ولد وفي فمه ملعقة من ذهب..

 

 * صباح الخير * 

No English translation because it’s a damn subject that I can barely write it once !
.
.

سلكت أم السالفه عليهم، بس ما تنفتح هالسيره إلا مع ربعنا وبلاش فضايح وفشله عند الغرب..
أنا مب من الحزب الفله الي يروحون يشتكون للبيت الأبيض 😂😂

.
السالفة فضفضه لأن قلبي غرق واختنق وماعاد أقدر حتى أرسم ورده أو أكتب اسمي بدون ما أخرق الورقه..
جيبوا قهوتكم أو سطل شاهي قبل القراءة
.
.

تنويه مهم للذكور لو أحد منهم تواجد هنا وقرأ الموضوع، ما عمري أعمم على سائر الرجال 
وما عمري أفترض الأسوأ منهم، صحيح أني غاسله يدي منهم بس أدرك تماما ً أن فيه نسبه جيده منهم يستحقون الاحترام، لكن مب لأنهم ذكور، لأنهم أوادم بغض النظر عن جنسهم، الاحترام يعطى حسب العقليه والأخلاق والمبادئ، ما يهم ذكر أو انثى..
وفي كلامي أتكلم بشكل عام لكن أتمنى توصل الفكره اني مب مجنونه جايه أتهم كل الرجال بهالأمور، بالمقابل ترى ياكثر الحريم والبنات الي ودي أحطهم بحفره وأقفل عليهم، مافيه جنس كامل لأن الجنس مب معيار..

.

.
 وريث الآلهة 

فتح عينه على هالدنيا وإذا به ذَكَر، (فيزيائيا ً طبعا ً.. ويا كثر الذكور الي أنا أرجل منهم مع كل ما أبديه من نعومه مطلقه)..

