الأصوات المحيطية كبيئة مناسبة للقراءة والاسترخاء

.
 الحاجات الي أبغى أكتب عنها ومقاطع الفيديو الي راح أعرضها ممكن تشوفون في عناوينها يكتبون كلمة ASMR
بس مو هذا الشيء الي أبغى أوصله من تدوينتي أبدا ً!
أنا أتكلم عن نوع آخر من المقاطع لكن بالفتره الأخيره صار هالمصطلح يرتز في أي شيء يكون الغرض منه الاسترخاء، مع العلم أنه غلط وماله علاقه. بكتب السبب باختصار
.
ASMR تطلق على المقاطع الي تعطي المشاهد نوع من الارتياح أو الرضى، مثلا ً بنت تمشط شعر بنت ثانيه، يحطون الأصوات بحيث يسمعها المشاهد كأن الفرشاه تمشط شعره هو.. مثلا ً واحد يعمل مساج لفروة رأس شخص آخر، أو مساج للجسم ومن هالكلام ..
وفيه ناس مدري وش جوهم يحسون بالراحه على مقاطع فيها أصوات أحد يمضغ أكل !! أو يحرك شفايفه ويطلع أصوات ببراطمه
.
بس إجمالا ً فيه انحرافات في هالمصطلح لأنه يرمز أصلا ً لحاجات ممكن تندرج تحت تصنيفات سيئه.
تقدرون تطلعون على معاني وشرح المصطلح بأنفسكم في الانترنت. ما بجيب هالخياس لمدونتي احتراما ً للقراء.
.
Ambience2
 
.
أرجع لسالفتي الأساسية الآن بعد ما أبريت ذمتي 😗 
.
وقت القراءة أو الانشغال بشيء في مكان واحد تحتاج تشغل لك شيء تسمعه. بس أحيانا ً تكون محتاج تركيز فما تبغى تسمع شيء فيه كلام أو زحمه.
فيه مصطلح اسمه ( الاصوات المحيطية ) طالعين فيه ناس كثير في قنوات اليوتيوب 😍
يحطون لك فكره معينه يدخلونك جوّها.
.
مثلا ً يحطون لك زاوية تصوير من مقهى ، تشوف الناس ماشيه وتسمع صوت ناس تتكلم بهدوء على شوية أصوات أواني، وأصوات أقدام الناس الرايحه والجايه بعض الأحيان يدخلون موسيقى جاز على خفيف أو بيانو.
بشكل يخليك تحس انك موجود هناك. وما تكون صاخبه ومزعجه.
فيه أفكار وأماكن كثير مصورينها ومسجلينها
.
مره من المرات كنت أبحث وطلعت لي قناه يوتيوب مسوين مقاطع أصوات محيطيه بثيمات تشبه ألعاب الفيديو والأفلام، مثلا ً هاري بوتر وهوبيت وملك الخواتم وغيرها. يجيب لك صوره مكان من أماكن هالأفلام وأصوات، تدخل جو وتسترخي وانت تشوف البيئه تتغير، مرات يكون فيه مطر وبعد شوي الشمس تشرق. مقاطعهم تكون طويله مثلا ً 3 ساعات، بس الغرض منها مو انك تتابعها طول هالوقت!
بس شغلها واسترخي أو اشتغل أو اقرأ. فيه ناس يستخدمونها يتخلصون من الأرق والقلق والاكتئاب.
.
بحط رابط قناة أعجبتني وصرت أعتمد مقاطعها كثير إذا كنت أبغى أقرأ في جو هادي بدون ما أحس بالنعاس. 
بس قبلها بحط مقطعين أعجبتني من قنوات أخرى 
.
هنا حاطين كوخ من فيلم هاري بوتر. يبدأ المقطع من الفجر بدري على نفس الزاويه في المطبخ ..
والشمس تشرق ولو واصلت لآخر المقطع بتلاقي ان الشمس طلعت وصار قبل الظهر تقريبا ً. منظر حلو ومريح 😭❤
.
.
.
المقطع الي بعده من فيلم هاري بوتر برضو <– big fan 😬
لغرفة غريفندور، قدام المدفئة والجو برا ممطر وفترة مساء. صوت المطر معروف انه يهدئ ويساعد الي عندهم أرق بعد.
.
.
الحين جاء وقت القناه العظيمه الي سحرتني !
يحطون ثيمات وأجواء غريبه ومميزه، مثلا ً متجر جرعات (potion) زي الي في العصور القديمه.
أو سفينة قراصنه وقت عاصفه ، أو نزل قديم أو مكتبه بطراز قديم وفخم.
.
اسم القناه The Guild of Ambience – ( رابط القناة )
.
.
أقدّر جهودهم كثير، عمل راقي وفكره عبقريه وشغلهم متقن 
شفت قنوات كثير تسوي هالشيء بس هالقناه شغلهم متقن ومزبوط 
جربوا المره الجايه تشغلونها وقت الرسم أو الكتابه أو القراءة أو الأعمال اليدويه
أو حتى لو متبطحين تتفرجون عالسقف وتفكرون في شيء تسوونه.
.
.

