) يااااااااااشييييييييييييخ !!!
.
مسكت معاك تربي ولدك عند خشمي؟ يصدع راسي وأتوتر علشان ولدك يتعلم درس من دروس الحياه، ومصيرك ترجع البيت ويبكي وأنت نايم وتقوم تعطيه الي يبي متناسي كل مبادئ التربيه الحديثة حقتك..
 

ولد وفي فمه ملعقة من ذهب..

 

 * صباح الخير * 

No English translation because it’s a damn subject that I can barely write it once !
.
.

سلكت أم السالفه عليهم، بس ما تنفتح هالسيره إلا مع ربعنا وبلاش فضايح وفشله عند الغرب..
أنا مب من الحزب الفله الي يروحون يشتكون للبيت الأبيض 😂😂

.
السالفة فضفضه لأن قلبي غرق واختنق وماعاد أقدر حتى أرسم ورده أو أكتب اسمي بدون ما أخرق الورقه..
جيبوا قهوتكم أو سطل شاهي قبل القراءة
.
.

تنويه مهم للذكور لو أحد منهم تواجد هنا وقرأ الموضوع، ما عمري أعمم على سائر الرجال 
وما عمري أفترض الأسوأ منهم، صحيح أني غاسله يدي منهم بس أدرك تماما ً أن فيه نسبه جيده منهم يستحقون الاحترام، لكن مب لأنهم ذكور، لأنهم أوادم بغض النظر عن جنسهم، الاحترام يعطى حسب العقليه والأخلاق والمبادئ، ما يهم ذكر أو انثى..
وفي كلامي أتكلم بشكل عام لكن أتمنى توصل الفكره اني مب مجنونه جايه أتهم كل الرجال بهالأمور، بالمقابل ترى ياكثر الحريم والبنات الي ودي أحطهم بحفره وأقفل عليهم، مافيه جنس كامل لأن الجنس مب معيار..

.

.
 وريث الآلهة 

فتح عينه على هالدنيا وإذا به ذَكَر، (فيزيائيا ً طبعا ً.. ويا كثر الذكور الي أنا أرجل منهم مع كل ما أبديه من نعومه مطلقه)..

