محاولة تغيير عادة سيئة ~ السهر

^
من تصويري في أحد الصباحات 
بعض الناس يكونون عالفطره البني آدميه لحد ثالث ثنوي، نوم بالليل ومعيشة بالنهار..
وفيه ناس تبدأ تتمرد عالنظام هذا من المتوسط، زي بنت خالتي التابع الوفيّ حقي..
.
أنا تمردت على الفطره من قبل 8 سنوات أو أكثر..
علشان كذا شعور الذنب ذابحني على خلايا جسمي، أحس إني زي الأب السكران الي يعامل عياله بوحشيه
ويحرمهم حقوقهم، بينما هم “الخلايامتفوقين في أدوارهم، ماجاتني أمراض بفضل الله، وكل واحد منهم يؤدي وظيفته بدون ملل ولاشكوى ولا راحة ولانوم..
.
زمان قبل ما أكون الأب السكران لخلاياي، كانوا مبسوطين وكانت النتيجه أن مناعتي قويه بشكل لا يقهر، والله بدون مبالغة ماكنت أمرض !!
مرات أقول ممكن الوعكات الصحيه الي تجيني الآن هي لأن خلاياي مرهقين ومكتئبين بسبب سوء المعاملة..
سالفة أن السهر مضر مب كذبه ولا مبالغه، حقيقة وأنا جربتها وانقلبت مناعتي بشكل غريب..
بالنسبة لي ما أدري ليش متمسكه بالسهر؟ طول عمري كنت أعشق الشروق والصباح، يعطيني صفاء وسعاده لا توصف..
إذا سهرت للفجر أفتح الشباك أشوف الشروق وأندم أني ما نمت بدري، لو أني صحيت بهاللحظه كان أشوف الشروق وأنا أفطر وأبدأ يومي وأسوي مشاريعي والناس نايمه ..
.
الغروب يجيب لي كآبه والليل في بعض الأيام يحسسني أن الحياه ضيقه، وقراراتي الي أتخذها في الليل أندم عليها.. مافيه ألوان في البيوت في الليل، مب زي الصباح بدري الشمس تمتد من الشباك وتدخل الغرف وتحسسك بشعور الدفء..
قبل أيام تعبت وماكنت أعرف وش مشكلتي وإيش الحل بالضبط، بس الي أعرفه إني كنت إذا طلعت السطح وجلست في الشمس أحس بهدوء وراحه وشعور أن فيه شيء يطمنّي، أشوف العصافير ينزلون ياكلون الأكل الي تحطه لهم أمي في السطح ومره لقيت نحله واقفه على ملابسي 😂 ماتسوي شيء بس حسيت أنه شعور حلو تحس أنك عايش وينطبق عليك ( على قيد الحياة )
.
حياة السهر ما تحسسني أني على قيد الحياه فعلا ً، كأنها حلم بسبب ضعف التركيز والذاكره..
في فتره من الفترات عدلت نومي وتفاجأت أن ذاكرتي تحسنت بشكل كبير..
.
.
.
كنت دايما ً أتعذر علشان أسهر، وأقول ( الليل مافيه أحد ويمديني أسوي الي أبغاه بتركيز، بينما النهار كل العائله صاحين ويقاطعوني )..
وكنت أقول ( النهار يمشي بسرعه والليل يطوّل وفيه بركه بالوقت )..
.
بس اكتشفت أنها أعذار لأن السهر أسهل من الصحيان بدري، والحوسه أسهل من التنظيم..
للأمانه الليل قصير، ياما شغلت التابلت أرسم، وأذن الفجر وأنا ماحتى حددت وش أرسم ☕
والحين أغلب أفراد العوائل يسهرون، يعني لازال فيه مقاطعه في الشغل، بس ماعندنا مانع الحين سبحان الله !
.
في الصباح يكونون الناس نايمين، تفتح الشباك يدخل الهواء، ريحة الهواء في الصباح منعشه تعطيك إلهام تبدع في شغلك..
ليش دايما ً ما تطلع إبداعات السهرانين إلا عالفجر؟ لأن مفروض نكون نمنا وصحينا الحين بدري وبنلاقي هالإلهام ينتظرنا..
بس لازم نهوّن الأمور شوي، إذا الواحد كان صارم جدا ً مع نفسه ماراح يتعدل شيء..