نمط حياة دافئ ~ Hygge

رمضان مبارك، تقبل الله منا ومنكم صالح الأعمال
.
The little book of Hygge ischerzo
.
Hygge كلمة دانماركية استخدمت من بدايات عام 1800 لكن أصلها كلمة نرويجية قديمة
مؤخرا ً انتشرت في أمريكا ودول اخرى كثيرة.. الكلمة مالها ترجمه حرفية لأنها مشاعر أو توجه ونمط حياة .. حبيت أنقل لكم هالمصطلح بشكل بسيط..
.
تنطق ( هو-جاه ) فيه ياء قبل الواو يادوب تلاحظها وحرف G ينطق مثل الي في كلمة Good وليس كما في كلمة Legend ..
بعضهم يترجمونها ( العيش بشكل دافئ ومريح ) أو ( العيش بالشكل الذي تحبه مع الأشخاص الذين تحبهم ) ..
.
اذا اخترت تدخل مود أو نمط Hygge غالبا ً فيه أمور تحتاج تسويها، غير انك تكون مع الأشخاص الي تحبهم وتشارك معهم وقتك ونشاطاتك ..
فيه كتاب صغير يشرح معنى الكلمه وكيف يقدر الشخص يعيش بهذا النمط، من ضمن الصفحات كان فيه بعض المتطلبات الي تشكل لك نمط متكامل، جمعتها في صوره وحده واختصرت بعض الشرح ..
.
the little book of Hygge
.
لفت انتباهي تعريف من تعريفات هالكلمه وهو ( الاستمتاع بكل شيء وكل لحظه، مع الأشخاص الي تحبهم )
هذا التعريف الي أعجبني لأن في السنه الأخيره صرت أحب أستمتع بحاجات بسيطه، نظرا ً لأن المنطقه الي أنا فيها خامله ومافيها أي نوع من أنواع الترفيه الي كنت أحبه، فصرت أستمتع حتى لو خروج للحوش دقيقتين مع أمي توريني شجره أثمرت أو تقول لي فكره ما عمرنا راح ننفذها بس نستمتع واحنا نناقشها..
.
أغلب الي يحبون هالمصطلح يكونون “ديدان كتب” يحبون يسوون لهم جو زي كذا لأنهم أغلب وقتهم شبه جاهزين ومستوفين المواصفات المطلوبة لهالنمط.. قراءة الكتب تعتبر من الأمور المناسبه للـHygge..
.
نمط Hygge حلو ومبدأ راقي يمشي عليه الواحد بحياته.. بس ما أعتقد أحد يقدر يخليه نمط حياه مستمر..
عن نفسي شخصيتي متقلبه وديناميكيه ما أحب أتبع نظام هادي ومسالم لفترات طويله علشان ما أعاني من فرط حركه وأروح أتسلق جبل..
بس حلو لما الواحد يكون مكتئب أو طفشان يقدر يخلق لنفسه أجواء ويقدس اللحظه .. 
من أبسط الأمور المطلوبه والمتبعه: الامتنان الشموع والإضاءاتتناول بعض الأطعمه الخاصه
أعتبره نوع من الحمد ان الشخص يحس بالسعاده والامتنان لمجرد كونه على قيد الحياه بعافيه وكثير من النعم الي ما نقدر نحصيها..
.
.

