Update ~

اعلان صغير 😁 فيه تصنيفات كثير شلتها من مدونتي، ما أبغى أكتب مليون تصنيف وبعضها مافيه عليه اقبال أو فيه مدونات كامله خاصه فيه.

موضوع Heal your body من ضمنها، السبب الرئيسي ان فيه مدونات كثير متخصصه في النظام الصحي المقدور عليه، نظامي الي أبغى أمشي عليه شوي متطرف ماراح يناسب الكل.

حبيت أذكر هذا الشيء علشان بس ماحد يفكر اني كنت ألعب وأبدأ شغله ما أكملها عباطه 😁

 

Ready to share

isla_280x280.32446830_38ytx37k
.
بعد ما انتهيت من الخطوات الأخيره في إعداد متجر على موقع Etsy أقدر الحين أتكلم عنه.
المتجر في بداياته والمنتجات الي فيه Printables، تحملونها وتطبعونها، هذا أسهل على المشتري ومناسبه حتى لنوع الحاجات المعروضه في الوقت الحالي.
محتويات المتجر المتوفره الآن هي طوابع لتزيين المفكره أو المنظم أو الدفاتر أو أي شيء، وموجوده حاجات ثانيه، مثلا ً بوستر عن التواصل مع الذات، وتقويم قمري لشهر يناير عام 2019 ولسى أكمل باقي الشهور. وطبعا ً بيكون فيه تقويم 2019 لكامل السنه ان شاء الله، وممكن شهر بشهر حسب الوقت الي يتوفر معي.
فيه حاجات كثير راح أضيفها مع الوقت باذن الله. من ضمنها بوستر بالعربي عن التأمل، لسى ما قررت تكون المنتجات بالعربي أو الانجليزي بس مع الوقت حسب الاهتمام الي أشوفه أقرر وش تكون أغلب المنتجات 
.
رابط المتجر ( Etsy )
.
إذا تعرفون أحد مهتم بالمنظمات/البلانرز والمفكره النقطيه وهالشغلات الي أعرضها شاركوا الرابط معاه وراح أكون ممتنه
.
هذي بعض الصور من المنتجات المعروضه

This slideshow requires JavaScript.

 

Horror nest *[]* عش الرعب

الي يقرأوون مدونتي على قارئ ووردبرس ما أضمن سلامة التنسيق ولا الخط .. أنا أنسق الي يظهر على مدونتي نفسها فالمعذره لأن قارئ ووردبرس ما يتعدل فيه لا الخط ولا المحاذاه
.
هذي المره أغلب التدوينه صور، بس فيه سالفة عش الرعب الي في العنوان بعد
..
في حوشنا حديقه كبيره والأشجار فيها طويله بما يكفي ان العصافير تنام فيها وتبني أعشاش
التنوع في الطيور ممتع، أصواتها وألوانها وتفضيلاتها في الأكل والأماكن
الجو الحين خريف والأوراق بدأت تصفر وتطيح بس بعض الصور أخذتها قبل ما يبدأ الموسم
..
ischerzo.jpg
..
DSC_0094
..
هذا الطائر اسمه الزرزور أحمر الجناحين، صوته رايق جدا ً في البدايه، بس إذا أحد قرب منه يطلع صوته زي الغراب، وقوي وجه طول الوقت جالس على الأغصان القريبه من الأرض وما يبغى يروح، يتوقع منك أنت انك تروح
لونه بالكامل أسود ما عدا أطراف الأجنحه إذا طار يبان لونها أحمر على برتقالي.. للأسف ما قدرت أصورها
..
1
..
DSC_0114
..
هذا النوع المفضل عندي من بين الطيور في المنطقه، نوع من أنواع البلبل اسمه أصفر العجز ، اختي تقول كأنه شخص مثقف وراقي.. معها حق، تحسون انه يترفع عن الهبل الي يسوونه العصافير، ما عمري شفته يتضارب مع الطيور الثانيه أو حتى يسوي إزعاج إذا مشينا تحت الشجر.. صوته حلو وكأنه يقول سالفه مو بس يغرد، وقت الفجر أحيانا ً يصحى قبل ما يأذن وبمجرد ما أسمع صوته أعرف أن الأذان بيكون في أي لحظه، وفي المغرب برضو وقت الأذان صوته يكون واضح ويستمر حتى بعد ما ينامون باقي العصافير.. صوته في المقطع التالي وحطيت وقت التشغيل مضبوط على بداية التغريد ، مب لازم تكملون المقطع للأخير
1
..
..
DSC_0120
زرزور أبيض البطن 
