Heal your body

من زمان أبغى أنزل هالتدوينه ومو عارفه كيف أصيغ كلامي، إن شاء الله يكون مرتب لأن الأفكار براسي مب مرتبه

لما كتبت عن طريقة الكاراميل مكياتو قبل فتره كنت كاتبه أن فيه سبب خلاني أنزل الطريقه الآن
السبب أن هذاك اليوم كان آخر يوم أشرب فيه كاراميل مكياتو <– أنزله لكم أنكبكم وأنا أوقفه D:

الطريقه الي أقنع فيها نفسي اني أوقف تناول شيء ضار هي أني أعطي نفسي فرصه بسيطه كم يوم
كنت أشربها بضمير جامد وراحة بال وأتلذذ فيها لأني عارفه انها المرات الأخيره
وبهالشكل لقيت نفسي ما واجهت أي صعوبه لما قررت أوقف تماما ً..

الحاجات الضاره الي أقصدها مب مجرد معلبات ومواد حافظه ومسرطنات ومن هالكلام.. حتى المواد الغذائيه الي من طفولتنا نحسبها مفيده ممكن نتفاجأ أنها ضاره على صحتنا بشكل كبير، مثل  الحليب والأجبان ..

مؤخرا ً بدأت أقرأ في الأنظمه الغذائيه الي يعتبرونها الأطباء خزعبلات علشان يمشون كلامهم الي ماشفناه منع عنا الأمراض ولا الكسل بالعكس يستمر يرجعنا لعياداتهم كل مره

كلنا صرنا نعاني من أحد هالأمور
كسل وخمول
صداع بين فتره وفتره بدون سبب واضح
 معنويات منخفضه
 فقر دم
غثيان أو دوخه
حساسيه
النوم يصبح ما يشبّع مهما طال
تصبغات في البشره
 بدايات التجاعيد
جفاف البشره
 نلاحظ أننا نستخدم كريمات أو نحط قناعات على الوجه بس ما تسوي مفعول واضح، مب لأن هالقناعات غير فعاله، لكن لأن أجسامنا تحتاج إصلاحات أكبر من كذا، ومن داخلها مب من الخارج.
 .
 .

 Macrobiotic 

بعضكم سمع عن الماكروبيوتك وكيف هو شائع من آلاف السنين في اليابان، وممكن ناس يفكرون أن هذا هو سبب أن اليابانيين صحتهم حلوه ويعمرون.. فيه أنظمه مالها اسم بس يتبنونها أشخاص أو جماعات، لما تقرأ وتبحث راح تلاقي حاجات منوعه وغريبه..

الماكروبيوتك له مواقع ومدونات وكتب، وحتى في مواقع تشترك فيها بمبلغ معين ويرسلون لك وصفات وجدول غذائي مرتب للأسبوع كامل والمقاضي الي تحتاجها ومن هالكلام..

تفاجأت أن أصحاب الأنظمه هذي (الماكروبيوتك وغيرها) تعالجوا من أمراض خطيره من ضمنها السرطان !!
وماحد مستنكر هالشيء، يعني شيء طبيعي بالنسبه لهم من أكثر من 70 سنه. وشفت تجارب ناس من دول كثير وبعضها دول عربيه.
الناس الي اصيبوا بالسرطان وتعالجوا منه عن طريق تغيير الأكل كان أول شيء يسوونه هو التوقف عن تناول اللحوم ومشتقات الحليب
والنشويات ، لأنها تغذّي الخلايا السرطانيه وتسرع انتشارها، بينما فيه أغذيه توقف انتشارها وتطفشها .
اللحوم الحمراء ومشتقات الحليب تسبب ترسبات في الجسم وتتطلب مجهود منهك للكبد والجسم بشكل عام..
 .
4
 .
المرعب في الموضوع أننا في أغلب الدول العربيه مستمرين على اعتمادنا على الأطباء في حين اننا ناكل زي ما نشتهي بدون ما نحاول نعرف وش المناسب لأجسامنا
ولازلنا نزيد الوضع سوء سنه بعد سنه .. ما أشوف وعي حقيقي، الوعي الي عندنا غلط أصلا ً
لما الأطباء يركزون لنا على اللحوم الحمراء ومشتقات الحليب والدقيق البر والأكل المسلوق إلى حد الانصهار
فهم يعطوننا نصائح ما تساعدنا بالعكس تقربنا من نهايتنا أكثر

أقول هذا الكلام نقلا ً عن أشخاص جربوا يغيرون نظامهم ويوقفون هالأشياء وشافوا فرق عنيف مذهل لدرجه أن أشكالهم صارت أصغر وباين عليهم الصحه، والأحلى من هذا أنهم ما يكونون نحيفين زي الي يتبعون نظام صحي خاطئ ينصحون به الأطباء وكله عباره عن قمحيات ومشتقات حليب خاليه من الدسم وخضار فقط.. يطلع الواحد تعبان وجيعان أصلا ً، وفوق هذا جسمه يعاني من الأكل الي يتناوله باستمرار بحجة أنه صحي..

