فرق شعره بين الانطوائيه وعيش الحياة بشغف

Untitled-2

كنت متحمسه من العيد أكتب حاجات جديده بشكل اسبوعي لكن حصلت شغلات ما أعطتني فرصه أرجع.
.
بكتب شيء كان يقرقع في صدري بكل صراحه وشفافيه وانفلات، لأن هالشيء يمسني شخصيا ً وأعتقد انه يمس ناس كثير راح يفهموني ويمكن يفهمون أنفسهم لأن أنا ما كنت أدري عن هالشيء فيني إلا من فتره
.
وش سويتي هالاسبوع؟” هذا السؤال صدقي وعميييق، كم مره أسمع ناس يسألون بعض ويطلع جوابهم زفت متنيل بستين نيله. لأنهم حرفيا ً ما سووا شيء. رصيدهم من الحياه لهالأسبوع كان صفر.
ما أتكلم عن الانجازات والخطط.. أتكلم عن رصيدك من العيش على هالعالم، مجرد العيش.
.
لازم اعترف اني شخص يدخل أطوار غريبه متعدده خلال السنه، كنت أحسب اني غريبه ومتخلفه بس اكتشفت ان وضعي سليم لأن فيه تفسير منطقي طلع في الأخير.
كنت أستغرب ليش ممكن تمسك معي 3 شهور كامله قرفانه من الناس وأحسهم يشغلوني عن حياتي وما أبي أتكلم وأسولف سوالف عاديه؟ أنا مو انطوائيه، أنا بس أعيش الحياه ..
أحب أعيش حياتي مع نفسي أحيانا ً، أتواصل معها ومع الحياه.
.
احنا ناس تغلغلنا في حياة بعض، في حياة ناس ما نعرفهم ولا يفترض بنا نعرف عنهم كل هالقدر. متابعين حياتهم ونعرف عنهم أكثر من أقاربنا وجماعتنا. أحيانا ً يكونون ناس مهمين لنا فعلا ً مع أننا ما تقابلنا في الواقع، لكن برضو يكون غلط اننا ننخرط بحياة بعض طوووول الوقت.
ما يفترض اننا نعيش مع بعض بهالقرب، نحتاج نطلع من خشوم بعض. مو معقول احنا فاتحين برامج تواصل طول اليوم وأي أحد يرسل نرد من وقتها ! لأي حد ما عندنا حياه؟
.
إذا غاب عنك شخص كان موجود في وسائل التواصل لا تتوقع ان فيه مصيبه حصلت له، بالعكس هذا عايش حياته صح <– اقتباس من كلام اختي
وسائل التواصل مب حياه، وقتك الي تقضيه على تويتر/فيسبوك /انستجرام /تليجرام /واتس آب /سناب وغيرها مو حقيقي، أنت ما عشت شيء، رصيدك من الحياه لهالاسبوع صفر كبر راسك.. مجددا ً نرجع نسأل “وش سويت هالأسبوع؟” هذا بيكون توبيخ أكثر منه سؤال، لأنه بيخليك تكتشف انك ما سويت شيء، مهما كان الي قدامك متبطح أو يقرأ أو حتى ياكل ويشوف مسلسل فهو عاش أكثر منك.
.
لما أدخل برنامج وأجلس عليه أون لاين طول اليوم معناها أنا وصلت الحضيض، أتكلم عن نفسي هنا. اذا شفتوني فاتحه برنامج تواصل معين طول اليوم أو أرد على رساله في نفس اليوم معناها عندي مشكله ووصلت قعر الجحيم في حياتي الواقعيه علشان كذا هربانه ورايحه عالم ثاني.
لأني لما أكون في حاله سليمه ماراح أجلس بدون شغله أنتظر أحد يكلمني وأرد عليه. غالبا ً بكون مشغوله أعيش الحياه وأمارس هواياتي. وأضمن لكم وأحلف أن مشاهدة حياة الآخرين وانجازاتهم مب من بين هالهوايات. حتى لو كان حساب مفيد، إذا ما كان مجال واضح مهم أنا أحتاجه في حياتي اليوميه فما راح أضيع من وقتي في شيء ثانوي، بالاضافه اني أتابع شخصين أو 3 بالكثير كل فتره، ما أتابع مليون واحد بنفس الوقت. يعني ما أجلس طول وقتي أتابع حاجات مفيده، وش الفايده تكون متلقي وما تلاقي وقت تمارس الي تلقيته من فوائد؟ تصير شخص ماعنده إلا تنظير وكلام، مافي تطبيق.
.