Fairy garden ~ حديقة الجنيّات

أخيرا ً !! ❤😭😭😭😭
.
fairy garden ischerzo 1
.
من 4 سنوات أو أكثر أبغى أسوي حديقة الجنيات وأحطها عالشباك…
حديقة الجنيّات Fairy Garden شيء يسوونه الناس من الأزل في الحدايق وأحيانا ً يكون داخل البيت .. 
.
بعض الناس يؤمنون بالجنيات وبعضهم يكتفون بمجرد أنه من اللطيف انهم يصنعون حديقه أو حتى قريه للجنيّات ..
أغلب المهتمين في هالفكره هم الناس الي أصلا ً يحبون الحاجات الصغيرة ( المصغّراتMiniature
.
أهل الـMiniature هم ناس يصنعون حاجات صغيره، مثلاً بيوت فيها أثاث صغير وبالأدوات الي فيه كامله وحتى المفارش تكون من القماش، الأرضيات تكون خشب واللمبات تشتغل فعلا ً والستاير ممكن في بعض الحالات تنفتح وتتسكر والشبابيك نفس الشيء ..
.
بالنسبه لي أنا مهتمه بالمصغرات وسبق سويت نماذج صغيره غير ناجحه لحديقه أو حوش أو غرفه داخل علب معدنيه أصغر من راحة اليد.. مثل هذا وأصغر منه كمان ( يجيب فرط حركه شنيع علشان كذا وقفته )
.
fairygarden miniature
.
حديقة الجنيات حجمها يعتمد على الحوض أو المساحه الي عندك.. أنا أبغى أحطها عالشباك برا غرفتي لأن فيه مساحه كافيه.. حافة الشباك فيها مساحه بارزه مثل الرف..
منظر الحديقه هناك بيكون حلو أولا ًَ، وبيعجب العصافير ثانيا ً 😍
.
وبهالمساحه حاطه لهم حوضين مويه برا حديقة الجنيات، واحد لهم وواحد للنحل 
**النحل يجون عند الشباك برضو لأني حطيت ورد ابيض ريحته تشبه العسل
ويحبون يتحممون ويشربون إذا حصلوا حوض صغير ما يغرقون فيه، ينفع تحطون صدفه مقلوبه وفيها مويه بس ارفعوها عن الأرض بسدادة فلين أو شيء يرفعها شوي..
.
بعض الأشخاص يحبون يحطون مجسمات مصغره لكائنات حيه، أرانب ومن هالكلام.. بس أنا أشوف انها تخالف الفكره
الجنيات ما عندهم أصلا ً سناجب وأرانب بحجمهم، فيه فرق بين المصغرات وحديقة الجنيات..
.
حديقتي تنقصها جنيّه صغيره تكون جالسه عالحافه، بس للأسف أغلب الي حصلتها في أمازون حجمها كبير بالنسبه للحوض ومقاس البيت والمدخل.. لسى أبحث .. كمان كنت أبغى أثاث خارجي زي كراسي ومظله مصنوعه من اوراق الشجر بس ما توفرت الأغراض عندنا في المكتبات..
.
.
.
يمكن أحد يقول ( العصافير ما دروا عنك )
أنا أقول انهم دروا عني .. يعرفون ان فيه أحد بالغرفه يحط لهم مويه وأكل وألعاب وورد.. ومره من المرات لقيت واحد من العصافير يصيح عند الشباك ويخبط علشان ما حطيت مويه..
أنا مهتمه بالبيئه الخارجيه لشباك غرفتي، لأني جربت أكسب ثقة العصافير في فتره من الفترات
صاروا فعلا ً يلعبون عند الشباك أغلب الوقت، ويحتمون فيها وقت المطر، ويتسبحون في المويه الي حطيتها لهم..
وإذا شغلت أليكسا على اذاعه وبصوت عالي يجون يتلقفون يسمعون ويشوفون وش السالفه..
أنواع العصافير في المنطقه منوعه وجميله ومن ضمنها الطنّان ( طائر صغيير ومنقاره مثل الابره يحب يشرب من الورد زي النحل ) 
هذا الطائر مبسوط عند الشباك لأني صنعت له مرجيحه صغيره وزينتها بأوراق شجر وورد أحمر لأن الطنان يحب اللون الأحمر.. شفته يتمرجح عليها 4 مرات وذاب قلبي حرفيا ً 😭😭💔 شيء صغيييير يلعب.
ما صورته طبعا ً، لأن اوز الزفت يستقوي عليه ويخوفه لما يشوفه أصغر منه .. في الأخير اشتريت لأوز لعبه تخوفه علشان ينشغل فيها ويترك العصافير في حالهم، إن شاء الله أقدر أصور الطنان يتمرجح قريب 🙏
.
budgie
.
^ قامط أم العافيه ومتخبي ورا المرايه، أحسن.. ناس ماتمشي إلا بقلة الحيا ..
.
نجي لصور الحديقه الي سويتها وكم ملاحظه عليها 
.
fairygarden 1
fairygarden lights
.
⭐ الكريستالات عالمدخل وعالعمود الي بأقصى اليمين علشان تعكس نور الشمس وينتبهون لها ويجون..
كمان تسوي قوس قزح <– بذيتينا بقوسك
⭐ قبل فتره كان فيه إطلاق تجريبي لحديقة الجنيات 😂😂😂 سويت واحد مبسط مره وأي كلام، بس علشان أشوف بيعجبهم ولا لا، لأن مافيه شيء يفيدهم أو يقدرون يسوونه فيه..
تفاجأت أن الفضول ذابحهم ، يوقفون عنده ويميلون راسهم ويحاولون يقربون منه بحذر، بعد دقايق صاروا وسطه يستكشفون..
⭐ اللمبات الي حطيتها ماراح يستفيدون منها في النهار وماراح أشغلها في الليل وأبتلش بالحشرات.. بس كذا عجبتني قلت أسويها مالي صلاح..
.
⭐ هذا الشكل لحديقة الجنيات يعتبر بسيط جدا ً، في النت لو تبحثون تشوفون أشكال عظيمه وناس موهوبين فعلا ً..
⭐ المكونات كلها حجر وتراب والباقي لمخيلتك تبدع فيها.. أمي ساعدتني كثير وأعطتني أدوات وخامات..
اختي تقول لون المدخل حق البيت مفروض من فوق يكون أحمر وفيه نقشات بيضاء علشان يصير فطر عادي..
بس ما أبغى أستخدم ألوان الاكريليك الحين علشان ريحتها قويه وبعد شوي بنام..
.
.
.