المهم، فتح عينه على هالدنيا كرجل، ما كان بيده يختار جنسه، لكن حتى لو كان باختياره فبالتأكيد راح يختار أنه يكون ذكر
 أكيد يعني، مب هو الجنس الأعلى؟
.
ولد وفي فمه ملعقه لعينة من ذهب ، هالعباره ما تنطبق في الحياة إلا على الرجال في مجتمعنا..
يعني انولد ومعاه كل الامتيازات والأولوية والأفضلية، لمجرد أنه ذكر طبعا ً..
في مجتمعنا يؤمنون أن الله أعطى الرجل امتيازات، هالامتيازات ما استحقها ولا عمل علشان يكسبها، إنما تعطى له تلقائيا ً لمجرد أنه ولد ذكرا ً..
وعليه فان الجنس الآخر أي الانثى، مجبر على الخضوع والطاعة لأنه انولد كالجنس الأدنى، وطبعا ً مين حط القوانين؟
يقولون أن ربي فرض هالتقسيم، اتهام خسيس، والدين بريئ عن هالقرف
وأدلتكم من القرآن لا تفشلون أنفسكم وتجيبونها ترى تفسيركم لها من كيسكم المخروق وحسب هواكم القذر..
.
لما كبر الذكر واكتشف الامتيازات الممنوحه له من السماء جلس وتربع وبدأ يصيح وهو يحك كرشته ويردد مع القطيع أن الدين عدل بين الجنسين وأن المرأة لها حقوقها كامله وأن الإسلام رفع من قدر المرأة ..
.
ولما ينظرون للشعوب الأخرى يلاقون المرأه معززه ومكرمه وسعيده، فتفاجأوا، كيف كذا؟ وافشلتاه خلونا نرقعها ..
فقرروا يلصقون التهم السيئه على الغرب ، قالوا أن المرأة الغربيه يتم اغتصابها في الشوارع ومالها قيمه ، لأنها طلبت مساواتها بالرجل وأنها ندمت على المساواه..
.
وقالوا أن المرأة في الغرب مالها كرامه وأنها زي الحلوى المكشوفه يتجمع عليها الذباب ..
وكلام كثير أخجل أقوله ، كلها حاجات غبيه ما تقنع إلا قليلي الوعي وضيقيّ الأفق..
يعني ما فهمت الغرب عندهم مساواه زي ما قلتوا وأنها انقلبت سلبا ً على المرأة؟ ولا قصدكم  الإسلام هو دين المساواه؟ لأن ما أشوف هالشيء مؤخرا ً..
.
وبينما يتربع الذكر ويتبطح نلاقيه يتبجح على الإناث ويقول لهم عادي انتوا ولدتوا كذا ومن كمال الدين انكم تتقون الله وما تعاندون..
يعني ربطوا كمال الدين بالخضوع لجنسهم العجيب، المرأة الي تطالب بحقها هذي فاسده
والرجل الي يطالب بحقوق المرأة يقولون عنه ديوث.. ويقولون له المتدينين ( جيب زوجتك أو أختك عندي طالما عادي عندك )
ممتاز يا متدينين ، الرسول صلى الله عليه وسلم واجه أنشب خلق الله الي هم كفار قريش، ما عمره استخدم ألفاظ زي هذي..
بس المتدينين عندنا إذا اختلفت معهم في الرأي يسبونك ويطلع المنحرف في داخلهم ، جانب من شخصياتهم تفكيره محصور بين الساقين وأعتذر على هالوصف بس كذا أغلبهم الي أشوفهم يناقشون في النت ..
.
سائر الأيام تحصله يتباكى ويقول أحاديث وينشر آيات ويتمسكن
وإذا حشرته وقلت له أن الشيء الفلاني حلال وأن الشيخ الفلاني أخطأ، ينهال عليك بالقذف والسب
ويطلع انسان بذيء ومصطلحاته تخليك تحلف أيمان بالله أنه توه كان يتفرج فيلم إباحي ..
.
الي يقول لك (مافي داعي لكشف الوجه احتسبي الأجر حتى لو فيه خلاف فقهي والمؤمن الحق يجتنب الشبهات) <– قل قسم
هو ما يجتنب الشبهات ولا حتى المحرمات طبعا ً لأنه رجال معصوم، عادي يقذف ويسب ويظلم زوجته وبناته بمنطق مريض واستعبادي..
مجتمع سااااكت عن مخالفات الذكور من خمور أو شذوذ وإباحيات، كلها ماحد يقول عنها شيء بالعكس يعتبرونها متنفسهم الوحيد..
بس إذا حرمه كاشفه وجهها أو موظفه قذفوها وهاجموها..
المقزز في الموضوع انهم حافظين أحكام المرأة كلها علشان يحصلون احد يطبقون عليه ويتفلسفون..
ادخل مقاطع مكياج احصل الرجال في التعليقات أكثر من الحريم وكلهم ردودهم تسم البدن
( صوت المرأة عورة ) ( لايجوز كشف اليدين ) ( المناكير تبطل الوضوء ) ( التشقير حرام يا **** )
ومدري وش مدخلكم لقناة مكياج؟ صدق مالهم شغله
اصابعهم في خشومهم ويدورون احد ينصحونه علشان ياخذون اجر بدون ما يتعبون يعني....

.

.