الناس يبغالون في العيش مع بعض، ماصار فيه حواجز بيننا، الجوال صار آداة استحضار للناس قدامي، مافيه خصوصيه، ما تقدر تجلس على جوالك تسمع كتاب مقروء أو تستخدم برنامج مفيد بدون ما ينط لك تنبيه أن فيه أحد طفشان يبغى يرمي طفشه عليك.
وما يقدر الواحد انه ما يرد. عن نفسي فيه حالات أحب أجلس 3 أيام ما أرد على رساله، مع أني ممكن أكون قرأتها من أول يوم. بعد 3 أيام أرد رد رايق ولطيف ما أفجعك فيه. ممكن أشوف تنبيهات وأطنشها لأن عندي شيء أفضل أسويه لو ان شاء الله أنسدح عالسرير أرتب أفكار مخي المتزايده كل ثانيه بشكل يصدع.
.
hobbit NO
مو من حقك تلح على الشخص أنه يكون موجود لأجلك ويرد عليك ويكون متفرغ يسولف معاك أو ينتشلك من كل حفره تقع فيها خاصه لما يكون شخص تعثر في كل الحفر سنوات وماحصلك ولا مره بجنبه. ما يحق لك تتوقع من الآخرين يعيشون معك أجواءك ويكونون مبسوطين بالحاجات الي انت مبسوط فيها وتبغى تشركهم معاك بالغصب.
.
hobbit.gif
طيب، هل ياترى أصبح موقفي واضح الحين؟ واضح الحين ليش تمسك معي كم شهر أختفي من الناس وما أرد ولا أبغى أكلمهم ولا أبغى أمارس معهم أي نشاطات ولا سوالف؟ توصل لحد التهرّب.
طفحنا من أجهزة بعض، ليش نبغى نكون سوا طول الوقت وكل واحد يحسب مافي إلا هو بحياة الطرف الآخر؟ عندي سياسة خصوصية شديده تخليني ما أبيّن اني جالسه أتعامل مع مشاكل أشخاص آخرين وهالشيء يبين كأن ما عندي شغله وكأني حاطه اصبعي بخشمي. هذا الشيء يسبب ضغط وفي الأخير ردة فعل متطرفه زي ردة فعلي الي ما فهمت سببها إلا قريب. أشوفه ارتباط قوي والتزام كبير انك تعيش مع الآخرين أو تقرأ كلامهم أو تسمعهم كل يوم.
لدرجه ما أقدر أكتب في المدونه علشان ما يجي أحد يقول اهاا تطنشني في الواتس/تويتر وهي فاضيه جالسه تكتب في مدونتها.. بالأساس مشاكل البيوت من داخل تكفي وتوّفي والواحد يكون عنده من القرف الي يكفيه انه يبغى يجلس مع نفسه بعض الوقت.
.
.
من كم شهر كنت أبغى أوصل لمرحله اني أحذف تطبيقات التواصل من جوالي، والحمد لله راضيه عن النتيجه لحد الآن. سناب / تويتر / انستجرام ما صارت من ضمن تطبيقات جوالي .. تيليجرام ما أتواصل فيه بس أتابع قناه وعامله لها ميوت بس أفتحها كل اسبوع أشوف الجديد فيها وأطلع، والواتس ما أقدر أحذفه علشان عائلتي تستخدمه للضرورات. بس كل واحد يقدر يحدد كم يقضي على هالتطبيق، عاد من أول ما أطيقه يعني ما منه خوف.
بالنسبه لتويتر والانستا أصلا ً تابعه لمدونتي وعلشان كذا أقدر أستخدمها من لابتوبي في الوقت الي أكون فيه أشتغل على المدونه وأعمل مشاركه من هنا.
فيه ناس كانوا مفيدين على السناب بس ما يجي يسحبني لين عنده علشان يربح له كم قرش وأنا الضحيه الي أخسر وقتي أكثر من استفادتي بالمحتوى الي يطرحه أيا ً كان. عندك فائده اعرضها في مكان زي الناس مو تسحبني أحمل تطبيق علشان أسمع وش عندك.
.
أتمنى فعلا ً لو الناس تخفف على بعض وتقلل هالنوع من العيش الي يحسسني ان العالم كلهم عايشين بنفس البيت ويطلعون سوا ويدخلون سوا وياكلون سوا. الحياه مو كذا. إذا كنت تحسب انك عايش صح بهالاسلوب فأنت مب عايش أصلا ً.. خفف برامج التواصل وتواصل مع نفسك أفضل لك.
.