أنماط الرسم الي نميل لها

 

.876543
.
خلال الفتره الي راحت حاولت أرجع أرسم وأبحث عن نمط يعجبني علشان أستمر عليه..
جربت أنماط كثير وللأسف أمشي حبتين وأبدأ أطفش وأشوفه مو جوّي..
وطبعا ً مشكلتي اني نادرا ً ما أكمل رسمه للآخر، خاصه اذا كنت أجرب شيء جديد خلاص أوصل للي أبي وأوقف 😗
.
الكلام التالي لحد الرسمه موجه للي مهتمين بالرسم ومستواهم باقي مبتدئ مثلي أو يبحثون عن اسلوب خاص فيهم..
أنواع الرسم كثيييير وبعد ما يحصل الواحد نوع مناسب بيبدأ يمشي لحد ما يحصل له بصمه خاصه ومميزه لرسمه
غلط نبدأ نبحث عن نمطنا أو اسلوبنا الخاص من البدايه، فيه ناس ما يحصلونه إلا بعد سنوات..
غلط برضو ان الواحد يستعجل نفسه انه يتطور أو يحصل اسلوبه الخاص ويبدأ يحس أنه ما أنجز شيء !
قبل فتره صار تغيير جذري في رسمي بشكل غريب وبدون سبب، لقيت نفسي أقدر أرسم أجسام ووضعيات ما كنت أعرف حتى أتخيلها..
رحت ضغطت على نفسي وطمعت اني أشوف تطور سريع آخر بنفس سرعة التطور الي قبله..
مع الوقت لقيت نفسي مو متعلقه بالرسم ومالي نفس أرسم وفقدت التطور الي وصلت له ! ماعاد أقدر أرسم الأجسام .. غلط انك تجمع دروس كثير ودورات أو تتابع قنوات وحسابات كثير وتبدأ تضغط على نفسك وكأن السالفه إجباريه..
.
مافي شيء فعال أكثر من الممارسه في تطوير الرسم.. وأنا آخر من يتكلم لأني أستمر وأنقطع .. بس حاطه كراسه وقلم قريب من لابتوبي علشان لو حسيت اني راح أنشغل وما أفتح تابلت الرسم أطلع هالكراسه وكل شوي أرسم أي شيء، عين، أنف، شعر أو وضعية جسم معينه وخلاص..
 .
الممارسه مهمه وطبعا ً مو معناها ما نشوف دروس، بس المهم الواحد ما يضعط على نفسه..
للآن ما حصلت لي ستايل رسم خاص فيني ولا أعتقد اني قربت حتى، بس عادي المهم أرجع أستمتع وآخذ الأمور ببساطه.. ولو ما تطور اسلوبي عادي، قبل سنوات ما كنت أقدر أرسم بنفس مستواي الآن، وهذا بحد ذاته ينحط في الحسبان، من طفولتي كنت أرسم بس يكون قدامي شيء أرسمه أما الآن ممكن أرسم شيء من عقلي..
.
.
ischerzo 2
.
هالرسمه كنت راسمتها بعد انقطاع بس خلال الانقطاع كنت أتابع دروس نظري بدون تطبيق..
هالشيء إرضاء لضميري بس في الواقع ماراح يتطور مستوى الشخص وهو متكي 🙄 .
 .
.
الي بعدها كنت أحاول أدمج بين الرسم الواقعي والأنمي، ما أحب الواقعي 100% وما استمتعت برسم ستايل الأنمي 100%
ودايم تجذبني الرسمات الي تكون نص ونص.. ما كملت طبعا ً، كنت أطبق كم شغله تعلمتها وقفلت 😬
 .
 .
آخر رسمه رسمتها اليوم، أجرب شلون أرسم الأنف، أبغى أوصل لمستوى لا بأس به علشان أنتقل لشيء آخر أتعلمه..
غالبا ً بيكون الشيء الجاي الي أطوره هو الشفايف لأن رسمي لها زي ما هو واضح من جنبها، ما تابعت دروس ولا تدربت عليها كثير بس كان لازم أرسمها علشان أعرف وشلون بتطلع الرسمه..
.
ischerzo 3
.