أنوي اني أكتشف لو هالأنظمه فعلا ً تسوي تغيير ملحوظ، لكن ما بدأت بشكل فعلي لأن رمضان جاي وأهلي مو مستعدين يغيرون فجأه..
وتعرفون رمضان شهر يهتم ببطون الرجال، إذا ما أكلوا موائد وش يسكتهم بالله؟ بالتالي ماحد فاضي لي وما أقدر أسوي نفسيه وآكل لحالي..
من بعد رمضان أبدأ أعودهم ياكلون زي الناس ويتركون الأكل المحظور وممكن رمضان الي بعده يكونون مستعدين..
برضو أنا حاليا ً لازلت أقرأ وأرتب الأفكار وأضبط قوائم أكل متناسقه بحيث ما أتشتت وأضيع وقتي وما أكون أعطيت التجربه حقها..
 .
 .
 .
 من فين تبدأ ؟ 
أول شيء البدايه تكون بالقراءه لحد ما تعتقد في داخلك أن هالشيء هو الصحيح ومن كثر ما تقرأ وتسمع المعلومات تصبح معقوله أكثر بالنسبه لك كشخص في مجتمع مستهلك للحم والأكل المحفوظ والمعلب والمطبوخ بعنف..
الشخص الي يبغى يبدأ بالتدريج ممكن يبدأ بالماكروبيوتك لأنه قابل للتنفيذ، مع أن عندي تحفظ على بعض معلوماته ولذلك انتقلت لأنظمه ثانيه..
ممكن تلاقي أنظمه مختلفه تخليك في البدايه تقول ( أجل وش آكل؟ كل شيء ممنوع ) بس الصراحه اكتشفت أن عندنا أفق ضيق في مجال الأكل، ما نعرف وش ممكن ياكل الانسان غير الوجبات المعتاده الي نسويها
علشان كذا نجد صعوبه في تقبل الأنظمه الي تمنعك من مشتقات الحليب مثلا ً.. أو القمح والحبوب
بين فتره وفتره راح أعرض بعض المعلومات الصادمه الي أقرأها علشان لو أحد يفكر يغير نظامه..
 .
 .
 .

 ليش توجهت لهالأمور؟ 

شفت آثار الغذاء الخاطئ والسهر على جسمي في فترة الجامعه، مع أن أكلي ما كان بهالسوء لأني أهتم ما آكل من مطاعم وما آكل حلويات وشيبسات ومقليات وأكل فيه زيت كثير أو بهارات كثير.. مع ذلك صحتي ما كانت 100% ، صحيح ما عندي أمراض الحمد لله، لكن تعرف أن فيه خطأ لما تلاحظ أنك جسمك يحاول يوصل لك اشارات أنه منهك ويحتاج مساعده ..

شفت النظام الغذائي لأبوي، وهو متوافق مع أنظمة الأطباء، دقيق بر، بقوليات، خضار، أكل مافيه زيوت، بروتينات من اللحوم الحمراء، مشتقات حليب بدون دسم، ومن هالكلام..
الي أشوفه أن أبوي يعاني من مشاكل هو بعد، وبالمقابل وزنه نازل وأنا ما أبي وزني يكون نازل لأنه أساسا ً مب إشاره طيبه أن وزنك ينزل..
مؤشر كتلة الجسم BMI لازم يكون موزون صح <– فيه تطبيق جوال اسمه BMI تقيس فيه مؤشر كتلة جسمك وتشوف لو وضعك سليم ولا لا..
 .
بدأت أقرأ عن أنظمه من هالنوع، من يوم تخرجت لحد الآن، وتوصلت لمجموعة قناعات وناويه أطبقها وأعرض بعضها هنا..
الأطباء بخليهم على جنب طبعا ً، ماعاد أثق فيهم إلا في الإسعافات الأوليه، ماراح أقول أنهم نصابين ، نسبه كبيره منهم عندهم ضمير لكن هذا الي تعلموه وهذا الي يؤمنون فيه وهم يرضون لنا الأفضل حسب معرفتهم وإيمانهم بعلمهم..
 .
 .

 مبدأ التناغم مع الطبيعه 

الشيء المشترك بين كل هالأنظمه مع اختلاف منشأها ومعتقداتها هو أن الإنسان كائن ينتمي للطبيعة ومب سيّد على أحد..
أنت مندمج ومتناغم معها، وغذاءك لازم يتوافق معها، والغذاء أساسا ً مب أهم شيء في الحياه، أنت ملزم أنك توصل لسلام مع نفسك ومع الي حواليك بشرا ً كانوا أو حيوانات أو نباتات، لأن الطبيعه فيها توازن وإذا تناغمت معها راح تنعم بالتوازن الي فيها وتعيش أطول وبسعاده أكثر..
يعني راح تحصل في هالأنظمه تركيز على مبدأ التعايش والتسامح والسلام مع الحياه والناس، بمجرد أنك تعدل نظامك لازم تعدل فكرك وروحك بعد..
 .
 .

 شيء أخير 

تلاحظون بعض الكريمات تستخدمونها كأنكم ما تستخدمون شيء أبد، ضياع فلوس ولعب على أنفسكم
بينما ناس يستخدمون نفس كريماتكم تقلب بشرتهم 180 درجه وتتحسن.. 
الشيء هذا صار معي من فتره، كنت ناويه أحسن وضعي وأنتبه لأكلي ووزني، وكنت أستخدم كريمات بشره ومالها أي مفعول
بس أستخدمها ترطيب عالأقل، لما وزني تعدل ونومي طبعا ً تعدل ، لقيت أن هالكريمات لها مفعول باين ..
لما تنحل المشاكل من داخل الجسم راح يكون مظهر الجسم من الخارج سليم وراح تنفع معاه المساعدات الي تجيه من برا..

3 thoughts on “Heal your body

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

This site uses Akismet to reduce spam. Learn how your comment data is processed.