المهم، فتح عينه على هالدنيا كرجل، ما كان بيده يختار جنسه، لكن حتى لو كان باختياره فبالتأكيد راح يختار أنه يكون ذكر
 أكيد يعني، مب هو الجنس الأعلى؟
.
ولد وفي فمه ملعقه لعينة من ذهب ، هالعباره ما تنطبق في الحياة إلا على الرجال في مجتمعنا..
يعني انولد ومعاه كل الامتيازات والأولوية والأفضلية، لمجرد أنه ذكر طبعا ً..
في مجتمعنا يؤمنون أن الله أعطى الرجل امتيازات، هالامتيازات ما استحقها ولا عمل علشان يكسبها، إنما تعطى له تلقائيا ً لمجرد أنه ولد ذكرا ً..
وعليه فان الجنس الآخر أي الانثى، مجبر على الخضوع والطاعة لأنه انولد كالجنس الأدنى، وطبعا ً مين حط القوانين؟
يقولون أن ربي فرض هالتقسيم، اتهام خسيس، والدين بريئ عن هالقرف
وأدلتكم من القرآن لا تفشلون أنفسكم وتجيبونها ترى تفسيركم لها من كيسكم المخروق وحسب هواكم القذر..
.
لما كبر الذكر واكتشف الامتيازات الممنوحه له من السماء جلس وتربع وبدأ يصيح وهو يحك كرشته ويردد مع القطيع أن الدين عدل بين الجنسين وأن المرأة لها حقوقها كامله وأن الإسلام رفع من قدر المرأة ..
.
ولما ينظرون للشعوب الأخرى يلاقون المرأه معززه ومكرمه وسعيده، فتفاجأوا، كيف كذا؟ وافشلتاه خلونا نرقعها ..
فقرروا يلصقون التهم السيئه على الغرب ، قالوا أن المرأة الغربيه يتم اغتصابها في الشوارع ومالها قيمه ، لأنها طلبت مساواتها بالرجل وأنها ندمت على المساواه..
.
وقالوا أن المرأة في الغرب مالها كرامه وأنها زي الحلوى المكشوفه يتجمع عليها الذباب ..
وكلام كثير أخجل أقوله ، كلها حاجات غبيه ما تقنع إلا قليلي الوعي وضيقيّ الأفق..
يعني ما فهمت الغرب عندهم مساواه زي ما قلتوا وأنها انقلبت سلبا ً على المرأة؟ ولا قصدكم  الإسلام هو دين المساواه؟ لأن ما أشوف هالشيء مؤخرا ً..
.
وبينما يتربع الذكر ويتبطح نلاقيه يتبجح على الإناث ويقول لهم عادي انتوا ولدتوا كذا ومن كمال الدين انكم تتقون الله وما تعاندون..
يعني ربطوا كمال الدين بالخضوع لجنسهم العجيب، المرأة الي تطالب بحقها هذي فاسده
والرجل الي يطالب بحقوق المرأة يقولون عنه ديوث.. ويقولون له المتدينين ( جيب زوجتك أو أختك عندي طالما عادي عندك )
ممتاز يا متدينين ، الرسول صلى الله عليه وسلم واجه أنشب خلق الله الي هم كفار قريش، ما عمره استخدم ألفاظ زي هذي..
بس المتدينين عندنا إذا اختلفت معهم في الرأي يسبونك ويطلع المنحرف في داخلهم ، جانب من شخصياتهم تفكيره محصور بين الساقين وأعتذر على هالوصف بس كذا أغلبهم الي أشوفهم يناقشون في النت ..
.
سائر الأيام تحصله يتباكى ويقول أحاديث وينشر آيات ويتمسكن
وإذا حشرته وقلت له أن الشيء الفلاني حلال وأن الشيخ الفلاني أخطأ، ينهال عليك بالقذف والسب
ويطلع انسان بذيء ومصطلحاته تخليك تحلف أيمان بالله أنه توه كان يتفرج فيلم إباحي ..
.
الي يقول لك (مافي داعي لكشف الوجه احتسبي الأجر حتى لو فيه خلاف فقهي والمؤمن الحق يجتنب الشبهات) <– قل قسم
هو ما يجتنب الشبهات ولا حتى المحرمات طبعا ً لأنه رجال معصوم، عادي يقذف ويسب ويظلم زوجته وبناته بمنطق مريض واستعبادي..
مجتمع سااااكت عن مخالفات الذكور من خمور أو شذوذ وإباحيات، كلها ماحد يقول عنها شيء بالعكس يعتبرونها متنفسهم الوحيد..
بس إذا حرمه كاشفه وجهها أو موظفه قذفوها وهاجموها..
المقزز في الموضوع انهم حافظين أحكام المرأة كلها علشان يحصلون احد يطبقون عليه ويتفلسفون..
ادخل مقاطع مكياج احصل الرجال في التعليقات أكثر من الحريم وكلهم ردودهم تسم البدن
( صوت المرأة عورة ) ( لايجوز كشف اليدين ) ( المناكير تبطل الوضوء ) ( التشقير حرام يا **** )
ومدري وش مدخلكم لقناة مكياج؟ صدق مالهم شغله
اصابعهم في خشومهم ويدورون احد ينصحونه علشان ياخذون اجر بدون ما يتعبون يعني....

.

.