لكل جنس دوره في الأسره 

الرجل سهل عليه يمشي ( رياضه ) في الممشى بلبس رياضي مريح وملائم وصيفي..
لأنه ما جرب ينكتم تحت غطاء الوجه في الحر ومع المشي، وما جرب يلبس قماش أسود يسحب الشمس زي المجهر..
اوه لحظه لحظه، وش الي رياضه ومشي؟ المرأة مكانها المطبخ ، تلبي مطالب الرجل ..
ايه لأنه يشتغل برا ويتعب ويجيب لنا لقمة العيش..
راح الغابه وبدأ يصيد الغزلان ولما خلص راح يقطع الأغصان ويجيب حطب للموقد..
وهراوته انكسرت وهو يدافع عن زوجته من تنين حاول يختطفها..
.
في مجتمع ما، الرجل يعتقد أن الله قد فرض له امتيازات حتى لو كانت الأنثى أحق بها،
 حتى لو كانت أعقل منه وأقدر منه وأقوى وأذكى، تبقى أنزل منه !
.
يعني وحده دارسه بالجامعه ومتعلمه وواعية تتزوج درباوي وصخ ثوبه وفنيلته مصفره من وصاخته..
ومع ذلك يجي يتفرعن ويقول ( الرجال قوامون على النساء ) قامت عليك الدابّه يارب ..
لو الرجال يعرفون المعنى الصحيح لهالآيه كان صار المجتمع مكان أفضل وكان وقفوا عند حدهم وعرفوا قدرهم..
بس إذا بعض الشيوخ يستخدمونها بالمعنى الخاطئ (عمدا ً) فما أقدر ألوم القطيع على هالغباء..
فيه شيخ (مابقول اسمه معروف يحبونه البنات مدري ليش) استدل بهالآيه في إحدى تغريداته عن إسقاط الولايه!!
والله أنه يعرف معناها الحقيقي بس وش نقول غير حسبنا الله .. يلوون الآيات والأحاديث حسب الي ينفع الحاله ..
يقولون أن الرجال أكثر تقوى، ودايم يرددون الله يصلح بناتنا الي ينغرون ويتأثرون بسهوله..
لا يا روح أمك، أنت حتى لو تجيب كافر يمديه يصير ملتزم طالما أنه ذكر، لأن ماعليه شيء إلا إنه يطيل اللحيه ويبدأ يطارد الحريم يضيق عيشتهم..
سهل عليكم التدين، لأن دينكم سهل ، كله حلال وما حرمتوا شيء على أنفسكم، بس تعال للحرمه كل شيء حرمتوه عليها ومع ذلك لازلنا أقوى إيمان منكم لأن الايمان في القلب مب باللحيه ولا المظاهر..
كثير عوائل تلاقون حريمهم مع كرفهم في رمضان يختمون القرآن وما يفوتون التراويح وبعدد ما يمزح من الركعات..
بس رجالهم مع أنهم متبطحين بس يقرون صفحه من القرآن متى ما طفشوا ويصلون التراويح في المسجد لأنهم متبطحين طول اليوم يعني مالهم وجه ولا فضل ..
ومع ذلك لا زلنا في نظرهم ناقصات دين .. الحمد لله والشكراقسم بالله ما شفت أنقص من عقول رجال مجتمعنا ( المتمسكين بالشيوخ ورجال الدين والتقاليد الفارغه ) تناقشه فيبدأ يلف ويدور في حلقه مفرغه وإذا انحشر مستحيل يهدأ ويفكر ويقول “يمكن” أو “الله أعلم” ، لا طبعا ً، يبدأ موال السب والإنحطاط الأخلاقي...

..

.