مفروض أضيف تفاصيل لأن الأنف مب مكتمل بهالشكل، بس بالنسبه لي مكفيني هالقدر للآن.

.

قررت ما أرفع رسمات على موقع ديفيانت آرت لأنه أصبح مجتمع مقزز مؤخرا ً، تفكيرهم في انحدار والرسمات الي تميل للاباحيه والتخلف والمرض بدأت تكثر، ومن الأساس ما كنت مهتمه بحسابي ولا أتفاعل مع أحد غير صديقه وحده.. أبحث عن موقع يكون فيه مجتمع كويس ناس يرسمون مب ينزلون بورن وشغلات مقززه

 .

Fill your room with rainbows

Fill your room with rainbow
 .
دققتوا من قبل في الشعور الي تحسون فيه إذا شفتوا قوس قزح؟
تحسون أنه شيء من عالم ثاني.. مع أنه شيء ماله فايده ولا أعتقد أنه يساعد في التوازن البيئي ولا يسوي شيء
بس مع ذلك أشوفه نعمه كبيره من ربي.. 
  .
  .
قبل رمضان عام 2017 لقيت كريستالات من ثريّا المدخل كانت مكسوره ومنثوره على الأرض
وأمي تدعي عالعمال الي كانوا يشيلون أثاث وكسروها، تقول (الله يكسر ضلوعهم) <- دعوات مقتبسه من قاموس دعوات جدتي، وهو قاموس لا يمزح بأي شكل من الأشكال *قشعريره* لا تنخدعون بلطف الدعوه السابقه، هذي ولا شيء 
  .
أخذت الكريستالات الي لسى سليمه وعلقتها على شباك غرفتي علشان لما تشرق الشمس من جهة غرفتي أشوف قوس قزح في الغرفه كلها 😎
 .
للأسف كان عباره عن نقط صغيره ومع أنه حلو وعجبني لكن كنت أبغى كريستالات أكبر ..
طلبت أمي أشيل كريستالات كبيره من الثريا المكسوره، أعطتني تحذير ما يمزح، فقررت أبحث بمكان ثاني
 .
في الأخير بعد سنه كامله من البحث حصلت على 4 كريستالات كبيره وعلقتها في سلسله بخرزات وحطيت وحده منها على الشباك علشان أجربها .. هذا شكل الكريستالات:
.
.fill your room with rainbow 3fill your room with rainbow 5
,
الصباح التالي كان مبهج بشكل لا يوصف، أعجز عن وصفه، وسعادتي توصل للقمه كل ما أتذكره..
صحيت من النوم لقيت في كل جدران الغرفه وعلى السقف وفي كل مكان ألوان قوس قزح
يا الله كيف شيء بسيييط زي كذا ينعش الروح ويعطي دفى وراحه !!
.
.
.
بعدين تذكرت اني مره قرأت أن الكريستالات يستخدمونها الي يؤمنون بمبدأ طاقة المكان
لأنها ترفعها بشكل كبير..
.
قوس القزح من أنقى وأجمل الأمور في الحياه، لاحظوا أنه ظاهره تدخل السعاده في قلب أي شخص..
أكره كيف انه صار شعار للمثليين، وش العلاقه بين المثليين وقوس القزح؟ احتكار شيء من الطبيعه علشان يمثل فئه معينه شيء تافه..
 .