لكل جنس دوره في الأسره 

الرجل سهل عليه يمشي ( رياضه ) في الممشى بلبس رياضي مريح وملائم وصيفي..
لأنه ما جرب ينكتم تحت غطاء الوجه في الحر ومع المشي، وما جرب يلبس قماش أسود يسحب الشمس زي المجهر..
اوه لحظه لحظه، وش الي رياضه ومشي؟ المرأة مكانها المطبخ ، تلبي مطالب الرجل ..
ايه لأنه يشتغل برا ويتعب ويجيب لنا لقمة العيش..
راح الغابه وبدأ يصيد الغزلان ولما خلص راح يقطع الأغصان ويجيب حطب للموقد..
وهراوته انكسرت وهو يدافع عن زوجته من تنين حاول يختطفها..
.
في مجتمع ما، الرجل يعتقد أن الله قد فرض له امتيازات حتى لو كانت الأنثى أحق بها،
 حتى لو كانت أعقل منه وأقدر منه وأقوى وأذكى، تبقى أنزل منه !
.
يعني وحده دارسه بالجامعه ومتعلمه وواعية تتزوج درباوي وصخ ثوبه وفنيلته مصفره من وصاخته..
ومع ذلك يجي يتفرعن ويقول ( الرجال قوامون على النساء ) قامت عليك الدابّه يارب ..
لو الرجال يعرفون المعنى الصحيح لهالآيه كان صار المجتمع مكان أفضل وكان وقفوا عند حدهم وعرفوا قدرهم..
بس إذا بعض الشيوخ يستخدمونها بالمعنى الخاطئ (عمدا ً) فما أقدر ألوم القطيع على هالغباء..
فيه شيخ (مابقول اسمه معروف يحبونه البنات مدري ليش) استدل بهالآيه في إحدى تغريداته عن إسقاط الولايه!!
والله أنه يعرف معناها الحقيقي بس وش نقول غير حسبنا الله .. يلوون الآيات والأحاديث حسب الي ينفع الحاله ..
يقولون أن الرجال أكثر تقوى، ودايم يرددون الله يصلح بناتنا الي ينغرون ويتأثرون بسهوله..
لا يا روح أمك، أنت حتى لو تجيب كافر يمديه يصير ملتزم طالما أنه ذكر، لأن ماعليه شيء إلا إنه يطيل اللحيه ويبدأ يطارد الحريم يضيق عيشتهم..
سهل عليكم التدين، لأن دينكم سهل ، كله حلال وما حرمتوا شيء على أنفسكم، بس تعال للحرمه كل شيء حرمتوه عليها ومع ذلك لازلنا أقوى إيمان منكم لأن الايمان في القلب مب باللحيه ولا المظاهر..
كثير عوائل تلاقون حريمهم مع كرفهم في رمضان يختمون القرآن وما يفوتون التراويح وبعدد ما يمزح من الركعات..
بس رجالهم مع أنهم متبطحين بس يقرون صفحه من القرآن متى ما طفشوا ويصلون التراويح في المسجد لأنهم متبطحين طول اليوم يعني مالهم وجه ولا فضل ..
ومع ذلك لا زلنا في نظرهم ناقصات دين .. الحمد لله والشكراقسم بالله ما شفت أنقص من عقول رجال مجتمعنا ( المتمسكين بالشيوخ ورجال الدين والتقاليد الفارغه ) تناقشه فيبدأ يلف ويدور في حلقه مفرغه وإذا انحشر مستحيل يهدأ ويفكر ويقول “يمكن” أو “الله أعلم” ، لا طبعا ً، يبدأ موال السب والإنحطاط الأخلاقي...

..

.