مخلين اللون البنفسجي ومسمينه على لون بطنه الي موجود في كل الطيور
المهم، هذا شايف نفسه، يجي قبل نهاية الصيف تقريبا ً، وما يطول، كل سنه يجلس بالكثير شهر، هذا الي أشوفه عندنا في الحوش يعني، ما أدري لو كان يستمر فترات أطول
مثله مثل الي فوق كلهم، يحبون التين، عندنا 3 شجرات تين وهم يتجمعون ياكلون الثمار الي فوق واحنا نقطف الي تحت 
لونه في الشمس رهييب ، ما سمعت صوته لحد الآن، بس شايف نفسه، ودايم يطرد الطيور من الشجره علشان يجلس عليها هو والي معاه، غالبا ً يجون 2 والسنه هذي 3.. ما شفت أكثر من كذا 
DSC_0124
..
1
..
..
..
الحين قصة المهندس الصامد وعش الرعب 
..
DSC_0131
..
الأخير هذا مسوي دراما وزحمه طوووول الصيف أشغلنا وينافخ وصوته واصل آخر الحاره هو والعش الزفت المدور حقه.. هو الطائر الوحيد الي ما أشوفه ياكل !
بس يشتغل ويشتغل ويشتغل طول الصيف، يجمع العشب وهو ليّن ويسوي عش مدور ومع الوقت يجف العش ويصير محكم ومرتب بشكل مو طبيعي 
اسم الطائر الحبّاك أو المهندس، له مقاطع في اليوتيوب عن طريقة بناء العش، فيها تقنيات مب سهله أبدا ً
الحباك الأصفر هو الذكر ويبني العش في محاوله انه يغري أنثى (لونها بني أفتح من البنيين العاديين وفيه صوره لها تحت) وإذا أعجبها العش تسكن فيه ويفرخون ويطيرون الصغار قبل بداية الشتاء..
بس لو العش ما أعجب بنات العز وش يصير؟ يقوم ينتفه ويطيحه 
السنه هذي ما حتى أعطوه فرصه، كل ما جات انثى وحاولت تستقر يجون الباقين يخربون العش ويحاولون يطيحونه.. طيحوا عليه العش الأول وزعل وصار كل مغرب يقوم يصيح بأعلى صوته ( يلعنهم الظاهر ) وفي النهايه سوا واحد ثاني محكم لدرجة أن رياح الخريف المجنونه الي تصحيني من النوم ما قدرت تطيح هالعش، بس للأسف كل مغرب يجي يتضارب مع العصافير الي يحاولون يطيحونه، ما صار مهتم انه يكون عائله لأن الموسم انتهى، المسألة صارت شخصيه ، وقدر يثبت نفسه وللحين بيبدأ الشتاء والعش صامد .. أبوي كان يفكر بجديه يشتري مسدس لعبه الي يرمي، ويصير يرمي على الي يخربون، لأن المكان الي يجلس فيه أبوي قدام الشباك ومطل على الشجره وطول الصيف يراقبه يشوف وش آخرتها.. برضو شباك غرفتي مطل على ساحة المعركه وطول الصيف أزعجوا أهلنا. الي يبغى يسمع صوته  ( هنا )
..
DSC_0119
..
العش الصامل المهجور.. شكله السنه الجايه يجون عصافير بزران ومراهقين يسوون مغامرات في العش المسكون ويعنني قصته أنه فيه لورد بنى العش
لزوجته وماتت وهو انتحر وباقي أرواحهم داخل العش 
.
هذي تحت صورة الانثى، معليش على الجوده، من بعيد مصورينها علشان ما تخاف وتطير وهي مصابه. كنت شايلتها علشان النمل ما ياكلونها وهي حيه ، بس ارتاحت دقايق وأخذت غفوة وطارت زي الفل 
.
weaver bird ischerzo
.
DSC_0130.png
.
 في الصوره أعلاه يقول “كم منزل في الأرض يألفه الفتى          وحنينه أبدا ً لأول منزل” يقصد الي طيحوه الدرباويه قبل 
.
.
..
1
..
..
DSC_0238
ما صورت الورد في الحوش لأن فيه حوسه بس صورت المجموعه الي قطفتها علشان أجففها وأستخدمها في تزيين المفكره لأن الدفعه الي قبل خلصت
..
بس هذا كل شيء.. فيه طيور ما صورتها زي الهدهد والعصفور البني العادي، والبوم والصقر والخفاش، كل هذي الطيور متواجده باستمرار بس ما ألحق أصورها للأسف، لو لحقت عليها بنزلها في الانستا عموما ً .. طائر الطنان نزلت له مقطع فيديو قصير في الانستا وهو يلعب في المويه أو يتروش
.
1