 

Miss Peregrine’s home for peculiar children books

8b852-200_s

 

الفتره الماضيه قضيتها بعيد عن النت وقللت التواصل مع الناس.. بس كنت اقرأ روايه وهالشيء ما خلاني أحس بالملل تماما ً..
لازلت أحتاج فتره أكون لحالي بدون سوالف ومجاملات..
 .
 .
هذي الروايه (المكونه من 3 كتب) كانت اقتراح من صديقتي يونا الي ما عندها مشكله تقرأ روايات طويله جدا ً جدا ً
**يونا هي رسميا ً المرشد لي في الكتب وألعاب الفيديو لأن ذوقها رهيب وأنا ماعندي سالفه بهالمجالين**
مره اقترحت عليّ أقرأ سلسله من 7 كتب !! وكل كتاب أكبر من الثاني، ولازلت أقلب الفكره في راسي لأن هالمجموعه تشهي وأتمنى أقرأها.. بس يبقى مشروع مؤجل..
 .
الروايه الي قرأتها طوال الفتره الماضيه (Miss Peregrine’s home for peculiar children) للكاتب (Ransom Riggs)
تنتهي في 3 كتب ..
بس الكاتب أضاف كتاب آخر فيه قصص خرافيه كانوا أبطال القصه يحبون يقرأونها..
برضو طلعت اصدارات اخرى لكن مب تكمله.. يعني مثلا ً واحد منها كان القصه المصوره.. نفس الأحداث بس كوميكس..
 .
قبل فتره صرّح الكاتب -الي امتلأ جيبه بالفلوس بعد هالسلسله على ما يبدو- أن فيه كتاب رابع تكمله وفيه أسرار وحاجات فخمه..
لسى ما نزل بس راح أشتريه بدون تفكير أول ما ينزل عندنا بإذن الله.. مع العلم أن القصه تعتبر منتهيه لو أحد يبغى يعتبر الثالث هو الأخير..
 .
 .
أجزاء السلسله المتوفره الآن (متوفره في مكتباتنا برضو)
miss peregrine's home for peculiar children
Miss Peregrine’s Home for Peculiar Children-
Hollow City-
Library of Souls-
 
والكتاب الاضافي : Tales of the Peculiar
الي شجعني أقرأ الروايه ( بعد توصية يونا طبعا ً ) هو أنها تشبه عرض المسوخ، قصه قديمه وحقيقيه لو أحد سمع فيها من قبل ..
عرض المسوخ ( Freak show ) هو سيرك كان فيه ناس “مختلفين” فقط.. مثلا ً توأم سيامي، أشخاص ولدوا بعيوب خلقيه، والناس وقتها مو متعودين على هالشيء ويعتبرونه شؤم أو لعنه..
كانوا منبوذين وطريقتهم الوحيده للعيش انهم يشاركون بهالسيرك ويكونون فرجه للناس.. ابحثوا في النت وراح تحصلون عنهم معلومات كثير..
عرض المسوخ أصبح قاعده لأفلام ومسلسلات وقصص كثيره..
كتاب Miss Peregrine’s home for peculiar children فيه شخصيات غريبه سواء في المظهر (زي عرض المسوخ) أو بقدرات غير ظاهره.. سماهم الكاتب Peculiars ( الكلمه معناها الحرفي غريب أو غير طبيعي )..
Miss Peregrine's home for peculiar children
 