مين الي تسبب في انحطاط أخلاق المجتمع؟

نبدأ بمثال بسيط، قيادة المرأة، ما كان فيه حجه للمجتمع علشان يمنعون الأنثى لحد ما بدأ بعض رجال الدين يحرضون الشباب على التحرش بالبنات، ووجهة نظرهم أنه نوع من التحرش المشروع علشان يردعون البنات من القياده وبالتالي يحمونهم من الأذى ..
والطامه الكبرى لما رجل دين معروف يصرح في برامج على الهواء يقول أن الدوله غير آمنه للمرأة، وأنها خارج البلد ممكن تقود بأمان !
( بغض النظر عن أن كلامه يعني بوضوح أن الشغله مب دين وإنما أهواء شخصيه )
يعني بلد الإسلام صار مافيه أمان، بسبب مين؟
مين الي حرض الشباب الدرباويه وقال لهم تحرشوا بالبنات؟
مين الي أعطى الشباب فكره أنهم مايعرفون يمسكون نفسهم؟ لين فين وصل التلاعب بالعقول؟ دايم من طفولتهم يسمعون أنهم عباره عن ذئاب ولازم نغطي البنات من الشباب الذئاب لأنهم حيوانات ماعندها عقل
طيب أبفهم شلون صاروا هم المسؤولين والأولياء والقوامين؟
توهم كانوا ذئاب ويتبعون شهوتهم.. ياكثر تناقضاتكم
.
.
فوبيا التقدم 
.
لما غاده المطيري عملت انجاز يشهد العالم بعظمته، جو رجال مجتمعي يقولون الله يخسها فين الحجاب؟ 
يقولون لو أنها تركت الانجاز هذا وجلست في بيتها كان أرضت ربها وأنه راح يعوضها في الجنه بشيء أفضل..
.
البنت اخترعت شيء ممكن ينقذ أرواح كثيره وأنت ماغير حاط أصبعك في خشمك..
عندنا مبدأ انهزامي يحرضك على احتساب الأجر بالجلوس فقط، ولا تحاول تتحرك من مكانك..
عفوا ً قصدي احتساب الأجر على حساب غيرك، طارد الناس بالأمر بالمعروف وترويع الآمنين، وأنت هكذا صرت ذو منزله عاليه أكثر من أي عالم ذره..
.
ذكروني بكلام قاله د.مصطفى محمود
( إذا نزل مؤمن وكافر إلى البحر فلا ينجو إلا من تعلم السباحة، فالله لا يحابي الجهلاء.. فالمسلم الجاهل سيغرق والكافر المتعلم سينجو )
.
.
أنا أزعل لأن فيه ناس لما تشوفك تغلط على رجل دين ( مخطئ ) ممكن تنهي علاقتها معك إذا ما أساءت لك أو حتى قذفتك..
يعني لهالدرجه أنت تتبعه بدون تفكير وتعتبره يمثلك تماما ً؟
طيب هو أخطأ وسبب مشكله في المجتمع وظلم ناس كثير بغلطته هذي، ليش تزعل لما المتضرر يتكلم ؟
رجل الدين مب معصوم من الخطأ فليش تعبده؟

.

.

الملحدين

.

سبب إلحاد بنات كثير في مجتمعنا هو أن الدين أصبح ضيق لا يطاق، لأن الناس ضيقوه ..
والمشكله لما أحاول أصحح أي معلومه دينيه أتعرض لهجوم وبأساليب سيئه جدا ً، خلتني أقرر ما عاد أصاحب أي شخص يحمل تقديس لرجال الدين بدون احترام لعقله وقدرته على التفكير والتمييز..
ولا راح أتقرب من أي شخص يحاول ينصحني في الدين ويعتبرني جاليات ما أفهم في الدين وأردد كلام أسمعه فقط ..
.
فيه لعبة اونلاين كنت ألعبها قبل فتره وفيها ناس من كل البلدان الي أعرفها والي ما سمعت بها من قبل..
مره شفت مسيحي يتكلم عن الله والأديان ويسألني عن هالأمور من منظوري كمسلمه
وهو شغوف بهالسوالف يحب يسمع عن الله والدين والمعجزات، ما يبي يسلم ولا يبيني أصير مسيحيه، يؤمن أن الأديان زي بعض..الكلام مع المسيحيين (المعتدلين) يخليك تستمتع لأنهم مركزين في دينهم على الله وعلاقتهم فيه.. احنا تركنا الله ورسوله وتبعنا الشيوخ
وخلاص قمنا نضارب بعض، نكفّر بعض، نقصي بعض ونتهم بعض ونتفاضل بين بعض ..
حزب الشيخ الفلاني، وحزب المذهب الفلاني والزفت الفلاني خلااااص ما طفشتوا وش هالقرف؟
نسوا أن الدين أولا ً طقوس شخصيه بين العبد وربه وثانيا ً أخلاق وسلام.. ما أشوف الحين لا ذي ولا ذي ....