Red Queen series

انتهيت من قراءة سلسلة روايات Red Queen، كانت تجربه ممتعه مع أني طفشت وأنا أنتظر الكتاب الأخير ينزل.. السلسلة كانت اقتراح من صديقتي يونا وكالعاده أستمتع بتوصياتها.

redqueen
.
اسم السلسله Red Queen
عدد الكتب 4 + كتاب فيه قصتين قصيره عن شخصيتين من شخصيات الروايه
الكاتبه Victoria Aveyard
.
أحداث السلسله في عالم وزمن مختلف، البشر فيه منهم نوعين، ناس لون دمهم أحمر وهم عاديين مثلنا، وناس دمهم فضي وهذولا النشبه عندهم قدرات خارقه، هذا الشيء أعطاهم سلطه وأفضليه على الحُمر، وصاروا أسياد العالم، هم الجنس السائد، هم الملوك وهم العوائل النبيله وعيال العز.. الحمر كلهم خدم وكادحين ويستعبدونهم يصنعون ويشتغلون وينتجون علشان اقتصاد البلد يمشي وعلشان الفضيين الزفت ماعمرهم بيسوون لأنفسهم ملابس أو بيوت أو أكل.. القانون في بلد نورتا ( الي تبدأ فيه الأحداث ) أن كل شاب أو شابه يوصل عمره 18 سنه ينضم للجيش اجباري، ويشارك في الحرب القائمه بين نورتا وبلد مجاور.. الفضيين يشاركون في الحرب لكن في مراكز بعيده عن الخطر، على أساس ما ننزل لهالمستوى ..
.
الناس الحرفيين اذا وصلوا عمر 18 سنه ما ينضمون للجيش، يظلون يخدمون البلد بالحرف والتجاره وهالخرابيط.. 
بطلة القصه مير بنت من أصحاب الدم الأحمر، أحوالهم ماشيه عالحافه، اختها الصغيره خياطه وماشيه بشغلها يعني ماراح يجندونها، أما أخوانها الثلاث كلهم تجندوا، كل سنه كان يطلع من البيت واحد منهم، يترك لأخواته هديه عباره عن حلق للاذن، مير تاخذ فرده وأختها تاخذ الفرده الثانيه.
الأب رجعوه من الحرب قبل سنوات وهو شبه ميت، نجى من الموت لكنه مقعد وخسر ساقه على ما أظن، ورئته كانت مصابه ويستخدم جهاز يساعده على التنفس.. كان شخص مكسور ومحطم تماما ً..
مير على خلاف اختها ماعندها أي مهارات ولا سالفه، تطلع الشارع تسرق من الناس بدون ما يلاحظون، تدبر لأهلها الي تقدر عليه من أكل أو فلوس، تحاول تكون ذات قيمه بس.. هي عارفه انها بعد كم شهر بيصير عمرها 18 وتتجند وتلحق أخوانها للحرب.
الحياه في نظرها بس كذا .. لكن في يوم من الأيام تغير كل شيء في حياتها
أعز صديق لها من طفولتها والي كانت تدافع عنه دايم وتمون معاه وتقضي أغلب وقتها معه اسمه كيلورن، أبوه وأمه ماتوا في الحرب من طفولته، وصار تلميذ لصياد سمك عجوز، يصيد معاه وبهذا الشكل ماراح يضطر يتجند لأنه أصلا ً ضعيف وأهبل وعلى نياته، ومير كانت مرتاحه أن كيلورن ماراح يتجند.  ( الي بالأحمر تقريبا ً حرق بالنسبه للبعض )
 في يوم من الأيام صار حادث للصياد العجوز ومات، ونتيجه لهذا الشيء كيلورن بيتجند
ومن هذي النقطه تقرر مير تمنع هذا الشيء وتحمي كيلورن مهما حصل، حتى لو اضطرت تهرب معاه من البلد وتصير مطلوبه
قالت له ( اترك الموضوع عليّ )  وراحت تحاول تجيب حل
كنت أحسب أن القصه بتكون كذا، بس حصل تغيير جذري في القصه، ماصارت السالفه انها تحاول تساعد كيلورن وبس..
فجأه كل الموازين في البلد تغيرت، حتى الفضيين شملتهم الأحداث، وهي وصلت لنقطه ما تقدر تتراجع عنها لأن مصيرها ومصير عائلتها تغير وصار فيه ارتباط بين مصيرها ومصير الأمير وأخوه.
.
ما كنت ملاحظه تطور الشخصيات في القصه لحد ما نبهتني يونا عليه.. البطله مير كنت أشوفها في الكتاب الأول شخصيه قويه وعندها مبدأ التضحيه ومستعده تساعد أصحاب الدم الأحمر بالي تقدر عليه.. بس يونا قالت لي انتظري تشوفين الكتاب الثاني وبتكرهينها 
في الكتابين الثالث والثاني كانت شخصيتها مو مستقره أبدا ً، صح صارت لها أحداث بس كانت فعلا زي ما قالت يونا، تبالغ في الدراما، تبالغ في التمسكن والاستضعاف وأنا مسكينه أنا حياتي بايخه ومن هالكلام..