مين الي تسبب في انحطاط أخلاق المجتمع؟

نبدأ بمثال بسيط، قيادة المرأة، ما كان فيه حجه للمجتمع علشان يمنعون الأنثى لحد ما بدأ بعض رجال الدين يحرضون الشباب على التحرش بالبنات، ووجهة نظرهم أنه نوع من التحرش المشروع علشان يردعون البنات من القياده وبالتالي يحمونهم من الأذى ..
والطامه الكبرى لما رجل دين معروف يصرح في برامج على الهواء يقول أن الدوله غير آمنه للمرأة، وأنها خارج البلد ممكن تقود بأمان !
( بغض النظر عن أن كلامه يعني بوضوح أن الشغله مب دين وإنما أهواء شخصيه )
يعني بلد الإسلام صار مافيه أمان، بسبب مين؟
مين الي حرض الشباب الدرباويه وقال لهم تحرشوا بالبنات؟
مين الي أعطى الشباب فكره أنهم مايعرفون يمسكون نفسهم؟ لين فين وصل التلاعب بالعقول؟ دايم من طفولتهم يسمعون أنهم عباره عن ذئاب ولازم نغطي البنات من الشباب الذئاب لأنهم حيوانات ماعندها عقل
طيب أبفهم شلون صاروا هم المسؤولين والأولياء والقوامين؟
توهم كانوا ذئاب ويتبعون شهوتهم.. ياكثر تناقضاتكم
.
.
فوبيا التقدم 
.
لما غاده المطيري عملت انجاز يشهد العالم بعظمته، جو رجال مجتمعي يقولون الله يخسها فين الحجاب؟ 
يقولون لو أنها تركت الانجاز هذا وجلست في بيتها كان أرضت ربها وأنه راح يعوضها في الجنه بشيء أفضل..
.
البنت اخترعت شيء ممكن ينقذ أرواح كثيره وأنت ماغير حاط أصبعك في خشمك..
عندنا مبدأ انهزامي يحرضك على احتساب الأجر بالجلوس فقط، ولا تحاول تتحرك من مكانك..
عفوا ً قصدي احتساب الأجر على حساب غيرك، طارد الناس بالأمر بالمعروف وترويع الآمنين، وأنت هكذا صرت ذو منزله عاليه أكثر من أي عالم ذره..
.
ذكروني بكلام قاله د.مصطفى محمود
( إذا نزل مؤمن وكافر إلى البحر فلا ينجو إلا من تعلم السباحة، فالله لا يحابي الجهلاء.. فالمسلم الجاهل سيغرق والكافر المتعلم سينجو )
.
.
أنا أزعل لأن فيه ناس لما تشوفك تغلط على رجل دين ( مخطئ ) ممكن تنهي علاقتها معك إذا ما أساءت لك أو حتى قذفتك..
يعني لهالدرجه أنت تتبعه بدون تفكير وتعتبره يمثلك تماما ً؟
طيب هو أخطأ وسبب مشكله في المجتمع وظلم ناس كثير بغلطته هذي، ليش تزعل لما المتضرر يتكلم ؟
رجل الدين مب معصوم من الخطأ فليش تعبده؟

.

.

الملحدين

.

سبب إلحاد بنات كثير في مجتمعنا هو أن الدين أصبح ضيق لا يطاق، لأن الناس ضيقوه ..
والمشكله لما أحاول أصحح أي معلومه دينيه أتعرض لهجوم وبأساليب سيئه جدا ً، خلتني أقرر ما عاد أصاحب أي شخص يحمل تقديس لرجال الدين بدون احترام لعقله وقدرته على التفكير والتمييز..
ولا راح أتقرب من أي شخص يحاول ينصحني في الدين ويعتبرني جاليات ما أفهم في الدين وأردد كلام أسمعه فقط ..
.
فيه لعبة اونلاين كنت ألعبها قبل فتره وفيها ناس من كل البلدان الي أعرفها والي ما سمعت بها من قبل..
مره شفت مسيحي يتكلم عن الله والأديان ويسألني عن هالأمور من منظوري كمسلمه
وهو شغوف بهالسوالف يحب يسمع عن الله والدين والمعجزات، ما يبي يسلم ولا يبيني أصير مسيحيه، يؤمن أن الأديان زي بعض..الكلام مع المسيحيين (المعتدلين) يخليك تستمتع لأنهم مركزين في دينهم على الله وعلاقتهم فيه.. احنا تركنا الله ورسوله وتبعنا الشيوخ
وخلاص قمنا نضارب بعض، نكفّر بعض، نقصي بعض ونتهم بعض ونتفاضل بين بعض ..
حزب الشيخ الفلاني، وحزب المذهب الفلاني والزفت الفلاني خلااااص ما طفشتوا وش هالقرف؟
نسوا أن الدين أولا ً طقوس شخصيه بين العبد وربه وثانيا ً أخلاق وسلام.. ما أشوف الحين لا ذي ولا ذي ....

غرباء *خجلت وأنا أكتبها يمين بالله*

كـــــــــل هذا في كفه وسالفة الـ”غرباء” في كفة أخرى ..
قال لك هذا حديث عن رسول الله، وفهموها أنهم هم الغرباء.. وبدأوا يتمسكنون ياعمري، نحن الغرباء يا الله ارفق بنا..

