Galaxy in a Jar

الفضاوه خلتني أتحمس وأجرب هذا الشيء

ماعليكم من الأيدي الملوثه 😂 ماتروح بسهوله وما خطر ببالي ألبس قفازات قبل ما أبدأ الشغل..
 الأدوات المطلوبة  قطن – ألوان طعام (أزرق وأحمر أو زهري ) – مويه – جليتر سواء كان صمغ أو بودره..
وطبعا ً العلب الصغيره مره وتكون لها سداده أو غطاء فلين بنّي ، أنا اخترت هذي لأني كنت أبغاها كبيره..
 الطريقه موجوده في الفيديو 
كنت أبغى أصور لكم الطريقه بنفسي، لكن البرد يجيب كسل ، المهم استمتعوا ~ ♥
ابحثوا في النت وبتحصلون أشكال وألوان أخرى ممكن تعجبكم أكثر..
فيه مدونه من المدونات الي أتابعها عملت هالطريقه قبل فتره طويله وكنت أبغى أحط لكم شرحها لأنه مرتب وواضح
لكن ماحصلتها للأسف..

يسمعون بالأسلوب !

 

لابد اني أقول هالسالفه لأنها من السوالف الي مايروح أثرها إلا إذا تكلمت عنها وسمعت آراء..
هالشيء تأجج في نفسي اليوم بينما أنا منسدحه أفكر في المطر وأقول ( نفسي أوقف في المطر فتره طويله ) <– برد يا فله
بس بعدها تذكرت أن هالشيء حصل من قبل وما كان شيء سارّ !!

المقدمه تحسسكم أنها سالفه خطيره 😂😂 ترى مب سالفة كبيره بس تخليني أعصب كل ما أتذكرها
علشان كذا قلت أشوف وش رايكم انتم

في أحد الأيام الماطره، بعد الاختبار طلعت انتظر أخوي يجي ياخذني..
وما أتذكر هل كان الاختبار سيئ ولا إيش الي حصل بس كنت متضايقه لأبعد الحدود والأخ الفله متأخر عليّ فوق هذا..
قلت له الساعه الفلانيه تكون عند الباب ! وتعديت نص ساعه واقفه عند الباب..
جلست تحت المطر أنتظر وأتصل عليه وجواله مغلق، أتصلت على أمي وأهل البيت كلهم
وكلهم يقولون ما ندري فين راح بس هو طلع من زمان <– حركاته كذا دايم، مب أول مره يسويها الوغد 😠

وبدأت الوساوس، يمكن صار له حادث، وجلست أتخيل الأسوأ وخفت، والنفسيه صارت في الحضيض وبقي لي تكه وأنفجر
جاتني وحده أشوفها متجهه عندي مب رايحه للشارع

حزروا ايش؟
جات وحطت يدها على وجهي بطريقة حسيت أننا نصور فيلم رومنسي .. دقيقه أوريكم صوره تشبه الموقف علشان تنصدمون معي..

حاطه يدها كذا تخيلوا !!! وتقول لي ( الجنه غاليه! )
أنا مارديت لأني مافهمت، هذا سؤال ولا سالفه باقي بتكملها ؟ قلت لها ( هاه؟ ) <–أبو الدلاخه انتي بعد
رجعت تعيد جملتها ( الجنه غاليه !)بعدين فهمت أنها تبي تنصحني وقصدها تدخل دخول مسرحي عظيم بمقدمتها الدراميه ( الجنه غاليه )
واكتشفت أنه سؤال وليس سالفه .. لكنه سؤال سخيف زي مقدمتها ودخولها البيض..والرجال في الشارع كلهم يطالعون فينا، شكلهم يحسبوننا ليزبيانز جالسين نودع بعض..
ولشدة صدمتي كان استيعابي بطيء، وأدركت أن يدها لسه على وجهي 😂
رحت بعدت يدها من وجهي وقلت ( ايوه؟ ) لأني جد انخرشت، وش هالبنت ؟
قالت ( ليش الاستهتار بالحجاب؟ وbla bla bla ) <– ما أذكر وش قالت لأن الدنيا فجأه صارت بريال عندي
وكان نفسي أطعنها ، نااااقصتك الحين؟ ألاقيها منك ولا من أخوي والمطر الي بيخليني أمرض بوسط اختبارات؟
انتي في وادي وأنا في وادي !! كانت خانقتني العبره من الموقف الي أنا فيه من قبل لا تجي <– انفجار هيروشيما داخل عقليبس رجعت لرشدي وقلت لها ( جزاك الله خير ) ولفيت وجهي لجهة الشارع أكمل انتظاري علشان تنقلع عني..

بس هي باقي مصره !!
والمشكله أشوف بنات طالعين من المركز عبايات مفتوحه وعطورهم أشمها لين بيتنا ومكياجهم كأنهم في زواج
^ ما أقصد أحكم عليهم لو غلط أو صح، بس قصدي أنهم كانوا مبالغين أكثر مني

لكن ممكن علشان أجسامهم ضخمه ما تتجرأ عليهم 👀 جايه عندي وحسستني أني لابسه ملابس السباحه وطالعه الشارع !

ما أدري وش أقول ، قال لك اسلوب يعني؟
متدخله في خصوصيتي ولو هي تبغى تنصح كان راحت للباقين وش معنى جايه عندي وأنا ما لفتّ انتباه أحد؟
المشكله لي نص ساعه وأكثر واقفه عالشارع وماحد يناظر لي، لين جات هي بالمشهد المخل الرومنسي حقها
صاروا كل الرجال يناظروني حتى بعد ما هي راحت ..

الواحد يتعلم آداب البشر قبل لا يطلع الشارع، تمد يدك وتمسك وجه أحد هي أكثر حركه ممكن تسويها إذا بترفز أحد وتفوّر دمه وتنبقس..
والله أفكر لو ما كنت متضايقه من قبل كان ممكن يصير ردة فعل سيئه أندم عليها؟
لو كنت فرحانه ومبسوطه والجو حلو وجات فجأه تنكد علي وأنا في كامل قواي العقليه والنفسيه، وش ممكن يصير؟

^
ترى مستحيل أضربها يعني، بس الصوره تبرد الخاطر ههههههههه

اوكي، هل الموقف هذا عادي، تجي وحده من آخر الدنيا تمسك وجهك وتتكلم معاك؟
لو مكاني وش بتسوون؟ معي حق في زعلي من سالفة اليد ذي ولا عاديه؟
ملاحظه، الموضوع مب على سالفة أنها تنصح، مع أن لبسي كان ساتر لأنه برد ومافيه شيء تنصحني عليه
بس أتكلم عن حركة اليد البايخه