 

subscription boxes

3
.
من عام 2004 تقريبا ً، ظهرت “هبّه” تجاريه فكرتها عباره عن اشتراك مثل اشتراك المجلات والجرايد
بس يكون شهري وعباره عن صندوق بداخله بضائع تكون لها نمط “ثيم” معين 
المشترك ما يعرف محتويات الصندوق بالتحديد، تكون مفاجأه يعني.
لكن يعرف عدد القطع أو الأغراض، يعرف عن ايش تتمحور لأنه يختار الاشتراك حسب الثيم الي يبغاه
مثلا ً بضائع تجميليهبضائع أنيميشنبضائع لمحبي الكتبمحبين الزراعه إلخ.. 
.
الصناديق الحين أصبحت متنوعه بشكل كبير ومشهوره، أمثله على أفكار المواقع الي ممكن تشترك فيها :
أنواع صابون – عينات شاي فخمه – أنواع فريده وفخمه من القهوه – أدوات تفيد الكتّاب/المؤلفين –  منظمات الوقت – أعمال يدويه – فيري جاردن ..
.
1
.
أفضل موقع بالنسبه لي، اشتريت منه صندوق واحد، بدون اشتراك يعني، بعض المواقع تسمح انك تشتري صندوق الشهر هذا وخلاص، بدون اشتراك وتجديد..
الموقع ماخذ نمط الكتب، خاصة الخيالية وتصنيف الـYoung Adult ..
.
.
يرتبون الأغراض بطريقه حلوه، كل صندوق يحتوي من بين الأغراض على كتاب أو روايه غالبا ً تكون توها نازله.. وبعض المرات يكون كتاب بإصدار حصري.. والأهم بالنسبه لي انه Hardcover .. أحب الغلاف يكون صلب، شكله يكون أكشخ ..
.
5
.
هذي محتويات الصندوق
.
2.png
.
.
الكتاب يكون آخر شيء في الصندوق، ويكون داخل كيس قماش أسود فيه شعار الموقع، يحطون معه بوستر وفاصل كتب ثاني، وبطاقه ( السوداء الي في الصوره الي تحت ) فيها رمز، تقدر تدخله وتحصل رفيق القراءة الخاصه بك .. حلوه الحركه..
.
.
4.png
.
هنا (في الصوره الي تحت) الأغراض بشكل أوضح.. الشيء الي عاليمين أعلى الصوره قاعدة كوب فيها اقتباس من كتاب.. العلبه الي عليها قلعه من برا هذي باث بومب..
العلبه السوداء الدائريه فيها مقشر شفايف ريحته حلوه.. البوستر أو اللوحه الي فيها بنت هي ثيم الشهر، ومن ورا مكتوب محتويات الصندوق بالتفصيل.. المغلف الأسود الي مكتوب عليه wake up شاهي  
.
 6.png
.
.
..
قائمة ببعض الصناديق أو الاشتراكات
اضغط الصوره الخاصه بكل اشتراك علشان يفتح الموقع الخاص فيه، وترى فيه مئات الاشتراكات غيرها
.
.
loot crate 
lootcrate ischerzo.png
لوت كريت موقع كبير فيه أنواع متعدده من الصناديق، فيه اشتراك خاص لمسلسلات أو أفلام معروفه مثل Marvel أو اشتراك خاص بـ Harry potter
ممكن للألعاب، Fallout والنكد حق نهاية العالم..
ممكن بشكل عام تختار اشتراك ألعاب أو أنمي أو تخليه عام هم يجمعون كل شيء على بعضه ..
.
هذي قائمة الخيارات في موقع Lootcrate 
.
 loot crate.png
.
مب كل مواقع الاشتراكات تكون فيها خيارات.. بعض المواقع توفر ثيم واحد وخلاص..
مثل موقع Fairyloot الي اشتركت فيه وشفتوا الصور في أول التدوينه ..
.
.
.
Fairyloot
كل شهر ثيم، مثلا ً الشهر الي اشتركت فيه كان اسمه Save the kingdom .. 
fairyloot may 2018.png
.
.
.
Japan Crate
 ( صندوق حلويات يابانيه ) 
japan crate.png
.
.
.
Birchbox
اشتراك لمحبين الأدوات التجميلية
Birchbox.png
.
.
.
Bomibox
اشتراك أدوات تجميلية وعناية بالبشرة من كوريا 
bomibox.png
.
.
.
Noobie box
اشتراك للحوامل والأمهات الجدد
noobie box ischerzo.png
.
.
.
هذا اشتراك غريب وأحسه حلو.. اشتراك لجرائم..
يوصلك صندوق كأنه أغراض المجرم وأدله ضده، وانت تحاول تحل الغموض، فيه مجتمع كامل لهالاشتراك
تتواصل معهم
hunt a killer.png
بس مب أي أحد يقبلونه، وما يصلح لضعاف القلوب .. 
.
.
.
.
وأخيرا ً هذي 3 مواقع برضو للكتب، بعضها فانتزي وبعضها لا 
.