توضيح علشان الي يردد “نحن غرباء” زي الببغاء وهو مب فاهم..
المقصود بالغرباء في الحديث هم المسلمين ، يكون فيه زمن يصبح عددهم قليل جدا ً مثل أول ما بدأت الرساله يعني في عهد الرسول أوكي؟
وش معناها؟ معناها أن يكون عدد المسلمين قليل..
طيب الإسلام الآن منتشر وعدد المسلمين حول العالم يفوق الوصف أتوقع ما كان عدد المسلمين في التاريخ يفوق عدده الحين..
الحين عددنا يفوق عدد المسلمين في زمن الرسول صح؟ طيب إيش فيه؟ يعني باقي ما جاء زمن الغرباء حقكم!..

.

تدرون بإيش يتحججون الحين؟ يقولون أن المقصود المسلمين المتدينين المتمسكين بالدين وليس المسلمين عموما ً..
الحديث واضح بلاش كذب وتأليف، قصدكم كل المسلمين حول الأرض إسلامهم غلط أو كفار؟ كعادتكم إقصائيين حتى في فهم الأحاديث..
نستنتج من هذا أنه ما جاء الزمن الي يكون فيه مسلمين غرباء، يعني بالله ارتاحوا وريحونا ، قال لك غرباء ..
أساسا ً إذا جا وقت الغرباء فبيكون بسبب التنفير من الدين لحد ما يبقى على المله إلا ناس مب قريبين حتى من الدين الأصلي.

.

.

الإسلام دين العقل <–Not anymore

عشنا كثييير في ظل الدين ( الخاطئ ) وماعمرنا تقدمنا بالعكس لازلنا في الخلف.. تاريخ المسلمين لما كانوا متقدمين كان دينهم صحيح ومتسامح كما هو ، بدون إضافات وتضييق، يوم كانوا يدقون عود وموسعين صدورهم ومسوين جامعات والحريم فيهم الطبيبه وفيهم العالمه.. بس طبعا ً مجتمعنا يدفن السوالف ذي علشان ما نروح نقتدي في هالحريم الناجحات ونترك المطبخ، ويجوع رجل الكهف..
.
تعرف أن الشخص على خطأ لما يقول  لك ( كل الناس غلط وأنا صح )
وهذا حالنا ، نفترض أن الدول الإسلاميه الأخرى ماعندها دين كافي علشان تفتي، وأن أي خلاف فقهي معناها
نرجع لحكمنا احنا لأنه صح ! كذا بس احنا صح لأننا منبع الوحي؟ وش هالخربطه؟
طيب هم استندوا لأدله ومنطق يقنع، بينما أنتوا ما اقنعتونا بس تقولون اتبع وأنت ساكت..
والمضحك لما يقول لك أجمع العلماء، وهم ما أجمعوا إلا عندنا هنا ، باقي البلدان ما أجمعوا ..
.
إذا رفضت تفتح مخك وتسمع الطرف الآخر فأنت دايم غلط لأنك تقفل أذنك، زي ما علموك
( لا تناقش في الدين، لا تفكر كثير علشان ما تلحد )
يعرفون أن الي يفكر بيلحد لأنه بيلاقي تناقضات مختلقه ومستحدثه من الساده الكرام في الكم جيل الي راحت ..
.
كلام الحق دايما ً مقنع وماعليه غبار، بس للأسف الي أشوفه أن أي رجل دين يجيه سؤال عن مسألة معينه
ما يحاول يقنعك بطريقة صحيحه ترضي عقلك كإنسان عاقل، لا، يقول كلام مكرر وملقن وتحسه أبيات شعر:
يا شيخ بعض العلماء أجازوا كشف الوجه فماذا ترى؟
ج:

اوكي ومين يقرر فين الحدود بين الصح والخطأ؟ وليش ما يكونون هالناعقين بالفتنه يطالبون بحقوقهم فقط؟ أنا أبي تفسير وكلام واضح لأني أشوفها آراء شخصيه بدليل اتفاقها مع عادات مجتمعنا الي أساسا ً من الجاهليه هذي حركاته، مافيه جديد..
بينما مسلمين الدول الأخرى الي عادات رجالهم تختلف عن رجالنا، نحصل حدود أحكام المرأه عندهم أوسع نوعا ً ما..
يعني الشغله عادات مب دين..
لما تشوف أحد يسأل علامه أو مفكر إسلامي كبير تلاقي هالعلامه يقنعه بالمنطق وتبدأ تقتنع معاه
يبدأ ينفتح قدامنا باب من الأمل والسعاده ونبدأ نعجب بديننا كيف هو عظيم ومعجز في كل آياته..
نبدأ نتنفس الصعداء ، الحمد لله يارب على نعمة الإسلام الصحيح المشرق الي كنا فاهمينه غلط طوال السنين..
بس ما يمدي هالعلامه يكمل كلامه إلا جوك ناس “ناعقين بالفتنه” ويكفرونه وخلاص أنت كذاب أنت زنديق تبي تظلنا عن ديننا....

.

.

الفضائيين يسلمون عليكم  

اليوم قرأت خبر قديم نوعا ً ما، علماء الفلك رصدوا موجات من الفضاء الخارجي يعني يقولون يمكن فيه كائنات أخرى..
هل نصدق أو لا مب مهم، بس شوفوا الناس شغالين واحنا جالسين نناقش لو يجوز الحرمه تتوظف ولا لا ..

المهم تخيلت فيه كائنات ثانيه، يااافشلتنا لو يدرون وش مسوين في كوكبنا..
حسيت بعد هالخبر أننا شيء ضئييييل وتافه في هالكون، ومع ذلك نشوف همومنا كبيره جدا ً..

هذا كان تنفيس عن ما في خاطري ويمكن يمكن ينحذف بعد ما أروق

.

 

2 thoughts on “ولد وفي فمه ملعقة من ذهب..

  1. العرب في الجاهلية كان تعاملهم مع المرأة أفضل بكثير من تعامل بعض الإسلاميين اليوم..حتى وقت أجدادنا كانوا يقدرون المرأة وكانت مساوية للرجل أفضل بكثير من اليوم، كل المشاكل بدأت مع الصحوة بس لحسن الحظ الوضع جالس يتغير، شعورهم بأنهم غرباء (اللي فاهمينه على كيفهم) دليل على أنهم يحتضرون والأجيال الجديدة بتعيش وضع أحسن من وضعنا..صح اننا مساكين لأننا عانينا بس أهم شي ما يستمر هالوضع للأبد ب_ب

    Like

    1. M A.M هلا ♥ ♥

      في الجاهليه يوم كانوا يدفنون البنات عالأقل جابوها من الآخر، عندنا قال لك مسلمين وهم دافنين البنات بشكل أشنع، عيشي بس مسلوبه من كل شيء زيّك زي البهيمه، زي السمكه، زي الحلوى، زي الستاره ، مابقي شيء ما شبهوا فيه البنات
      وآخرتها يجيك الفئه الي ما يساوون ظفر، ويقولون (و أنت بكرامه) بعد ما يقولون كلمة بنت أو اسم بنت

      بالنسبة لأجدادنا يعتمد على المنطقة، سمعت عن منطقه هنا في البلد كانوا الأولين فيها يعاملون الحرمه معاملة النجاسه
      ما تاكل معاه ولا يشوفها وهي تاكل ، يعني تاكل بعيد ، وإذا مرضت تعتزل بعيد عنه لا يشوفها ولا حتى يعرف وش فيها
      وعلوووم الله يستر عليهم

      هههههههههههه الله يسمع منك ويطلعون يحتضرون

      أنا كنت مثلهم وأتبع الي يتبعونه وأتعصب بعد، بس إذا أحد ناقشني أشغل مخي وما أسب أو أتهجم
      يعني ياليت بس يعرفون اننا كنا في مكانهم من قبل، وما حكمنا بدون ما نشوف

      Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.