-في الصوره كتاب ناقص، وحده استعارته مني ولسى ما رجعته-
نبذه للقصه ( ما أنصح بقراءة النبذه للي ما يحب يعرف حاجات عن القصه قبل لا يقرأها )
بداية القصه من يوم كان البطل ( جيكوب ) طفل عادي مثلنا وفي عالمنا ووقتنا هذا، كان متعلق كثير بجدّه، الي يحكي له قصص عن أصدقاء طفولته، وكانت قصصه غريبه، بنت تطير وبنت تطلع من يدها نار ووحده تتحول لطائر وواحد مختفي ما ينشاف منه إلا ملابسه وقبعته..
الغريب أن الجد كان يعرض على جيكوب صور لهالأطفال الي يتكلم عنهم.. كان يصدقها لحد ما كبر صار عمره 16 وبدأ يحس أن الجد كان يلعب عليه.. لكن الجد (الي بدأ يكبر في السن كثير وأولاده يعتبرونه مخرف) صار يتكلم عن هالأمور بشكل جاد ويقول لجيكوب حاجات غريبه وأنه في خطر..
جيكوب كان يحس أن جده مخرف فعلا ً، لحد ما حصله يوم من الأيام في الغابات الي ورا بيته وهو مصاب ويهمس له انه لازم يرجع للمكان الفلاني والتاريخ الفلاني، ومات، وفي وسط الظلام كان جيكوب يشوف مخلوق مرعب له ألسنه أو مجسات كبيره من فمه، هو الي قتل الجد، واختفى بعد دقايق ..
من بعدها صار جيكوب يعاني من كوابيس عن هالمخلوق ويتذكر كلام الجد، ام وأب جيكوب قرروا يرسلونه لطبيب نفسي لأنهم يحسبون أن الصدمه هي الي خلته يشوف وحش في الغابه ويسمع أصوات ويتوهم حاجات..
قرر جيكوب أنه يبحث عن المكان والتاريخ الي قاله الجد قبل موته، وحصل على رسائل كان يحتفظ فيها الجد على ما يبدوا أنها من المكان الي تكلم عنه الجد وقال أنه نشأ فيه مع هالأطفال..
بعد عناء توصل الى أن مكان هالأطفال في جزيره معينه وقرر يطلب أبوه انهم يسافرون هناك كنوع من الاستجمام، الأب تحمس وفكر فيها كفرصه ان جيكوب يغير جو وينسى وفاة الجد.. ومن هناك بدأ جيكوب ينبش ويحاول يحصل مكان أصدقاء أبوه، كيف يكونون موجودين لحد الآن؟ مفروض انهم عجزوا وماتوا بس الرسائل تثبت أنهم موجودين..
رأيي وتقييمي للكتب الثلاثه
الكتاب الأول شيق ولطيف جدا ً..
الكتاب الثاني فيه ثيم خاص وفيه مشاعر قويه تخليك تتعلق بالشخصيات..
الكتاب الثالث أكشن وأحداث سريعه وتقلبات كثير..
 
الشيء الوحيد الي كان يخليني ما أمسك الكتاب من الصبح إلى الليل هو أن فيه وصف دقيق في بعض الأحيان..
بالذات الكتاب الثالث حسيته يحاول يزيد عدد الصفحات وكان فيه وصف دقييييق للأماكن حتى لو ما كانت مهمه..
صح ان الكتاب الأول فيه وصف لكن يحمسك ويهمك لأنك تحتاج تتخيل هالأمور بالتفصيل كونها امور خياليه جديده علينا..
الكاتب شكله يحب النهايات السعيده وما يحب أنه يموت شخصيات كثير أو يسوي نكد غير ضروري.. يحب يسوي لقطات سعيده كثير..
بس مو معناها مافيه واقعيه أو مافيه نكد.. فيه مواقف كانت مؤثره وفيه شخصيات تموت..
بس شخصيا ً تنرفزت من الـ Ymbrynes .. معطينهم أكبر من حجمهم وما عندهم سالفه في نظري.
القصه الأصليه للـYmbrynes الي في كتاب Tales of the peculiar حلوه وحسيت دورهم عظيم.. بس في الروايه نفسها ودي أصفقهم، زلايب..
.
فيه برضو شيء لاحظته، الكاتب يعرف يطلع لنفسه مخرج، مرات أحس السالفه تعقدت ومافي أمل يطلعون من المأزق، أتفاجأ أنه يخرجهم من الموقف بطريقه ما تخطر عالبال، تفاجئ وتفرح بنفس الوقت..
** الفيلم المقتبس من الروايه مب مره عظيم.. مغيرين شوي في الشخصيات، ومختصرينه وطبعا ً النهايه مختلفه..
حلو بس مب بالمقارنه مع الروايه..
 
 
الكتاب الجاي الي أنوي أقرأه قصير لأن آخر روايتين قرأتها كانت كلها مكونه من 3 كتب ..