مقارنه بسيطه wordpress.com vs wordpress.org

Untitled-4
.
مدونتي كانت تمر بمشاكل كثيره في الفترة الي راحت
والمتابعين انحذفوا عن طريق الخطأ ما حذفت ولا بلكت أحد والله 
.
كنت أجرب شيء والحمد لله ان هالتجربه صارت من بدري وأنا رايقه لها وكنت حاطه ببالي انها تجربه قد تفشل.
بس أبي أوضح أن الناس صارت تستهين في تظليل بعض، عن طريق اعطاء مشوره أو نصيحه عن شيء معين
يكون بناء على تجربه طبعا ً، بس يغفلون السلبيات في الأمر لأن لهم عائد مادي لو أحد جاء عن طريقهم.
.
لك نسبه هاائله ممكن تكسبها لو سجل أحد في الاستضافه الفلانيه من رابط أنت أعطيته اياه.
علشان كذا ما صار فيه مصداقيه في النت، أغلب المواقع صارت تتبع هالطريقه وتدفع لناس تمدحهم.. وتلقى شخص عنده متابعين يروح يمدح لهم موقع أو شيء هو جربه بنفسه لكن يغفل السلبيات الي ممكن هو ما واجهها شخصيا ً بس هي موجوده وتحصل لأي شخص..
أنا مو ضد الكسب بهالطريقه عليهم بالعافيه، وأبدا ً أبدا ً مافيها شيء ولا ذره غلط
 لكن لاحد يخبي على الناس علشان يعبي جيوبه، ذكر السلبيات والايجابيات بكل صراحه ما بيضرك.. فيه ناس ما عندها مانع مع السلبيات المذكوره بس تبغى تحسب حسابها فقط..
.
.
بذكر بشكل بسيط الفرق بين wordpress.com و wordpress.org
wordpress.com هو الموقع الي يعطيك مدونه مجانيه أو تختار خطه حسب رغبتك تدفع رسومها وكل خطه لها مميزات أعلى من الي قبلها حسب استخدامك وحاجاتك..
عيب الموقع انك ما تقدر تعدل بحرية على قوالب الموقع ولا تقدر تحط إضافات كثيره.. لكن الحمايه مشموله في الموقع.. بالنسبه لي مافيه عيب إلا هذا ومن زماان كنت منبطحه في بلوجر لهذا السبب ..
الدعم الفني موجود للخطط المدفوعه، ممكن تتواصل معهم بمحادثة مباشره .. أو عن طريق الايميل أو عن طريق منتدى الدعم..
لو اشتركت في الخطه الثالثه Business، بتقدر تركب ثيمات واضافات على كيفك وفيه حريه كبيره.. لكن سعرها 25 دولار بالشهر، والدفع يكون لسنه كامله.. أدري ان الموضوع يستحق وفيه ناس بتقول انه مبلغ بسيط، بس ذكرت هالشيء لأن فيه ناس ميزانيتهم ما تسمح أو ما يبغون يرتبطون بشيء كبير..
 .
wordpress.org هذا ووردبرس نفسه بس انت تشيله معاك وتدبر نفسك تختار موقع استضافه تحط فيه قراشعك، ماراح أذكر أمثله للاستضافه لأني جربت واحد وتجربتي معاه ما كانت ساره..
ايش ميزة org؟ حريييه تااامه، كذا أبغى وسط مدونتي واحد يكنس <– كف
يعني الثيمات تغيرها على كيف أهلك، html و css والثيمات مفتوحه لك كلها مجانيه وأكثر من الي في .com.. الاضافات كثير بشكل يخوف، تنوع رهيب..
لكن، زي ما قلت، انت تدبر لك الاستضافه، والأهم من كل هذا انت تدبر لك حمايه وتدبر الدعم الفني والنسخ الاحتياطي وكل شيء ..
.
قالوا لي أنه أرخص الواحد يدفع مبلغ الاستضافه الرخيص ( 3 دولار في الشهر في بعض المواقع ) وياخذ حريته الكامله..
بس دققوا فيها، ممكن الواحد يقدر يخارج نفسه ويسد ثغرات ويشتغل بنفسه، بس مو للأبد.. مصيره يحتاج إضافة حمايه على الأقل.. وأسعارها غاليه فعلا ً.. بالمقابل wordpress.com لو دفعت الخطه الأخيره 25 دولار في الشهر مشموله الحمايه مع حرية في التنسيق والاضافات بيكون منطقي وآمن أكثر..
.
لو أحد ناوي على استضافه يتواصل معي وأقول له اسم الاستضافه الي تعاملت معها وطلعت سيئه جدا ً.. لأن الكل يوصي عليها ويمدحها وممكن الواحد يتوهق لو سمع كلامهم، الناس يمدحونها ويسوون لها شرح لأنه لو أحد سجل فيها عن طريقك يوصله مبلغ جامد، أكيد عاد بيمدحونها ويتغزلون بعد.. والمشكله يذكرون لك سلبيات قال لك مصداقيه، وتشوف السلبيات تلقاها عاديه ماحد عنده مشكله معها مثلا ً مافيه دعم فني يتحدثون العربيه ! .. يقنعون القارئ ان مافيه سلبيات.
.
.
.