غرباء *خجلت وأنا أكتبها يمين بالله*

كـــــــــل هذا في كفه وسالفة الـ”غرباء” في كفة أخرى ..
قال لك هذا حديث عن رسول الله، وفهموها أنهم هم الغرباء.. وبدأوا يتمسكنون ياعمري، نحن الغرباء يا الله ارفق بنا..

توضيح علشان الي يردد “نحن غرباء” زي الببغاء وهو مب فاهم..
المقصود بالغرباء في الحديث هم المسلمين ، يكون فيه زمن يصبح عددهم قليل جدا ً مثل أول ما بدأت الرساله يعني في عهد الرسول أوكي؟
وش معناها؟ معناها أن يكون عدد المسلمين قليل..
طيب الإسلام الآن منتشر وعدد المسلمين حول العالم يفوق الوصف أتوقع ما كان عدد المسلمين في التاريخ يفوق عدده الحين..
الحين عددنا يفوق عدد المسلمين في زمن الرسول صح؟ طيب إيش فيه؟ يعني باقي ما جاء زمن الغرباء حقكم!..

.

تدرون بإيش يتحججون الحين؟ يقولون أن المقصود المسلمين المتدينين المتمسكين بالدين وليس المسلمين عموما ً..
الحديث واضح بلاش كذب وتأليف، قصدكم كل المسلمين حول الأرض إسلامهم غلط أو كفار؟ كعادتكم إقصائيين حتى في فهم الأحاديث..
نستنتج من هذا أنه ما جاء الزمن الي يكون فيه مسلمين غرباء، يعني بالله ارتاحوا وريحونا ، قال لك غرباء ..
أساسا ً إذا جا وقت الغرباء فبيكون بسبب التنفير من الدين لحد ما يبقى على المله إلا ناس مب قريبين حتى من الدين الأصلي.

.

.

الإسلام دين العقل <–Not anymore

عشنا كثييير في ظل الدين ( الخاطئ ) وماعمرنا تقدمنا بالعكس لازلنا في الخلف.. تاريخ المسلمين لما كانوا متقدمين كان دينهم صحيح ومتسامح كما هو ، بدون إضافات وتضييق، يوم كانوا يدقون عود وموسعين صدورهم ومسوين جامعات والحريم فيهم الطبيبه وفيهم العالمه.. بس طبعا ً مجتمعنا يدفن السوالف ذي علشان ما نروح نقتدي في هالحريم الناجحات ونترك المطبخ، ويجوع رجل الكهف..
.
تعرف أن الشخص على خطأ لما يقول  لك ( كل الناس غلط وأنا صح )
وهذا حالنا ، نفترض أن الدول الإسلاميه الأخرى ماعندها دين كافي علشان تفتي، وأن أي خلاف فقهي معناها
نرجع لحكمنا احنا لأنه صح ! كذا بس احنا صح لأننا منبع الوحي؟ وش هالخربطه؟
طيب هم استندوا لأدله ومنطق يقنع، بينما أنتوا ما اقنعتونا بس تقولون اتبع وأنت ساكت..
والمضحك لما يقول لك أجمع العلماء، وهم ما أجمعوا إلا عندنا هنا ، باقي البلدان ما أجمعوا ..
.
إذا رفضت تفتح مخك وتسمع الطرف الآخر فأنت دايم غلط لأنك تقفل أذنك، زي ما علموك
( لا تناقش في الدين، لا تفكر كثير علشان ما تلحد )
يعرفون أن الي يفكر بيلحد لأنه بيلاقي تناقضات مختلقه ومستحدثه من الساده الكرام في الكم جيل الي راحت ..
.
كلام الحق دايما ً مقنع وماعليه غبار، بس للأسف الي أشوفه أن أي رجل دين يجيه سؤال عن مسألة معينه
ما يحاول يقنعك بطريقة صحيحه ترضي عقلك كإنسان عاقل، لا، يقول كلام مكرر وملقن وتحسه أبيات شعر:
يا شيخ بعض العلماء أجازوا كشف الوجه فماذا ترى؟
ج:

اوكي ومين يقرر فين الحدود بين الصح والخطأ؟ وليش ما يكونون هالناعقين بالفتنه يطالبون بحقوقهم فقط؟ أنا أبي تفسير وكلام واضح لأني أشوفها آراء شخصيه بدليل اتفاقها مع عادات مجتمعنا الي أساسا ً من الجاهليه هذي حركاته، مافيه جديد..
بينما مسلمين الدول الأخرى الي عادات رجالهم تختلف عن رجالنا، نحصل حدود أحكام المرأه عندهم أوسع نوعا ً ما..
يعني الشغله عادات مب دين..
لما تشوف أحد يسأل علامه أو مفكر إسلامي كبير تلاقي هالعلامه يقنعه بالمنطق وتبدأ تقتنع معاه
يبدأ ينفتح قدامنا باب من الأمل والسعاده ونبدأ نعجب بديننا كيف هو عظيم ومعجز في كل آياته..
نبدأ نتنفس الصعداء ، الحمد لله يارب على نعمة الإسلام الصحيح المشرق الي كنا فاهمينه غلط طوال السنين..
بس ما يمدي هالعلامه يكمل كلامه إلا جوك ناس “ناعقين بالفتنه” ويكفرونه وخلاص أنت كذاب أنت زنديق تبي تظلنا عن ديننا....

.

.

الفضائيين يسلمون عليكم  

اليوم قرأت خبر قديم نوعا ً ما، علماء الفلك رصدوا موجات من الفضاء الخارجي يعني يقولون يمكن فيه كائنات أخرى..
هل نصدق أو لا مب مهم، بس شوفوا الناس شغالين واحنا جالسين نناقش لو يجوز الحرمه تتوظف ولا لا ..

المهم تخيلت فيه كائنات ثانيه، يااافشلتنا لو يدرون وش مسوين في كوكبنا..
حسيت بعد هالخبر أننا شيء ضئييييل وتافه في هالكون، ومع ذلك نشوف همومنا كبيره جدا ً..

هذا كان تنفيس عن ما في خاطري ويمكن يمكن ينحذف بعد ما أروق

.

 

يسمعون بالأسلوب !

 

لابد اني أقول هالسالفه لأنها من السوالف الي مايروح أثرها إلا إذا تكلمت عنها وسمعت آراء..
هالشيء تأجج في نفسي اليوم بينما أنا منسدحه أفكر في المطر وأقول ( نفسي أوقف في المطر فتره طويله ) <– برد يا فله
بس بعدها تذكرت أن هالشيء حصل من قبل وما كان شيء سارّ !!

المقدمه تحسسكم أنها سالفه خطيره 😂😂 ترى مب سالفة كبيره بس تخليني أعصب كل ما أتذكرها
علشان كذا قلت أشوف وش رايكم انتم

في أحد الأيام الماطره، بعد الاختبار طلعت انتظر أخوي يجي ياخذني..
وما أتذكر هل كان الاختبار سيئ ولا إيش الي حصل بس كنت متضايقه لأبعد الحدود والأخ الفله متأخر عليّ فوق هذا..
قلت له الساعه الفلانيه تكون عند الباب ! وتعديت نص ساعه واقفه عند الباب..
جلست تحت المطر أنتظر وأتصل عليه وجواله مغلق، أتصلت على أمي وأهل البيت كلهم
وكلهم يقولون ما ندري فين راح بس هو طلع من زمان <– حركاته كذا دايم، مب أول مره يسويها الوغد 😠

وبدأت الوساوس، يمكن صار له حادث، وجلست أتخيل الأسوأ وخفت، والنفسيه صارت في الحضيض وبقي لي تكه وأنفجر
جاتني وحده أشوفها متجهه عندي مب رايحه للشارع

حزروا ايش؟
جات وحطت يدها على وجهي بطريقة حسيت أننا نصور فيلم رومنسي .. دقيقه أوريكم صوره تشبه الموقف علشان تنصدمون معي..