هذا الشيء خلاني ألاحظ كيف رجعت تتغير شخصيتها في الكتاب الأخير وصارت فعلا ً انسانه مرت بتجارب وعرفت أن الناس عندهم مشاكل ودراما أكبر من مشاكلها أو مثلها، ناس يشاركونها الألم والمعاناه بس يحاولون يغيرون الوضع مب متسدحين.. 
.
ممتنه للمؤلفه انها ما خلتنا نتألم كثير على الشخصيات، مع أن واحده من الشخصيات الي كنت أحس وجودها مهم ماتت وهذا الشيء كان صدمه بس كان واقعي للأمانه، يعني الأحداث كلها جامده وهم في مواقف صعبه، بتكون القصه طفوليه لو كل هالأكشن صار وماحد مات 
بس ما أحسها من المؤلفين الي يبغونا نبكي ونتأزم طول القصه، ما كان فيه نكد وحركات بعض المؤلفين الي يكتبون القصص وأحسهم يقولون ( ابكوووا، انغبنوا وتنكدوا )
فيكتوريا منفتحه في حاجات كثير وواضح انها انسانه متسامحه مع الاختلافات كثير ، الأديان، المعتقدات، الألوان، الجنس، وطبعا ً لازم تقوم تدخل سوالف المثليين في القصه (في الكتاب الثالث فجعتنا ودخلت السالفه) ، هي ما عندها مشكله مع أي فئه في الحياه، علشان كذا شفت انها محبوبه إلى حد ما، وكسبت جماهير كثير، خاصه أن الشخصيه الي هي خلتها مثليه لها أصلا ً فانز كثير يعني مب شخصيه مهمله أو ثانويه
.
.
السرد في الكتابين الأول والثاني يكون على لسان مير
في الكتابين الثالث والرابع يكون كل فصل فيه اسم لواحده من الشخصيات تحت رقم الفصل، تكون القصه مسروده من منظور هذي الشخصيه ، وهذا الشيء ممتع جدا ً، كنت أستمتع في فصول بعض الشخصيات أكثر من غيرها، كلامهم مع أنفسهم ونظرتهم للي حواليهم تضحك أحيانا ً، وتعطيك برضو فكره أكبر عن الي يصير من وجهات نظر مختلفه
.
انتقادي الوحيد على القصه ويمكن بالنسبه للبعض يعتبر عادي، بس الشخصيات صغار في السن، 17-18 سنه، بالكثير 20..
أحداث القصه فيها حاجات أكبر من عمرهم وعادي صملوا فيها.
.
الي ما قرأ الكتاب خلاص مب لازم يقرأ الباقي ( الباقي حرق شديد للعمود الفقري تبع القصه بالكامل لحد النهايه )
، هذا تقييمي للشخصيات بعد ما خلصت ويمكن يخرب عليكم. حلو الواحد يكون وجهات نظره عن الشخصيات بدون أحكام مسبقه
..
لحد الآن ما أعتقد ان فيه شخصيه أقدر أقول أنها مفضله لي، يمكن أكثر شيء حسيتهم مثيرين للاعجاب وصاملين ومبادئهم حلوه هم شيد وفارلي، فيه شخصيات زي كاميرون أحس روحهم عاليه جدا ً.. الأمير وأخوه ودي أمسك روسهم وأصكها ببعض أشغلونا وكل ما قلت هذا طلع عاقل يطلع أخس من أخوه. ورعان
.
بالنسبه لشخصية كال، كنت أشوف شخصيته مراعيه ومتعاطفه وبنفس الوقت قويه، حسبته بيكون شخصيه عظيمه وتستاهل الاعجاب، لكن مع الوقت تبان شخصيته أكثر، مب ناحيه سلبيه جدا ً لكن حسيته نوعا ً ما ضعيف ويائس، ما يعرف يتعامل مع المواقف، ما يقدر يقرر قرار نهائي وهالشيء قالوه في القصه أصلا ً
.
ميفن شيب شعري ورموشي، أصلا ً يوم لقيت فصل في الكتاب الأخير مكتوب تحته ميفن انفجعت، ما أبغى أدخل عقله ولا أعرف في ايش يفكر، وضعه صعب مسكين، يحزن وبنفس الوقت يستفز
.
ومن الأشياء الي حبيتها هو كيف قدرت مير توفر لعائلتها شيء كانوا مستبعدين انهم يحصلون عليه من زمان الي هو الأمل.. مع أنها كانت بدون فايده وناشبه لأهلها بس أقدر فيها حبها للعائله، مشاعرها لهم قويه لدرجه أن الي حواليها برضو صاروا يهتمون
.
.
نبذه عن القصه من البدايه للأخير، حرق جامد كتبته للي ما يبغى يقرأ القصه بس عنده فضول يعرفها ويعرف نهايتها، مع العلم أن فيه أحداث ثانيه تبدأ وتنتهي مع القصه الرئيسيه وتنتهي بس ما كتبت عنها 
.
مير المذكوره أعلاه كانت تدج في الشوارع تسرق، وسرقت فلوس من واحد وقفطها، وحس أن حالتها مره عدم وحاول يساعدها، أعطاها فلوس وعرف اسمها وأعطاها اسمه ومشى، هي كانت منهاره بسبب سالفة كيلورن وسالفه أسوأ منها حصلت بعدها فكان واضح عليها أنها منهاره.. اليوم الي بعده الجنود عند الباب يطلبون مير ويقولون تعالي القصر، أخذوها للقصر ولبسوها ملابس خدم وقالوا فيه أحد توسط لك بوظيفه هنا في القصر، هي فرحت لأنها الحين راح تقدر تصرف على أهلها وماعاد تحتاج تتجند، وعرفت أن الآدمي الي سرقت منه أمس يشتغل في القصر ومكانته عاليه.