 

الأصوات المحيطية كبيئة مناسبة للقراءة والاسترخاء

.
 الحاجات الي أبغى أكتب عنها ومقاطع الفيديو الي راح أعرضها ممكن تشوفون في عناوينها يكتبون كلمة ASMR
بس مو هذا الشيء الي أبغى أوصله من تدوينتي أبدا ً!
أنا أتكلم عن نوع آخر من المقاطع لكن بالفتره الأخيره صار هالمصطلح يرتز في أي شيء يكون الغرض منه الاسترخاء، مع العلم أنه غلط وماله علاقه. بكتب السبب باختصار
.
ASMR تطلق على المقاطع الي تعطي المشاهد نوع من الارتياح أو الرضى، مثلا ً بنت تمشط شعر بنت ثانيه، يحطون الأصوات بحيث يسمعها المشاهد كأن الفرشاه تمشط شعره هو.. مثلا ً واحد يعمل مساج لفروة رأس شخص آخر، أو مساج للجسم ومن هالكلام ..
وفيه ناس مدري وش جوهم يحسون بالراحه على مقاطع فيها أصوات أحد يمضغ أكل !! أو يحرك شفايفه ويطلع أصوات ببراطمه
.
بس إجمالا ً فيه انحرافات في هالمصطلح لأنه يرمز أصلا ً لحاجات ممكن تندرج تحت تصنيفات سيئه.
تقدرون تطلعون على معاني وشرح المصطلح بأنفسكم في الانترنت. ما بجيب هالخياس لمدونتي احتراما ً للقراء.
.
Ambience2
 
.
أرجع لسالفتي الأساسية الآن بعد ما أبريت ذمتي 😗 
.
وقت القراءة أو الانشغال بشيء في مكان واحد تحتاج تشغل لك شيء تسمعه. بس أحيانا ً تكون محتاج تركيز فما تبغى تسمع شيء فيه كلام أو زحمه.
فيه مصطلح اسمه ( الاصوات المحيطية ) طالعين فيه ناس كثير في قنوات اليوتيوب 😍
يحطون لك فكره معينه يدخلونك جوّها.
.
مثلا ً يحطون لك زاوية تصوير من مقهى ، تشوف الناس ماشيه وتسمع صوت ناس تتكلم بهدوء على شوية أصوات أواني، وأصوات أقدام الناس الرايحه والجايه بعض الأحيان يدخلون موسيقى جاز على خفيف أو بيانو.
بشكل يخليك تحس انك موجود هناك. وما تكون صاخبه ومزعجه.
فيه أفكار وأماكن كثير مصورينها ومسجلينها
.
مره من المرات كنت أبحث وطلعت لي قناه يوتيوب مسوين مقاطع أصوات محيطيه بثيمات تشبه ألعاب الفيديو والأفلام، مثلا ً هاري بوتر وهوبيت وملك الخواتم وغيرها. يجيب لك صوره مكان من أماكن هالأفلام وأصوات، تدخل جو وتسترخي وانت تشوف البيئه تتغير، مرات يكون فيه مطر وبعد شوي الشمس تشرق. مقاطعهم تكون طويله مثلا ً 3 ساعات، بس الغرض منها مو انك تتابعها طول هالوقت!
بس شغلها واسترخي أو اشتغل أو اقرأ. فيه ناس يستخدمونها يتخلصون من الأرق والقلق والاكتئاب.
.
بحط رابط قناة أعجبتني وصرت أعتمد مقاطعها كثير إذا كنت أبغى أقرأ في جو هادي بدون ما أحس بالنعاس. 
بس قبلها بحط مقطعين أعجبتني من قنوات أخرى 
.
هنا حاطين كوخ من فيلم هاري بوتر. يبدأ المقطع من الفجر بدري على نفس الزاويه في المطبخ ..
والشمس تشرق ولو واصلت لآخر المقطع بتلاقي ان الشمس طلعت وصار قبل الظهر تقريبا ً. منظر حلو ومريح 😭❤
.
.
.
المقطع الي بعده من فيلم هاري بوتر برضو <– big fan 😬
لغرفة غريفندور، قدام المدفئة والجو برا ممطر وفترة مساء. صوت المطر معروف انه يهدئ ويساعد الي عندهم أرق بعد.
.
.
الحين جاء وقت القناه العظيمه الي سحرتني !
يحطون ثيمات وأجواء غريبه ومميزه، مثلا ً متجر جرعات (potion) زي الي في العصور القديمه.
أو سفينة قراصنه وقت عاصفه ، أو نزل قديم أو مكتبه بطراز قديم وفخم.
.
اسم القناه The Guild of Ambience – ( رابط القناة )
.
.
أقدّر جهودهم كثير، عمل راقي وفكره عبقريه وشغلهم متقن 
شفت قنوات كثير تسوي هالشيء بس هالقناه شغلهم متقن ومزبوط 
جربوا المره الجايه تشغلونها وقت الرسم أو الكتابه أو القراءة أو الأعمال اليدويه
أو حتى لو متبطحين تتفرجون عالسقف وتفكرون في شيء تسوونه.
.
.

