“كفحله”

  
أنا بخير الحمد لله، الحمد لله، الحمد لله بخير، الله يسلمك أنا بخير، بخير الله يسلمك .. *جرعة موية*
 
اهلكتي أمي
عمركم دققتوا في المجالس والحريم المستقعدات في قمة هالمجالس؟ الحريم الكبار في السن والمتربعات على قمة التسلسل الهرمي بحكم السن ولأنهم غالبا ً هم المتحكمات في كل شؤون الأسره وعلاقاتها الاجتماعيه، من مواجيب وزيارات وزواجات وطلاقات..
كل حرمه من حريم قمة المجلس لها تاريخ طويل ومرعب وخاضت معركه أو معركتين مع كم حرمه أخرى من حريم القمه وبالتالي أصبح بينهم نوع من الهدنه والمجاملات، كل حرمه تجبر بناتها وحفيداتها على تملق الحرمه الثانيه لإثبات أمور نجهلها..
في المناسبات الكبيره جدا ً نتوقع أن الفكرة مجرد تجمّع وقهوة وحلى وعشاء كبير وبعدها نروح البيت، ولا ننسى طبعا ً عرض الأزياء الي يقام بين بعض البنات الي يهمهم الأمر..
لكن بالنسبة لحريم القمه فيه منافسه شديده حاصلة احنا مو منتبهين لها مع أننا نلعب دور هام فيها، كأننا قطع شطرنج عندهم ..
مثلا ً، واحده من هالحريم حضروا كل بناتها “المتزوجات” وبعضهم عندهم أطفال وبعضهم أطفالهم في الطريق، نلاقي هالحرمه مشققه من الوناسه والفخر، في الجهه المقابله حرمه ثانيه بناتها متخرجات من تخصصات قويه وموظفات برواتب كالأنهار لكن “غير متزوجات
يعني: ( *هه! In your face !!* بناتك أبو كلب أما بناتي المتزوجات رافعين راسي ) ..
النتيجه 1 – 0 !
 
بعض النقاط تحتسب لصالح الحرمه الي بناتها وحفيداتها يحضرون مناسبات كثير، مختمه المناسبات لهالشهر 
🤣🤣🤣🤣 ثلاث عزايم ورا بعض، يعني ضربة ثلاثية، تروفي..
  
عموما ً، بعيدا ً عن بطولة “تينكايشي بودوكاي” الي تصير، خلونا في موضوع الـ”كفحله”
الكفحله هي الفعل للسؤال عن الحال.. يعني إذا كنت جالس في المجلس وبدأوا الناس يسألونك كيف الحال وش الأخبار إلخ.. هذي كفحله..
  
في المجلس أكون ضيفه وصلت من دقيقه وجالسه مكاني، غالبا ً أبدأ أمثل دور الشخص المبسوط لرؤية هذا الحشد من الأحباب..
تسألني واحده من الحريم عن أحوالي، لكن بالسيناريو الطويل التالي:
  
– كيف حالك؟
– الحمد لله
– وش أخبارك؟
– الحمد لله 😐 ( دوبني جاوبت هالسؤال ) 
– عساك طيبه؟
– الحمد لله 
– كيف أهلك؟
– الحمد لله
– عساهم طيبين؟
– ايه طيبين الحمد لله 😤
– كيف أخوانك؟
– الحمد لله ( أخواني هم نفس أهلي، شككتيني في عائلتي ! 😨😨 )
– كيف أبوك؟
– …………….. بخير الحمد لله 
 .
بعد شوي نفس الحرمه تسأل اختي نفس الأسئله !!! يعني بكذب عليك؟ 😧
والمشكله يسـألون أختي كيف حالي أنا ! وأنا جالسه جنبها وقدامهم 🙄
. 
هذا النوع من الأسئله له إجابه واحده، لكن أنت مضطر كشخص عاقل بالغ متملق منافق أنك تغير الاجابات..
يكون عندك تشكيله من الاجابات : الحمد للهبخير الله يسلمك طيبين واللهالله يسلمك ..
تحتاج برضو مخده صغيره علشان تاخذ غفوه بعد هالأسئلة لأنها مرهقه..
 .
 ملاحظه ، مالك صلاحيه ولا حق أنك تقطع الأسئله وتبادر بالسؤال عن حال هذا الشخص علشان تتملص من اسئلته..
لو قلت مثلا ً ( الحمد لله بخير، كيف حالك انتي؟ ) راح تطنشك وتكمل نموذج الأسئله الي عندها
. 
في الواقع أن السؤالين ( كيف حالك ) و( وش أخبارك ) لها إجابتين مختلفه إذا كنت مع صديقاتي أو أقارب مقربين جدا ً..
“كيف حالك” هو سؤال عن حالتك بشكل عام، هل أنت بخير أو لا..
“وش أخبارك” هو سؤال عن جديدك، يكون جوابها مثلا ً ( أبشرك ختمت اللعبه الي ذاك اليوم ) ( شفت الفلم الي أعطيتيني ) وهكذا.. أخبار يعني ..
.
بس ما أعتقد أن هالحريم يهتمون بأخبارك فعلا ً، They don’t give a shit..
لو قلت لها أبشرك صبغت غرفتي أو غيرت أثات الغرفه بتكون قاطعتني وسألت السؤال الي بعده، لأنها مبرمجه أن مدة الجواب تكفي فقط لجملة ( الحمد لله بخير ) ، هي مب وقحه، لكنها سرحانه ههههههههههه
.
المجتمع تخطى الهدف الأساسي من الجمعات، علشان كذا صارت ممله ومتكلفه وفيها بروتوكولات كثير..
إن شاء الله الأجيال الجديده يتخلصون من هالهراء، مع أني ما أعتقد ألحق عليهم، لأني من الحين اعتزلت الجمعات إلا الضروري منها..
. 
** الكفحله قد تحمل معاني اخرى في مناطق اخرى، أنا ما أعرف إلا هذا المعنى فلو أحد شطح بتفكيره أنا مالي دخل..
. 
 
 
 

2 thoughts on ““كفحله”

    1. 😂😂😂 لأنهم أصلا ً مو سامعينك، مفترضين أن جوابك مطابق للي ببالهم وبس

      Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

This site uses Akismet to reduce spam. Learn how your comment data is processed.