في هذاك اليوم كان فيه احتفال كبير يستعرضون فيه بنات النبلاء قوتهم ويتنافسون على لقب معين، الي تفوز فيه تتزوج الأمير. في وسط الحفل سمعت الملك يحيي الحضور باسمه واسم ولده الأمير، وقال اسمه وكان اسم يضحك بالنسبه لمير، جلست تضحك بس يوم شافت الأمير طلع هو الي سرقت منه فلوس الليله السابقه وهو الي وظفها في القصر !
المنافسات الي تقام في الحفل كانت محاطه بمجال كهربائي علشان الحوسه الي تصير تحت في الميدان ما تصيب الجمهور الي هم عائلات نبيله وعيال عز.. صار خطأ ومير زلت وطاحت تحت وكانت عارفه ان المجال الكهربائي راح يحولها لرماد وتنتهي حياتها خلاص، لكن تفاجأت انها ما تأذت أبدا ً، بالعكس طلعت الكهرباء كأنها جزء منها، كأن عندها قدره خارقه زي الباقين مع أن دمها أحمر ..
الملكه والملك تداركوا الموضوع واخذوها وحاولوا يكذبون على الناس، طلبوا من مير تسوي نفسها بنت دمها فضي ومن عائله ماتت في الحرب وعلى أساس كان واحد من الحمر متبنيها وتوهم يكتشفونها الحين، و علشان تكون تحت عيونهم طول الوقت خطبوها لأخو الأمير الي أصغر منه، هو أخوه من الملكه الثانيه. هددوا مير انها لو فضحتهم راح يقتلون أهلها.. مير بالمقابل قالت أبغى ترجعون أخواني للبيت ماعاد يحاربون، وتسقطون التجنيد عن كيلورن. وافق الملك وبدأت مير تعيش في القصر كأنها فضيه وتتعلم كل شيء، كانت عارفه انه في الوقت المناسب راح يقتلونها ويسوون كأنه حادث لأنهم ماراح يضمنونها، فصارت تحاول تلاقي فرصه تهرب، واكتشفت أن فيه جيش ثوري سري في البلد من الحمر نفسهم، وعندهم جواسيس في القصر عباره عن خدم، وقدروا يتواصلون معها ويحاولون يسقطون الحكم..
توصل الأحداث بعيد ويصير الأمير منفي لأن الملكه زوجة أبوه لفقت له تهمه أنه قتل أبوه الملك، كان المفروض يعدمونه هو ومير لكن الثوار ظهروا في الوقت المناسب وانقذوها من الاعدام واضطروا ينقذون الأمير معها ..
عاش الأمير مع الثوار الحمر فتره وبدأ يفهم حقوقهم ومعاناتهم.
صارت أحداث كثير وبعدها اكتشفوا الثوار ان مير مب حاله نادره، هي من الحمر لكن عندها قدرات الفضيين، وهذا الشيء يسمونه الدم الجديد، وفيه كثير مثلها، حاولت تبحث عنهم بمساعدة الثوار وتجندهم ضد الفضيين، الأمير ساعدهم علشان يرجع ياخذ الحكم لأنه هو الوريث. ولأنه واقع في حب مير مو قادر يخليها.
ينظم للثوار ناس من دوله بعيده، يكتشفون فيما بعد أن هذي الدوله أسقطت حكم الفضيين من سنوات وأنهم حاليا ً عايشين بمساواه بين الحمر والفضيين بدرجه ما يحلمون فيها الحمر في نورتا.. البلد الثاني يتعاونون مع الأمير والثوار بحيث يكون هدفهم اسقاط الحكم وتهجيد الفضيين.
في جانب أصحاب الدم الفضي فيه أشخاص ماعندهم مشكله، زي خال الأمير، الي درس التاريخ واكتشف أن الشعوب أصلا ً زمان كانت حمراء وكانوا الفضيين مستعبدين وملعونين.. الأمير كان يبغى يستمر في الحكم ويوفر للحمر حياه شريفه ورواتب، بس الحمر زعلوا وسحبوا الاتفاق بعد ما وصل الأمير لمرحله بعيده في استعادة البلد والحكم.. في وسط الحرب وهو على وشك انه يخسر كان فعلا ً يفكر كيف ان التاج شيء ما يستاهل كل هذي التضحيات، وقرأ رساله من أمه الي ماتت في طفولته ومايذكر عنها شيء، الرساله غيرت فكرته وقرر يحقق فكرة مير والثوار عن دوله يعيشون فيها الحمر والفضيين بمساواه..
.
وبس، لكن لا تتوقعون النبذه هذي معطيه القصه حقها، الكتاب الأخير لحاله فوق 600 صفحه، والسلسله 4 كتب فالقصه مو بهالسطحيه يعني..