نمط حياة دافئ ~ Hygge

رمضان مبارك، تقبل الله منا ومنكم صالح الأعمال
.
The little book of Hygge ischerzo
.
Hygge كلمة دانماركية استخدمت من بدايات عام 1800 لكن أصلها كلمة نرويجية قديمة
مؤخرا ً انتشرت في أمريكا ودول اخرى كثيرة.. الكلمة مالها ترجمه حرفية لأنها مشاعر أو توجه ونمط حياة .. حبيت أنقل لكم هالمصطلح بشكل بسيط..
.
تنطق ( هو-جاه ) فيه ياء قبل الواو يادوب تلاحظها وحرف G ينطق مثل الي في كلمة Good وليس كما في كلمة Legend ..
بعضهم يترجمونها ( العيش بشكل دافئ ومريح ) أو ( العيش بالشكل الذي تحبه مع الأشخاص الذين تحبهم ) ..
.
اذا اخترت تدخل مود أو نمط Hygge غالبا ً فيه أمور تحتاج تسويها، غير انك تكون مع الأشخاص الي تحبهم وتشارك معهم وقتك ونشاطاتك ..
فيه كتاب صغير يشرح معنى الكلمه وكيف يقدر الشخص يعيش بهذا النمط، من ضمن الصفحات كان فيه بعض المتطلبات الي تشكل لك نمط متكامل، جمعتها في صوره وحده واختصرت بعض الشرح ..
.
the little book of Hygge
.
لفت انتباهي تعريف من تعريفات هالكلمه وهو ( الاستمتاع بكل شيء وكل لحظه، مع الأشخاص الي تحبهم )
هذا التعريف الي أعجبني لأن في السنه الأخيره صرت أحب أستمتع بحاجات بسيطه، نظرا ً لأن المنطقه الي أنا فيها خامله ومافيها أي نوع من أنواع الترفيه الي كنت أحبه، فصرت أستمتع حتى لو خروج للحوش دقيقتين مع أمي توريني شجره أثمرت أو تقول لي فكره ما عمرنا راح ننفذها بس نستمتع واحنا نناقشها..
.
أغلب الي يحبون هالمصطلح يكونون “ديدان كتب” يحبون يسوون لهم جو زي كذا لأنهم أغلب وقتهم شبه جاهزين ومستوفين المواصفات المطلوبة لهالنمط.. قراءة الكتب تعتبر من الأمور المناسبه للـHygge..
.
نمط Hygge حلو ومبدأ راقي يمشي عليه الواحد بحياته.. بس ما أعتقد أحد يقدر يخليه نمط حياه مستمر..
عن نفسي شخصيتي متقلبه وديناميكيه ما أحب أتبع نظام هادي ومسالم لفترات طويله علشان ما أعاني من فرط حركه وأروح أتسلق جبل..
بس حلو لما الواحد يكون مكتئب أو طفشان يقدر يخلق لنفسه أجواء ويقدس اللحظه .. 
من أبسط الأمور المطلوبه والمتبعه: الامتنان الشموع والإضاءاتتناول بعض الأطعمه الخاصه
أعتبره نوع من الحمد ان الشخص يحس بالسعاده والامتنان لمجرد كونه على قيد الحياه بعافيه وكثير من النعم الي ما نقدر نحصيها..
.
.