حاطه يدها كذا تخيلوا !!! وتقول لي ( الجنه غاليه! )
أنا مارديت لأني مافهمت، هذا سؤال ولا سالفه باقي بتكملها ؟ قلت لها ( هاه؟ ) <–أبو الدلاخه انتي بعد
رجعت تعيد جملتها ( الجنه غاليه !)بعدين فهمت أنها تبي تنصحني وقصدها تدخل دخول مسرحي عظيم بمقدمتها الدراميه ( الجنه غاليه )
واكتشفت أنه سؤال وليس سالفه .. لكنه سؤال سخيف زي مقدمتها ودخولها البيض..والرجال في الشارع كلهم يطالعون فينا، شكلهم يحسبوننا ليزبيانز جالسين نودع بعض..
ولشدة صدمتي كان استيعابي بطيء، وأدركت أن يدها لسه على وجهي 😂
رحت بعدت يدها من وجهي وقلت ( ايوه؟ ) لأني جد انخرشت، وش هالبنت ؟
قالت ( ليش الاستهتار بالحجاب؟ وbla bla bla ) <– ما أذكر وش قالت لأن الدنيا فجأه صارت بريال عندي
وكان نفسي أطعنها ، نااااقصتك الحين؟ ألاقيها منك ولا من أخوي والمطر الي بيخليني أمرض بوسط اختبارات؟
انتي في وادي وأنا في وادي !! كانت خانقتني العبره من الموقف الي أنا فيه من قبل لا تجي <– انفجار هيروشيما داخل عقليبس رجعت لرشدي وقلت لها ( جزاك الله خير ) ولفيت وجهي لجهة الشارع أكمل انتظاري علشان تنقلع عني..

بس هي باقي مصره !!
والمشكله أشوف بنات طالعين من المركز عبايات مفتوحه وعطورهم أشمها لين بيتنا ومكياجهم كأنهم في زواج
^ ما أقصد أحكم عليهم لو غلط أو صح، بس قصدي أنهم كانوا مبالغين أكثر مني

لكن ممكن علشان أجسامهم ضخمه ما تتجرأ عليهم 👀 جايه عندي وحسستني أني لابسه ملابس السباحه وطالعه الشارع !

ما أدري وش أقول ، قال لك اسلوب يعني؟
متدخله في خصوصيتي ولو هي تبغى تنصح كان راحت للباقين وش معنى جايه عندي وأنا ما لفتّ انتباه أحد؟
المشكله لي نص ساعه وأكثر واقفه عالشارع وماحد يناظر لي، لين جات هي بالمشهد المخل الرومنسي حقها
صاروا كل الرجال يناظروني حتى بعد ما هي راحت ..

الواحد يتعلم آداب البشر قبل لا يطلع الشارع، تمد يدك وتمسك وجه أحد هي أكثر حركه ممكن تسويها إذا بترفز أحد وتفوّر دمه وتنبقس..
والله أفكر لو ما كنت متضايقه من قبل كان ممكن يصير ردة فعل سيئه أندم عليها؟
لو كنت فرحانه ومبسوطه والجو حلو وجات فجأه تنكد علي وأنا في كامل قواي العقليه والنفسيه، وش ممكن يصير؟

^
ترى مستحيل أضربها يعني، بس الصوره تبرد الخاطر ههههههههه

اوكي، هل الموقف هذا عادي، تجي وحده من آخر الدنيا تمسك وجهك وتتكلم معاك؟
لو مكاني وش بتسوون؟ معي حق في زعلي من سالفة اليد ذي ولا عاديه؟
ملاحظه، الموضوع مب على سالفة أنها تنصح، مع أن لبسي كان ساتر لأنه برد ومافيه شيء تنصحني عليه
بس أتكلم عن حركة اليد البايخه