Heal your body – Raw food

 

تكملة لتدوينات النظام الغذائي الصحيح المرتكز على الخضار والفواكه الي بدأتها من قبل على هالروابط :
.
كنت أبغى أبدأ بوجبات غير مطبوخه لأن حسب أغلب الكتب الي قرأت منها كان الأكل المطبوخ بشكل عام شيء غير صحي، لدرجة أن فيه أشخاص استغنوا تماما ً عن الأفران في بيوتهم ما عدا عين واحده للشاي. طبعا ً ما أهدف أوصل لهالدرجه، عالأقل مب في الكم سنه الجايه
لكن شيء حلو أضيف لنظامي الغذائي كم وجبه في الاسبوع غير مطبوخه، لأن خلايا أجسامنا لازالت تتجدد وبناءها يكون من المواد الي ناكلها، ليش ما نبني خلايا من أكل صحيح وحيّ
.
لكن أولا ً لازم نعرف ليش الناس الي يقلبون نظامهم الغذائي يحسون بالارهاق والجوع والتعب وما يقدرون يواصلون؟
ويجيك واحد مسوي فاهم يقول لك ( علشان اللحم! محد يقدر يعيش بدون لحوم ) مع أن هالشيء مو صحيح 
بس أغلب الناس يشوفون أن النظام النباتي مجرد انك تبلع خضار وفواكه وبس، وهالشيء برضو مب صحيح
.
الجسم يحتاج طاقه عاليه علشان يواصل، وعلشان كذا لازم تعرف كم كمية السعرات الي تحتاجها لجسمك في اليوم الواحد.
مصطلح BMR هو عدد السعرات الي يحتاجها جسمك في اليوم الواحد حسب طولك، وزنك، عمرك وجنسك
من خلال حسبه بسيطه تقدر تطلع هالرقم 
للإناث
BMR = 655.1 + ( 9.563 × weight in kg ) + ( 1.850 × height in cm ) – ( 4.676 × age in years )
للرجال 
BMR = 66.5 + ( 13.75 × weight in kg ) + ( 5.003 × height in cm ) – ( 6.755 × age in years )
.
فيه آله حاسبه جاهزه عن طريق هذا الموقع 
.
احفظ الرقم الي يطلع في ملاحظه على جهازك أو ورقه وابدأ احسب كمية السعرات الحرارية في الأطعمه مع الكميات الي تستهلكها في اليوم. 
هذا جدول للسعرات الموجوده في بعض الأطعمه لكل 100 جرام، مع العلم أن 100 جرام تعادل نصف كوب أو 8 ملاعق طعام
Food-calorie-chart
.
الناس يبالغون في فوائد بعض الأطعمه حسب معايير قديمه خاطئه، علشان كذا الواحد إذا قرر يحول نباتي يروح على الكوسه والحاجات الي كنا نكرهها في طفولتنا ونحسب انها مفيده، مع أنها فقيره في السعرات والدهون والحاجات الي يحتاجها الشخص علشان يعيش على نظام صحي بدون ارهاق ومشاكل.
الي أقصده ان الناس يقارنون اللحم الي فيه سعرات بحاجات مافيها سعرات ويقولون ان النظام النباتي سيئ وضعيف ومب منطقي أو متماسك.
مع العلم ان الأطعمه النباتيه سواء خضار أو مكسرات وبقوليات فيها كم نفر مليان سعرات أكثر من اللحم نفسه، ومب صعب توفرها، ومافيها نفس المعاناه الي تحصل لحد ماتوصل لك.
المعاناه الي أقصدها شفتها في فيلم وثائقي يتكلم عن أكلنا، كيف مبرمجين على نوع أكلنا مع أنه غلط واحنا خلاص مؤمنين أنه سليم.
في البرنامج يظهرون أشخاص من بينهم أطباء معروفين تكلموا عن السرطان وتجاربهم في المختبرات على الفئران وكيف يقدرون يسببون سرطان للفئران بحاجات احنا نستهين فيها، وكيف يعالجونهم منها 
البرنامج على هذا الرابط (هنا)
.
آخر نقطه قبل لا أنتقل لطريقة الوجبه الغير مطبوخه الي جربتها.
سمعتوا عن التجربة الصينيه؟ ممكن تبحثون عنها: The china study 
بس بختصرها، التجربه هذي نفذت على مدى 22 سنه في 26 مقاطعه في اندونيسيا على 650.000 شخص. على مدى الـ22 سنه تم تكرار هالتجربه 50 مره 
يقسمون الأشخاص المشاركين في التجربه الى قسمين، قسم يخلونهم ياكلون أكل نباتي فقط، والطرف الثاني ياكلون لحوم ومشتقات الحليب زي ما يبغون. لاحظوا ان الي كانوا ياكلون لحوم اصيبوا بالسرطان، والقسم النباتي محافظين على صحتهم
بعدها قلبوا النظامين، الي كانوا نباتيين أعطوهم لحوم ومشتقات حليب، والي كانوا عاللحوم حولوهم نباتيين 
الي صار ان الي كانوا مصابين بالسرطان تشافوا من السرطان بعد ما صاروا نباتيين، والي كانوا نباتيين وسليمين اصيبوا بالسرطان وإن كان في مراحله الأولى
.
raw food
الوجبه الي جربتها كانت نودلز الكوسه، في النت مقاطع كثير لها ووصفات كثيره كل واحد ومزاجه
الوصفه الي اخترتها كانت بالأفوكادو، لأن الأفوكادو مليان سعرات حراريه ودهون وأنا أحتاجهم، ومافي أحسن من سعرات ودهون من مصدر طبيعي ومفيد 
الكوسه تحتاج تقطيع رقييق بالسكين أو استخدام آداه متوفره في محلات أبو ريالين تفرم الخضار بشكل نودلز
نقطعها ونرش عليها شوي ملح وزيت زيتون ( الاستغناء نهائي عن الملح في الأكل يسبب مشاكل نفس الاكثار منه )
نترك الكوسه على جنب ومع الملح وزيت الزيتون بتترطب وتصير لينه ويبان فيها طعم الملح والزيت أكثر 
.
في الخلاط نخلط أي شيء نبغاه
طماطم – افوكادو – بقدونس – بقايا الكوسه الي تبقى من آداة الفرم علشان ما نرميها – فلفل أخضر رومي أو حار للي يبغى – رشة صغيره ملح وأي بودرة تستخدمونها للأكل، ناس يحطون بودرة ثوم – ناس يحطون زعتر – طماطم مجففه – حرفيا ً أي شيء تبغونه
للأسف ما عندي لحد الآن جهاز تجفيف علشان كذا استغنيت عن الطماطم المجففه. أضفت شيء ثاني، لأني قرأت أن الجسم يستفيد من الخضار أكثر إذا كان معه فواكه فأضفت مانجو بس ما بان الطعم أبد لأني ما كثرت
اخلطوا المكونات وأضيفوها على الكوسه ، حركوها وزينوا بأي شيء، قطع طماطم كرز أو بقدونس أو أفوكادو للي يحبون يكثرون منه
بالنسبه لكميات المقادير لا تكثرون بالبدايه جربوها يمكن ما تناسبكم، طعم الكوسه مب واضح، علشان الي ما يحبونها ما يهونون من الفكره.
الوصفه أعجبتني لكن بجرب صوص ثاني لأن الأفوكادو جاب لي تخمه بشكل شنيع مع أني ما كثرت
بس عموما ً، الوجبه هذي مب مقياس.. كل مافي الموضوع انها سهله ومالها أضرار وتعتبر أكل طازج وغير مطبوخ.
فيه وجبات تختلف عن هذي، ألذ ومليانه فوائد. البحث عن وصفات للأكل الصحي الغير مطبوخ سهله لأن كثير ناس بدأوا يهتمون بهالمجال ويعرضون وصفات ماتخطر على البال.