Fairy garden ~ حديقة الجنيّات

أخيرا ً !! ❤😭😭😭😭
.
fairy garden ischerzo 1
.
من 4 سنوات أو أكثر أبغى أسوي حديقة الجنيات وأحطها عالشباك…
حديقة الجنيّات Fairy Garden شيء يسوونه الناس من الأزل في الحدايق وأحيانا ً يكون داخل البيت .. 
.
بعض الناس يؤمنون بالجنيات وبعضهم يكتفون بمجرد أنه من اللطيف انهم يصنعون حديقه أو حتى قريه للجنيّات ..
أغلب المهتمين في هالفكره هم الناس الي أصلا ً يحبون الحاجات الصغيرة ( المصغّراتMiniature
.
أهل الـMiniature هم ناس يصنعون حاجات صغيره، مثلاً بيوت فيها أثاث صغير وبالأدوات الي فيه كامله وحتى المفارش تكون من القماش، الأرضيات تكون خشب واللمبات تشتغل فعلا ً والستاير ممكن في بعض الحالات تنفتح وتتسكر والشبابيك نفس الشيء ..
.
بالنسبه لي أنا مهتمه بالمصغرات وسبق سويت نماذج صغيره غير ناجحه لحديقه أو حوش أو غرفه داخل علب معدنيه أصغر من راحة اليد.. مثل هذا وأصغر منه كمان ( يجيب فرط حركه شنيع علشان كذا وقفته )
.
fairygarden miniature
.
حديقة الجنيات حجمها يعتمد على الحوض أو المساحه الي عندك.. أنا أبغى أحطها عالشباك برا غرفتي لأن فيه مساحه كافيه.. حافة الشباك فيها مساحه بارزه مثل الرف..
منظر الحديقه هناك بيكون حلو أولا ًَ، وبيعجب العصافير ثانيا ً 😍
.
وبهالمساحه حاطه لهم حوضين مويه برا حديقة الجنيات، واحد لهم وواحد للنحل 
**النحل يجون عند الشباك برضو لأني حطيت ورد ابيض ريحته تشبه العسل
ويحبون يتحممون ويشربون إذا حصلوا حوض صغير ما يغرقون فيه، ينفع تحطون صدفه مقلوبه وفيها مويه بس ارفعوها عن الأرض بسدادة فلين أو شيء يرفعها شوي..
.
بعض الأشخاص يحبون يحطون مجسمات مصغره لكائنات حيه، أرانب ومن هالكلام.. بس أنا أشوف انها تخالف الفكره
الجنيات ما عندهم أصلا ً سناجب وأرانب بحجمهم، فيه فرق بين المصغرات وحديقة الجنيات..
.
حديقتي تنقصها جنيّه صغيره تكون جالسه عالحافه، بس للأسف أغلب الي حصلتها في أمازون حجمها كبير بالنسبه للحوض ومقاس البيت والمدخل.. لسى أبحث .. كمان كنت أبغى أثاث خارجي زي كراسي ومظله مصنوعه من اوراق الشجر بس ما توفرت الأغراض عندنا في المكتبات..
.
.
.
يمكن أحد يقول ( العصافير ما دروا عنك )
أنا أقول انهم دروا عني .. يعرفون ان فيه أحد بالغرفه يحط لهم مويه وأكل وألعاب وورد.. ومره من المرات لقيت واحد من العصافير يصيح عند الشباك ويخبط علشان ما حطيت مويه..
أنا مهتمه بالبيئه الخارجيه لشباك غرفتي، لأني جربت أكسب ثقة العصافير في فتره من الفترات
صاروا فعلا ً يلعبون عند الشباك أغلب الوقت، ويحتمون فيها وقت المطر، ويتسبحون في المويه الي حطيتها لهم..
وإذا شغلت أليكسا على اذاعه وبصوت عالي يجون يتلقفون يسمعون ويشوفون وش السالفه..
أنواع العصافير في المنطقه منوعه وجميله ومن ضمنها الطنّان ( طائر صغيير ومنقاره مثل الابره يحب يشرب من الورد زي النحل ) 
هذا الطائر مبسوط عند الشباك لأني صنعت له مرجيحه صغيره وزينتها بأوراق شجر وورد أحمر لأن الطنان يحب اللون الأحمر.. شفته يتمرجح عليها 4 مرات وذاب قلبي حرفيا ً 😭😭💔 شيء صغيييير يلعب.
ما صورته طبعا ً، لأن اوز الزفت يستقوي عليه ويخوفه لما يشوفه أصغر منه .. في الأخير اشتريت لأوز لعبه تخوفه علشان ينشغل فيها ويترك العصافير في حالهم، إن شاء الله أقدر أصور الطنان يتمرجح قريب 🙏
.
budgie
.
^ قامط أم العافيه ومتخبي ورا المرايه، أحسن.. ناس ماتمشي إلا بقلة الحيا ..
.
نجي لصور الحديقه الي سويتها وكم ملاحظه عليها 
.
fairygarden 1
fairygarden lights
.
⭐ الكريستالات عالمدخل وعالعمود الي بأقصى اليمين علشان تعكس نور الشمس وينتبهون لها ويجون..
كمان تسوي قوس قزح <– بذيتينا بقوسك
⭐ قبل فتره كان فيه إطلاق تجريبي لحديقة الجنيات 😂😂😂 سويت واحد مبسط مره وأي كلام، بس علشان أشوف بيعجبهم ولا لا، لأن مافيه شيء يفيدهم أو يقدرون يسوونه فيه..
تفاجأت أن الفضول ذابحهم ، يوقفون عنده ويميلون راسهم ويحاولون يقربون منه بحذر، بعد دقايق صاروا وسطه يستكشفون..
⭐ اللمبات الي حطيتها ماراح يستفيدون منها في النهار وماراح أشغلها في الليل وأبتلش بالحشرات.. بس كذا عجبتني قلت أسويها مالي صلاح..
.
⭐ هذا الشكل لحديقة الجنيات يعتبر بسيط جدا ً، في النت لو تبحثون تشوفون أشكال عظيمه وناس موهوبين فعلا ً..
⭐ المكونات كلها حجر وتراب والباقي لمخيلتك تبدع فيها.. أمي ساعدتني كثير وأعطتني أدوات وخامات..
اختي تقول لون المدخل حق البيت مفروض من فوق يكون أحمر وفيه نقشات بيضاء علشان يصير فطر عادي..
بس ما أبغى أستخدم ألوان الاكريليك الحين علشان ريحتها قويه وبعد شوي بنام..
.
.
.