دراسة حول تصفيق أبواب السياره بأقوى ما أوتيت من قوة

هالسيناريو يصير وقت الاختبارات، لأني ما أكون في أحسن حالاتي العقليه والنفسيه:
– أطلع من السياره *طراخ* أقفل الباب بقوة كأني super saiyan
– ينفتح شباك السياره وأسمع عبارة: “وجع!”
–  أرد: “خلاص ياخي دايم أقفله بهدوء، بس الحين رايحه أختبر ومخي مشغول، مب ناقصه بابك المقربع ذا”
– “ما المقربع إلا انتي ، هالباب لحاله قيمته 6000 ريال”

——
يوم كنت صغيره كان أبوي يقول قفلوا باب السياره زين علشان ما تتكون عليه وينفتح واحنا ماشين <– سبب لنا رعب.
مرات أدخل السياره وأقفل الباب ويقول لي “ارجعي افتحي الباب وقفليه لأنه ما تقفل زين
أروح أصفق الباب بقوه، ويقول لي “ممتااازه” <– هو الي علمني أصفق الباب لدواعي السلامة
لكن هالكلام لأننا كنا صغار، فالقوه الي ممكن أطلعها عالباب تعتبر ولاشيء بالنسبه للباب.
كبرت وصرت بالثانوي، وأبوي اشترى سياره جديده كانت عاجبته مره وتعلق فيها..
وأنا باقي أصفق الباب لدواعي السلامه يعني.. وصار يقول “ماشاء الله، فيه بينك وبين الباب عداوه؟
 –
بعد فتره كنت أركب سيارة أخوي وكان الباب اليمين من ورا فيه مشكله ممكن ينفتح
والأخ ما يبي يصلحه متكاسل، فكنت أضطر أصفقه بقوه خارقه علشان يتقفل.
أخواني اشتروا سيارات جديده، عشقوها بشكل مجنون وصاروا يصمقونا كل يوم يقولون “شوي شوي عالباب!!

وصرت أقفل برفق..

بعد  سنوات، صارت سيارة أبوي قديمه.. وكنت متعودة على سيارات اخواني أقفل الباب بهدوء..

 

وأتبع هالأسلوب في سيارة أبوي علشان ما يقول بينك وبين الباب عداوه..
بس أتفاجأ أنه يقول “الباب ما تسكر، قفليه بقوه بلا دلع خليك رجال” <– دايم يقولها يشككني في انوثتي
أروح أصفق الباب بقوه فيقول “ايوه كذا، خليك شديده
 

آخر مره ركبت مع أبوي وقال قفلي الباب زين، قلت له “ترى ضعنا بينكم، أنت تقول بقوه وأخواني يقولون شوي شوي عالباب
قال “ياشيخه أخوانك مدلعين خايفين على سياراتهم المدلعه، أنا أخاف عليكم، علشان كذا أقول قفلوا زين
قلت لأخوي هالكلام، رد علي: “I don’t give a shit… أنا يهمني الباب لأن سعره بحدود 6000 ريال” 
وش هالباب >_>؟
المهم جاني انفصام اسبوعين
بعدها صرت أقفل الباب حسب سائق السياره ..
بس يعني ترى ماصرت أقفل الباب بأدب إلا بعد ما شفت اهتمام أخواني بالسيارات
يهتمون فيها ويخلونا احنا بعد نهتم فيها ونحبها..
الي يهمل سيارته وما يهتم ويقربعها لا يتوقع أخواته أو بناته يهتمون.
بعدين يجي يقول البنات يقفلون الباب بقوه، انت اهتم بسيارتك بعدين احنا نهتم.. وتراكم أذيتونا..
^
واضح نعسانه وأنا أكتب