 

فرق شعره بين الانطوائيه وعيش الحياة بشغف

Untitled-2

كنت متحمسه من العيد أكتب حاجات جديده بشكل اسبوعي لكن حصلت شغلات ما أعطتني فرصه أرجع.
.
بكتب شيء كان يقرقع في صدري بكل صراحه وشفافيه وانفلات، لأن هالشيء يمسني شخصيا ً وأعتقد انه يمس ناس كثير راح يفهموني ويمكن يفهمون أنفسهم لأن أنا ما كنت أدري عن هالشيء فيني إلا من فتره
.
وش سويتي هالاسبوع؟” هذا السؤال صدقي وعميييق، كم مره أسمع ناس يسألون بعض ويطلع جوابهم زفت متنيل بستين نيله. لأنهم حرفيا ً ما سووا شيء. رصيدهم من الحياه لهالأسبوع كان صفر.
ما أتكلم عن الانجازات والخطط.. أتكلم عن رصيدك من العيش على هالعالم، مجرد العيش.
.
لازم اعترف اني شخص يدخل أطوار غريبه متعدده خلال السنه، كنت أحسب اني غريبه ومتخلفه بس اكتشفت ان وضعي سليم لأن فيه تفسير منطقي طلع في الأخير.
كنت أستغرب ليش ممكن تمسك معي 3 شهور كامله قرفانه من الناس وأحسهم يشغلوني عن حياتي وما أبي أتكلم وأسولف سوالف عاديه؟ أنا مو انطوائيه، أنا بس أعيش الحياه ..
أحب أعيش حياتي مع نفسي أحيانا ً، أتواصل معها ومع الحياه.
.
احنا ناس تغلغلنا في حياة بعض، في حياة ناس ما نعرفهم ولا يفترض بنا نعرف عنهم كل هالقدر. متابعين حياتهم ونعرف عنهم أكثر من أقاربنا وجماعتنا. أحيانا ً يكونون ناس مهمين لنا فعلا ً مع أننا ما تقابلنا في الواقع، لكن برضو يكون غلط اننا ننخرط بحياة بعض طوووول الوقت.
ما يفترض اننا نعيش مع بعض بهالقرب، نحتاج نطلع من خشوم بعض. مو معقول احنا فاتحين برامج تواصل طول اليوم وأي أحد يرسل نرد من وقتها ! لأي حد ما عندنا حياه؟
.
إذا غاب عنك شخص كان موجود في وسائل التواصل لا تتوقع ان فيه مصيبه حصلت له، بالعكس هذا عايش حياته صح <– اقتباس من كلام اختي
وسائل التواصل مب حياه، وقتك الي تقضيه على تويتر/فيسبوك /انستجرام /تليجرام /واتس آب /سناب وغيرها مو حقيقي، أنت ما عشت شيء، رصيدك من الحياه لهالاسبوع صفر كبر راسك.. مجددا ً نرجع نسأل “وش سويت هالأسبوع؟” هذا بيكون توبيخ أكثر منه سؤال، لأنه بيخليك تكتشف انك ما سويت شيء، مهما كان الي قدامك متبطح أو يقرأ أو حتى ياكل ويشوف مسلسل فهو عاش أكثر منك.
.
لما أدخل برنامج وأجلس عليه أون لاين طول اليوم معناها أنا وصلت الحضيض، أتكلم عن نفسي هنا. اذا شفتوني فاتحه برنامج تواصل معين طول اليوم أو أرد على رساله في نفس اليوم معناها عندي مشكله ووصلت قعر الجحيم في حياتي الواقعيه علشان كذا هربانه ورايحه عالم ثاني.
لأني لما أكون في حاله سليمه ماراح أجلس بدون شغله أنتظر أحد يكلمني وأرد عليه. غالبا ً بكون مشغوله أعيش الحياه وأمارس هواياتي. وأضمن لكم وأحلف أن مشاهدة حياة الآخرين وانجازاتهم مب من بين هالهوايات. حتى لو كان حساب مفيد، إذا ما كان مجال واضح مهم أنا أحتاجه في حياتي اليوميه فما راح أضيع من وقتي في شيء ثانوي، بالاضافه اني أتابع شخصين أو 3 بالكثير كل فتره، ما أتابع مليون واحد بنفس الوقت. يعني ما أجلس طول وقتي أتابع حاجات مفيده، وش الفايده تكون متلقي وما تلاقي وقت تمارس الي تلقيته من فوائد؟ تصير شخص ماعنده إلا تنظير وكلام، مافي تطبيق.
.
الناس يبغالون في العيش مع بعض، ماصار فيه حواجز بيننا، الجوال صار آداة استحضار للناس قدامي، مافيه خصوصيه، ما تقدر تجلس على جوالك تسمع كتاب مقروء أو تستخدم برنامج مفيد بدون ما ينط لك تنبيه أن فيه أحد طفشان يبغى يرمي طفشه عليك.
وما يقدر الواحد انه ما يرد. عن نفسي فيه حالات أحب أجلس 3 أيام ما أرد على رساله، مع أني ممكن أكون قرأتها من أول يوم. بعد 3 أيام أرد رد رايق ولطيف ما أفجعك فيه. ممكن أشوف تنبيهات وأطنشها لأن عندي شيء أفضل أسويه لو ان شاء الله أنسدح عالسرير أرتب أفكار مخي المتزايده كل ثانيه بشكل يصدع.
.
hobbit NO
مو من حقك تلح على الشخص أنه يكون موجود لأجلك ويرد عليك ويكون متفرغ يسولف معاك أو ينتشلك من كل حفره تقع فيها خاصه لما يكون شخص تعثر في كل الحفر سنوات وماحصلك ولا مره بجنبه. ما يحق لك تتوقع من الآخرين يعيشون معك أجواءك ويكونون مبسوطين بالحاجات الي انت مبسوط فيها وتبغى تشركهم معاك بالغصب.
.
hobbit.gif
طيب، هل ياترى أصبح موقفي واضح الحين؟ واضح الحين ليش تمسك معي كم شهر أختفي من الناس وما أرد ولا أبغى أكلمهم ولا أبغى أمارس معهم أي نشاطات ولا سوالف؟ توصل لحد التهرّب.
طفحنا من أجهزة بعض، ليش نبغى نكون سوا طول الوقت وكل واحد يحسب مافي إلا هو بحياة الطرف الآخر؟ عندي سياسة خصوصية شديده تخليني ما أبيّن اني جالسه أتعامل مع مشاكل أشخاص آخرين وهالشيء يبين كأن ما عندي شغله وكأني حاطه اصبعي بخشمي. هذا الشيء يسبب ضغط وفي الأخير ردة فعل متطرفه زي ردة فعلي الي ما فهمت سببها إلا قريب. أشوفه ارتباط قوي والتزام كبير انك تعيش مع الآخرين أو تقرأ كلامهم أو تسمعهم كل يوم.
لدرجه ما أقدر أكتب في المدونه علشان ما يجي أحد يقول اهاا تطنشني في الواتس/تويتر وهي فاضيه جالسه تكتب في مدونتها.. بالأساس مشاكل البيوت من داخل تكفي وتوّفي والواحد يكون عنده من القرف الي يكفيه انه يبغى يجلس مع نفسه بعض الوقت.
.
.
من كم شهر كنت أبغى أوصل لمرحله اني أحذف تطبيقات التواصل من جوالي، والحمد لله راضيه عن النتيجه لحد الآن. سناب / تويتر / انستجرام ما صارت من ضمن تطبيقات جوالي .. تيليجرام ما أتواصل فيه بس أتابع قناه وعامله لها ميوت بس أفتحها كل اسبوع أشوف الجديد فيها وأطلع، والواتس ما أقدر أحذفه علشان عائلتي تستخدمه للضرورات. بس كل واحد يقدر يحدد كم يقضي على هالتطبيق، عاد من أول ما أطيقه يعني ما منه خوف.
بالنسبه لتويتر والانستا أصلا ً تابعه لمدونتي وعلشان كذا أقدر أستخدمها من لابتوبي في الوقت الي أكون فيه أشتغل على المدونه وأعمل مشاركه من هنا.
فيه ناس كانوا مفيدين على السناب بس ما يجي يسحبني لين عنده علشان يربح له كم قرش وأنا الضحيه الي أخسر وقتي أكثر من استفادتي بالمحتوى الي يطرحه أيا ً كان. عندك فائده اعرضها في مكان زي الناس مو تسحبني أحمل تطبيق علشان أسمع وش عندك.
.
أتمنى فعلا ً لو الناس تخفف على بعض وتقلل هالنوع من العيش الي يحسسني ان العالم كلهم عايشين بنفس البيت ويطلعون سوا ويدخلون سوا وياكلون سوا. الحياه مو كذا. إذا كنت تحسب انك عايش صح بهالاسلوب فأنت مب عايش أصلا ً.. خفف برامج التواصل وتواصل مع نفسك أفضل لك.
.