هالأيام لازلت أسهر لحد 2 الليل .. وبعض الأيام لحد 3 لكن ماراح أخليه يستمر إن شاء الله..
وعارفه أن النتيجه ممكن ما راح تبان في السنه الأولى من تحسين نظامي، بس الصبر طيب (نتيجة من ناحية المناعة قصدي)
ممكن يصير انتكاسات ويخرب النظام يومين أو 3 أيام وأرجعه، بس ماراح أعتبرها فشل، أنا السبب اني أدمنت السهر فبسمح لنفسي ببعض الزلات الي ما تتجاوز ليلتين في الشهر، لأن التدريج حلو وما أبي أحسس نفسي بالحرمان والضغط والمسؤوليه..
وكمان الأقارب مرات يخربون النظام 😞 يعني يتعازمون ويسهرون وصعبه الواحد يصير منفس يروح ينام ويخليهم
خاصه اني أستمتع معاهم ومب منطقي أحرم نفسي من المتعه الي ما تتأجل، لو كان رسم أو أفلام بتتأجل عادي..
.
شعور حلووو اني أخلص حاجات كثييير وبعدين أتفاجأ إذا شفت الساعه تكون باقي 2 الظهر !! وأنا عشت يوم كااامل في الصبح ..
.
هذي صور كنت أصورها إذا صحيت الصبح، الشيء الحلو أنك تحس نفسك جزء من الحياه وأن الطبيعه صاحيه ومبتهجه
.
.
فيه شيء مهم، القومه من النوم صعبه سواء سهرت أو نمت بدري، بس احنا لما نعدل نومنا نستثقل القومه ونحسب أن هالنظام هو السبب.. بس نلعب على مين؟ على أساس إذا سهرنا بنصحى من النوم مفللين ونشيطين؟
برضو شيء مهم ثاني، تعديل النوم ممكن يكون صعب في الأسبوع الأول فقط ، نكون طول اليوم مخملين ونعسانين بس بعدها خلاص، والواحد يتعب اسبوع وينبسط للأبد..القيلوله في الظهر كويسه، أختي كانت تقنعني في القيلوله سنوااات وأنا ما أعترف فيها..
بس قبل فتره جربتها وكانت من جد تجدد النشاط، بس ما ينفع تكون في العصر أو بعده، لأنها بتجيب خمول أكثر..خطوة أخيره، بالنسبه لي فيه وجبات فطور معينه أعشقها ممكن أصحى من عز نومي علشان آكلها، فطلبت أهلي يوفرون هالأصناف وصرت أتحمس أصحى الصبح علشان أفطر، وطبعا الدنيا مب فوضى، إذا فات وقت الفطور وتأخرت بالنوم خلاص راحت علي، لو حاولت آكل فطوري اللذيذ في الظهر معناها خلاص ماصار حافز.. 
.
ترى جالسه أقنع نفسي بهالتدوينه ^ ونزلتها علشان كل ما أشوفها أستحي على وجهي وما أتراجع عن قراري..
بس أعرف أن فيه ناس ممكن ما ينفع معهم هالكلام بس أكيد بيقتنعون بطريقه أخرى، لا تيأسون من المحاوله 🌷
لازلت أنا نفسي في بداية المحاولات..اذا تخالفوني الرأي أو عندكم تعارضات معينه في الصباح
قولوها...

انتهت الاختبارات

 
^
من الصوره واضح إني أبحث عن شمس وأحتاج أطلع أتمشى في الطبيعه
فيه أحد ملاحظ أن بلوجر حاطين ايموجي أخيرا ً؟ 😆
طبعا ً مب ذاك الزود لأنها نفس الي بالجوال، بس تعتبر شيء  ✨
الحمد لله انتهت اختباراتي على خير (الثلاثاء الي راح) ..
 منتظره النتيجه، يقولون بعد 10 أيام تطلع..
إذا طلعت النتيجه بدون قلة حيا مفروض أكون خريجه خلاص إن شاء الله
المهم، رجعت إنسانه فاضيه مثل الأيام الي كنت أسوي فيها رمزيات أنمي 😂
وكنت أكتب تقارير <– أم الجو الي عايشته
أبدأ الحين أشوف القائمة الي كتبتها لـ”بعد التخرج”
إن شاء الله أقدر أشطب عليها كلها
الي عندهم اختبارات الحين، الله يوفقكم وييسر لكم ❤