Bonsai ~

 bonsai Aristata ischerzo
.
.

 

باقي تشوفونها صغيره زي ما كانت؟ 🤔
في الواقع انها كبرت.. وهذي صورتها الي نزلتها آخر مره، بغض النظر عن أن اللون كان فاتح ومنعش 
.
.05173-untitle8d-3
.
أيام الشتاء تعرضت لبرد شديد مع أنها مب مؤهله للعيش في الأماكن البارده..
حطيت لها صوف حوالينها وخليتها في مكان دافي قدر المستطاع بس ماقدرت أخلي لها الجو صيف تام ..
والحمد لله انتهى الشتاء قبل لا تموت 😥
.
بعد فتره بدأت جذورها تكبر وبدأت أشوف بعضها يطلع فوق.. قررت أسوي خطوه كبيره وأقص بعض الجذور لأن هالشيء يسوونه علشان تبقى صالحه للعيش في حوض صغير بهالشكل، ولأنها كانت باقي تذبل فكرت ممكن بعض الجذور عفنت أو شيء..
وقصيت بعض الجذور ورجعتها ، بعد أيام بدأت تطلع أوراق جديده ولو تشوفون عاليمين بدأ يطلع فرع جديد ..
طبعا ً ما أنسى المصباح الي اشتريته لها من البدايه علشان يكون بديل للشمس، كان فيه أيام في الشتاء ما نشوف الشمس، وهالنبته تحتاج عالأقل 6 ساعات شمس..
.
الشهر الجاي راح تكمل سنه من يوم زرعتها 🎂🎂
.
من بداية الصيف زرعت بذور البونساي الأخيره الي مفروض تطلع أوراقها بنفسجيه.. وما طلعت ولا نبته..
رجعت بعد أسابيع زرعت مجموعه ثانيه من البذور وكمان ما طلعت ولا وحده.. لسى باقي معي مجموعه وناويه أستمر في المحاوله لحد ما تنتهي الكمية..
.
تدوينات البونساي السابقة : (هنا) و (هنا)
.