 

subscription boxes

3
.
من عام 2004 تقريبا ً، ظهرت “هبّه” تجاريه فكرتها عباره عن اشتراك مثل اشتراك المجلات والجرايد
بس يكون شهري وعباره عن صندوق بداخله بضائع تكون لها نمط “ثيم” معين 
المشترك ما يعرف محتويات الصندوق بالتحديد، تكون مفاجأه يعني.
لكن يعرف عدد القطع أو الأغراض، يعرف عن ايش تتمحور لأنه يختار الاشتراك حسب الثيم الي يبغاه
مثلا ً بضائع تجميليهبضائع أنيميشنبضائع لمحبي الكتبمحبين الزراعه إلخ.. 
.
الصناديق الحين أصبحت متنوعه بشكل كبير ومشهوره، أمثله على أفكار المواقع الي ممكن تشترك فيها :
أنواع صابون – عينات شاي فخمه – أنواع فريده وفخمه من القهوه – أدوات تفيد الكتّاب/المؤلفين –  منظمات الوقت – أعمال يدويه – فيري جاردن ..
.
1
.
أفضل موقع بالنسبه لي، اشتريت منه صندوق واحد، بدون اشتراك يعني، بعض المواقع تسمح انك تشتري صندوق الشهر هذا وخلاص، بدون اشتراك وتجديد..
الموقع ماخذ نمط الكتب، خاصة الخيالية وتصنيف الـYoung Adult ..
.
.
يرتبون الأغراض بطريقه حلوه، كل صندوق يحتوي من بين الأغراض على كتاب أو روايه غالبا ً تكون توها نازله.. وبعض المرات يكون كتاب بإصدار حصري.. والأهم بالنسبه لي انه Hardcover .. أحب الغلاف يكون صلب، شكله يكون أكشخ ..
.
5
.
هذي محتويات الصندوق
.
2.png
.
.
الكتاب يكون آخر شيء في الصندوق، ويكون داخل كيس قماش أسود فيه شعار الموقع، يحطون معه بوستر وفاصل كتب ثاني، وبطاقه ( السوداء الي في الصوره الي تحت ) فيها رمز، تقدر تدخله وتحصل رفيق القراءة الخاصه بك .. حلوه الحركه..
.
.
4.png
.
هنا (في الصوره الي تحت) الأغراض بشكل أوضح.. الشيء الي عاليمين أعلى الصوره قاعدة كوب فيها اقتباس من كتاب.. العلبه الي عليها قلعه من برا هذي باث بومب..
العلبه السوداء الدائريه فيها مقشر شفايف ريحته حلوه.. البوستر أو اللوحه الي فيها بنت هي ثيم الشهر، ومن ورا مكتوب محتويات الصندوق بالتفصيل.. المغلف الأسود الي مكتوب عليه wake up شاهي  
.
 6.png
.
.
..
قائمة ببعض الصناديق أو الاشتراكات
اضغط الصوره الخاصه بكل اشتراك علشان يفتح الموقع الخاص فيه، وترى فيه مئات الاشتراكات غيرها
.
.
loot crate 
lootcrate ischerzo.png
لوت كريت موقع كبير فيه أنواع متعدده من الصناديق، فيه اشتراك خاص لمسلسلات أو أفلام معروفه مثل Marvel أو اشتراك خاص بـ Harry potter
ممكن للألعاب، Fallout والنكد حق نهاية العالم..
ممكن بشكل عام تختار اشتراك ألعاب أو أنمي أو تخليه عام هم يجمعون كل شيء على بعضه ..
.
هذي قائمة الخيارات في موقع Lootcrate 
.
 loot crate.png
.
مب كل مواقع الاشتراكات تكون فيها خيارات.. بعض المواقع توفر ثيم واحد وخلاص..
مثل موقع Fairyloot الي اشتركت فيه وشفتوا الصور في أول التدوينه ..
.
.
.
Fairyloot
كل شهر ثيم، مثلا ً الشهر الي اشتركت فيه كان اسمه Save the kingdom .. 
fairyloot may 2018.png
.
.
.
Japan Crate
 ( صندوق حلويات يابانيه ) 
japan crate.png
.
.
.
Birchbox
اشتراك لمحبين الأدوات التجميلية
Birchbox.png
.
.
.
Bomibox
اشتراك أدوات تجميلية وعناية بالبشرة من كوريا 
bomibox.png
.
.
.
Noobie box
اشتراك للحوامل والأمهات الجدد
noobie box ischerzo.png
.
.
.
هذا اشتراك غريب وأحسه حلو.. اشتراك لجرائم..
يوصلك صندوق كأنه أغراض المجرم وأدله ضده، وانت تحاول تحل الغموض، فيه مجتمع كامل لهالاشتراك
تتواصل معهم
hunt a killer.png
بس مب أي أحد يقبلونه، وما يصلح لضعاف القلوب .. 
.
.
.
.
وأخيرا ً هذي 3 مواقع برضو للكتب، بعضها فانتزي وبعضها لا 
.